75999

རྐུ་ཐབས་སུ་གནས་པ་ (1)

Part of speech	མིང་ཚིག
Definition	མདོ། འདུལ་བ། དགེ་ཚུལ་གང་ཡང་དགེ་སློང་མིན་བཞིན་དུ་བརྫུན་པ་ཡིས་དགེ་སློང་རང་གི་རྟགས་ནི་རབ་ཏུ་བཟུང་ནས་ཀྱང་དགེ་སློང་ཉིད་དུ་གཞན་ལ་རབ་ཏུ་ཤེས་པར་བྱེད་དེ་མ་གནང་བར་གསོ་སྦྱོང་གི་ལས་གཉིས་ཉམས་སུ་མྱོང་བར་བྱེད་པ་དེ་ནི་རྐུ་ཐབས་སུ་གནས་པ་དེར་འདོད་དོ། །འདི་ཡང་བསྙེན་པར་རྫོགས་པ་མི་རུང་ངོ་། །ཀུན་མཁྱེན་རོང་སྟོན་གྱི་འདུལ་ཕྲེང་རྣམ་འགྲེལ་ལས། མཚན་ཉིད་ནི། རང་བསྙེན་རྫོགས་ཀྱི་ཆོ་ག་མ་བྱས་པ་ཉིད་དང། མ་ཆགས་པ་ཉིད་དུ་ཤེས་ཤིང་རྐུ་སེམས་ཀྱིས་དགེ་འདུན་དང་ལྷན་ཅིག་ལན་གཉིས་ཕན་ཆད་ཉམས་སུ་མྱོང་བའི་རྟགས་ཅན་དེ་ཆོས་ཅན། དེར་གནས་པ་ཡིན་ཏེ། རྐུ་སེམས་ཀྱི་དགེ་འདུན་གྱི་ལས་ལན་གཉིས་ཕན་ཆད་ཉམས་སུ་མྱོང་བའི་རྟགས་ཅན་ཡིན་པའི་ཕྱིར། ཇི་སྐད་དུ། གཏམ་གྱི་གཞི་ལས། གང་གི་ལན་གཉིས་སམ་གསུམ་གསོ་སྦྱོང་གི་ལས་དག་ཉམས་སུ་མྱོང་བར་གྱུར་པ་དེ་ནི། རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། གང་གིས་ལན་གཅིག་ཉམས་སུ་མྱོང་བར་གྱུར་པ་དེ་ནི། རབ་ཏུ་དབྱུང་བར་བྱ། བསྙེན་པར་རྫོགས་པར་བྱ་ཞེས་སོགས་སོ། །འདི་ནི་མཚོན་པ་ཙམ་སྟེ། ཇི་སྐད་དུ་ཞུ་བ་ལས། བསྙེན་པར་མ་རྫོགས་པ་གསོ་སྦྱོང་ངམ། དགག་དབྱེ་འམ། གང་ཟག་བཅུ་གཉིས་སྐོ་བ་དག་ཉམས་སུ་མྱོང་བར་གྱུར་ན་དེ་ཙམ་གྱིས་རྐུ་ཐབས་སུ་གནས་པ་ཡིན་ནོ། །ཞེས་དང། ཉིད་ཀྱི་རྣམ་པར་བཤད་པ་ལས། དེ་ལྟར་ཡིན་ན་རབ་ཏུ་བྱུང་བ་ཞུ་བ་དང། དགེ་ཚུལ་ཉིད་དུ། ཉེ་བར་བསྒྲུབ་པ་དང། གསང་སྟེ་སྟོན་པ་དང། ཡོངས་སུ་དག་པ་དང་མགུ་བ་དང། སྤོང་བ་ལ་སོགས་པ་ཞུ་བ་དང། རྗེས་སུ་ཐོབ་པ་རྣམས་ཀྱང་སོ་སོར་ཉམས་སུ་མྱོང་བ་ལ་རྐུ་ཐབས་སུ་གནས་པ་ཉིད་རྣམ་པར་གནས་པ་ཡིན་ནོ། །ཞེས་པཎ་ཆེན་ཤཱཀྱ་མཆོག་ལྡན་གྱི་འདུལ་མདོའི་སྣང་བྱེད་ཉི་མའི་ཤིང་རྟ་ལས་སོ། །
Domain	ཆོས་ལུགས།