76372

རྒོད་ཚང་བཀའ་བརྒྱུད་ (1)

Part of speech

མིང་ཚིག

Definition

གསང་བ་ལུས་མེད་རྡོ་རྗེའི་སློབ་ཆེན་ཕྱག་རྒྱ་ཆེན་པོའི་བཀའ་བབས་དངུལ་རྫོང་པ་ཤཱཀྱ་རྡོ་རྗེ་མཆོག་ལུས་མེད་རྡོ་རྗེའི་མདུན་ལ་རབ་བྱུང་། མཚན་ཤཱཀྱ་རྡོ་རྗེར་གསོལ། འཇག་སྤྱིལ་མཛད་དེ་བསྒོམས་པས་ཉིན་མཚན་དབྱེར་མེད་ཀྱི་རྟོགས་པ་འཁྲུངས། ཕྱག་རྒྱ་ཆེན་པོའི་བཀའ་བབས་སུ་གྲགས། བདག་བཟུང་ཅན་གྱི་དགོན་པ་མ་བརྩེགས་ནས་ཁྲ་ཐེར་ལ་བརྟེན་ནས་རི་ཁྲོད་འགྲིམ་པའི་དམ་བཅའ་ཕུལ་ནས་བྱོན། འབྲི་ཟླ་བར་གྱི་འབྲོག་པ་དང་སྒ་པའི་སྟོད་རྣམས་སུ་ངེས་མེད་དུ་འགྲོ་དོན་མཛད་ཅིང་གདུལ་བྱ་བསྐྱངས། མཐར་དོན་བདུན་ལ་སྒ་སྟོད་དུ་སྐུ་གཤེགས། རབ་བྱུང་བཞི་པའི་ནང་ཙམ་ལ་བྱོན། སློབ་ཚོགས་མཐའ་ཡས་ཀྱང་དེར་བཞུགས་དབོན་ཚུལ་ཁྲིམས་རྒྱལ་མཚན་ཏེ། དབྱི་ལུང་དང་འདམ་ལུང་གཉིས་ཀྱི་བར་རྒོད་ཚང་ཁ་བྱ་བར་སྒར་པ་བཞུགས་ནས་བསྒྲུབ་པ་དང་འགྲོ་དོན་མཛད་པས་མིང་རྒོད་ཚང་པར་གྲགས། ཕྱིས་སུ་སྒོམ་སྡེའི་གདན་དྲངས་ནས་ལྷ་དོག་ཟླ་ནང་སོགས་འགྲོ་དོན་ཆེར་རྒྱས། མཐར་རྒོད་ཚང་ཁར་སྐུ་གཤེགས། སློབ་མ་ཀུན་དགའ་བློ་གྲོས་སོགས་མང་དུ་བྱོན། གདན་ས་བ་ནི་དབོན་ཡོན་ཏན་བཟང་པོ་དང་ཀུན་དགའ་བཟང་པོས་མཛད་ཅིང་དབོན་བརྒྱུད་ནི་ཚུལ་ཁྲིམས་བཟང་པོ་སོགས་ཀྱི་རིམ་པར་གདན་ས་བསྐྱངས་ནས་ཕྱིས་ཀྱི་བར་ཙམ་ཡོད་པར་སྣང་བ་སྟེ་རྒོད་ཚང་པའི་སྐབས་སོ། །