76611

རྒྱ་འདུལ་འཛིན་དབང་ཕྱུག་ཚུལ་ཁྲིམས་འབར་ (1)

Part of speech

མིང་ཚིག

Definition

རབ་བྱུང་དང་པོའི་མེ་ཕག་ཕྱི་ལོ་ ༡༠༤༧ ལོར་མྱང་སྟོད་མང་ར་ལ་འཁྲུངས། ཆུང་དུས་ནས་ཡབ་ཡུམ་འདས་ཏེ་གནས་གཞི་བྱ་རོག་ཚང་བའི་བཙུན་པ་རྣམས་ཀྱི་སར་ཕྱིན། གཟུགས་བྱད་ངན་པས་བསྐྲད་དེ་དགའ་བ་གདོང་དུ་བྱོན། འདུལ་བ་མདོ་རྩ་བློར་བཟུང་། སོག་ཅན་དུ་འདུལ་བ་ལ་མཁས་པར་སྦྱངས། དབུས་གཙང་ཡུལ་དུ་འདུལ་བར་མཁས་པ་ཀུན་ལས་འདུལ་བ་དཔྱིས་ཕྱིན་པར་སྦྱངས། སྣེ་ཕོ་གྲགས་པ་རྒྱལ་མཚན་དང་། གླན་ཚུལ་ཁྲིམས་བྱང་ཆུབ། སྤོ་ཆུང་ཚུལ་ཁྲིམས་འབྱུང་གནས་གསུམ་ལས་འདུལ་བ་ལ་སོགས་པའི་ཆོས་སྐོར་མང་དུ་གསན། གཙོ་བོར་མྱང་མཚམས་རིན་ཆེན་བླ་མ་དང་། ཀོ་ཁྱིམ་པ་ཡེ་ཤེས་བླ་མ། སྐམ་གསལ་བའི་སྙིང་པོ་བཅས་ལ་བསྟེན། དགུང་ལོ་སོ་བཞིའི་བར་འདུལ་བ་གཙོས་ཆོས་སྐོར་རྣམས་ལ་མཐར་ཕྱིན་པ་སྦྱངས། དགུང་ལོ་བརྒྱད་ཅུའི་བར་བཞུགས་སའི་མཐིལ་དགའ་བ་གདོང་དུ་མཛད། ཆུ་མིག་ལུང་བཟུང་ནས་ཆོས་གཞི་མང་དུ་བསྐོར། འདུལ་བའི་བཤད་པ་རྒྱ་ཆེར་མཛད། གྱ་ལྔ་པ་རབ་བྱུང་གཉིས་པའི་ལྕགས་ཕག་ཕྱི་ལོ་ ༡༡༣༡ ལོར་ཤངས་སུ་སྐུ་གཤེགས། སློབ་མ་གྲགས་ཆེ་བ་ནི་འདར་འདུལ་འཛིན་དང་། མཐའ་བཞི་བརྩོན་འགྲུས་འབར། ཇོ་སྟན་ནག་པོ་དར་མ་ཚུལ་ཁྲིམས། རྨ་ཚོ་བྱང་ཆུབ་རྡོ་རྗེ་བཅས་ཡིན།