76315

རྒིས་སྣ་བའམ་ཀིལ་སྣ་བཀའ་བརྒྱུད་ (1)

Part of speech

མིང་ཚིག

Definition

རྟོགས་ལྡན་གཞོན་ནུ་འབྱུང་གནས་མཆོག་ནི། རྩི་བརྒྱུད་ཀོ་མཛོ་དང་ཉེ་བའི་སར་ཡབ་མགྲོན་རྡོག་རྒྱལ་བ་ཡེ་ཤེས་ཡུམ་བོ་ལྕོགས་ཞེས་པ་གཉིས་ཀྱི་སྲས་སུ་ཆུ་སྟག་ལ་སྐུ་བལྟམས། ཕུག་པ་རིན་པོ་ཆེའི་མདུན་དུ་རབ་ཏུ་བྱུང་བའི་མཚན་གཞོན་ནུ་འབྱུང་གནས། མདོ་སྔགས་ཀྱི་ཆོས་ཚུལ་རྣམས་དང༌། བླ་མེད་ཀྱི་ཐབས་གྲོལ་གདམས་པ་ཡོངས་སུ་རྫོགས་པར་གསན། སྒྲུབ་པ་རྩེ་གཅིག་ཏུ་མཛད་པས་གྲུབ་པ་ཐོབ། ཡིག་དྲུག་དུང་ཕྱུར་དྲུག་འགྲུབ། བྲག་མགོ་ནས་ཕར་ཚུར་འཕུར་བ་སོགས་མཛད། ཀིལ་སྣ(འདི་ནི་སྐུ་འབུམ་དགོན་གྱི་བྱང་ཕྱོགས་སུ་ཡོད། ད་ལྟ་ཡང་ཡུལ་མིས་རྒིས་སྣ་བྲག་ཟེར)དེ་ཉིད་དུ་གདན་ས་བསྐྱང་ཞིང་རྟོགས་ལྡན་རིན་པོ་ཆེ་ཞེས་པའི་མཚན་སྙན་ཕྱོགས་མཐར་ཁྱབ། དགུང་གྲངས་བདུན་ཅུ་ལ་མྱ་ངན་ལས་འདས། རབ་བྱུང་ལྔ་པའི་ནང་ཙམ་ལ་བྱོན། སློབ་མ་ཡང་རི་པ་བརྩོན་འགྲུས་འབྱུང་གནས། སོ་རག་སེང་གེ་འབུམ་པ། མཛོ་མོ་བ་ཆོས་བཟང༌། སྟག་བན་ཆོས་རིན། རིན་ཆེན་ཤེས་རབ། ཚུལ་གྲགས་པ། རྟོགས་ལྡན་དམར་ཡུ། བསོད་རྒྱལ་བ་སོགས་མང་དུ་བྱོན། གདན་ས་བ་ནི། མཛོ་མོ་བ་དང་ཚུལ་གྲགས་པ་སོགས་ཀྱི་མཛད་ནས་དེ་རྗེས་ཚན་གཅིག་ཚ་བ་སྒང་དུ་བྱོན་ནས་ཚ་བ་བང་ཆེན་དགོན་ཞེས་པ་བཏབ། ཚུལ་ཁྲིམས་རྒྱ་མཚོ་ཞེས་པས་རྒིས་སྣ་འབྲོག་དགོན་བཏབ་པ་སོགས་ཀྱི་བརྒྱུད་པ་ད་ལྟ་བར་ཡོད་པ་སྟེ་ཀིལ་སྣ་བའི་སྐབས་སོ། །