77004

རྒྱལ་པོ་ཟས་གཙང་མའི་ཁྱིམ་ལ་བསྟན་པའི་སྔ་ལྟས་བརྒྱད་ (1)

Part of speech	མིང་ཚིག
Definition	འཕགས་པ་རྒྱ་ཆེར་རོལ་པ་ཞེས་བྱ་བ་ཐེག་པ་ཆེན་པོའི་མདོ་ལས་བྱུང་བ་སྟེ། ༡ ཁྱིམ་དེ་རྩྭ་དང༌། སྡོང་དུམ་དང༌། ཚེར་མ་དང༌། གསེག་མ་དང༌། གྱོ་མོ་མེད་ཅིང༌། དྲི་མ་མེད་ལ་ཆག་ཆག་ལེགས་པར་བཏབ་པ་དང༌། ཕྱག་དར་ལེགས་པར་བྱས་ཤིང༌། རླུང་རྡུལ་ཅན་དང༌། མུན་པ་དང༌། རྡུལ་དང་བྲལ་བ་དང༌། སྦྲང་མ་དང༌། ཤ་སྦྲང་དང༌། སྦྲང་བུ་དང༌། ཕྱེ་མ་ལེབ་དང༌། སྡིག་སྦྲུལ་མེད་ཅིང་མེ་ཏོག་གིས་ཀུན་ཏུ་གང་བ། ལག་མཐིལ་ལྟར་མཉམ་པར་གནས་པར་གྱུར་ཏོ། ། ༢ རིའི་རྒྱལ་པོ་གངས་རི་ལ་བྱ་འདབ་སྦེད་དང༌། ནེ་ཙོ་དང༌། རི་སྐེགས་དང༌། ཁུ་བྱུག་དང༌། ངང་པ་དང༌། རྨ་བྱ་དང༌། ངུར་པ་དང༌། ཀུན་ལ་དང༌། ཀ་ལ་པིངྐ་དང༌། ཤང་ཤང་ཏེའུ་ལ་སོགས་པ་སྒྲོ་གཤོག་སྣ་ཚོགས་མཛེས་པ་ཡིད་དུ་འོང་ཞིང་སྙན་པའི་སྒྲ་འབྱིན་པའི་བྱའི་ཚོགས་གང་དག་གནས་པ་དེ་དག་དེར་འོངས་ནས་རྒྱལ་པོ་ཟས་གཙང་མའི་ཁྱིམ་དམ་པ་དེའི་སྟེགས་བུ་དང༌། བ་གམ་དང༌། རྟ་བབས་དང༌། སྐར་ཁུང་དང༌། བསིལ་ཁང་དང༌། ཁང་པ་བརྩེགས་པ་དང༌། ཁང་བཟང་གི་སྟེང་དག་ཏུ་གནས་ཤིང་དགའ་བ་དང༌། མགུ་བ་དང༌། ཡིད་བདེ་བ་སྐྱེས་ནས་རང་རང་གི་སྒྲ་སྐད་དག་འབྱིན་པའོ། ། ༣ གང་ཡང་རྒྱལ་པོ་ཟས་གཙང་མ་དེའི་ཀུན་དགའ་ར་བ་ཉམས་དགའ་བ་དང༌། ནགས་ཚལ་ཉམས་དགའ་བ་དང༌། སྐྱེད་མོས་ཚལ་ཉམས་དགའ་བ་དག་ན་མེ་ཏོག་དང༌། འབྲས་བུའི་ཤིང་ལྗོན་པ་སྣ་ཚོགས་དུས་ཐ་དད་པར་འབྱུང་བ་དེ་ཐམས་ཅད་ཀྱང་ཁ་འབུས་ཤིང་མེ་ཏོག་རྒྱས་པར་གྱུར་ཏོ། ། ༤ རྒྱལ་པོ་ཟས་གཙང་མའི་ཆུའི་ལོངས་སྤྱོད་ཀྱི་རྐྱེན་རྫིང་ལ་སོགས་པ་གང་དག་ཡོད་པ་དེ་དག་ཐམས་ཅད་ཀྱང་པདྨ་འདབ་མ་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ལྡན་པ་ཚད་ཤིང་རྟའི་འཕང་ལོ་ཙམ་དག་གིས་ཁེབས་པར་གྱུར་ཏོ། ། ༥ རྒྱལ་པོ་ཟས་གཙང་མའི་ཁྱིམ་དམ་པ་དེ་ན་མར་དང༌། འབྲུ་མར་དང༌། སྦྲང་རྩི་དང༌། བུ་རམ་གྱི་དབུ་བ་དང༌། ཤ་ཁ་ར་ལ་སོགས་པ་བཟའ་བའི་རྣམ་པ་གང་དག་ཡོད་པ་དེ་དག་ཀྱང་ཡོངས་སུ་སྤྱད་པས་ཟད་པར་མི་འགྱུར་ཞིང༌། ཡོངས་སུ་གང་བར་སྣང་ངོ་། ། ༦ རྒྱལ་པོ་ཟས་གཙང་མའི་ཁྱིམ་མཆོག་དམ་པ་དང༌། བཙུན་མོའི་འཁོར་ཆེན་པོ་དག་ན་རྔ་བོ་ཆེ་དང༌། རྫ་རྔ་དང༌། འཁར་རྔ་དང༌། རྒྱུད་གཅིག་པ་དང༌། པི་ཝང་དང༌། གླིང་བུ་དང༌། རྒྱུད་གསུམ་པ་དང༌། འཁར་བའི་སིལ་ཁྲོལ་དང༌། ཕེག་རྡོབ་ལ་སོགས་པ་རོལ་མོའི་ཆ་བྱད་གང་དག་ཡོད་པ་དེ་དག་ཐམས་ཅད་ཀྱང་མ་བླངས་མ་དཀྲོལ་བར་ཡིད་དུ་འོང་བའི་སྒྲ་རང་སྒྲོག་པར་གྱུར་ཏོ། ། ༧ རྒྱལ་པོ་ཟས་གཙང་མའི་ཁྱིམ་མཆོག་དམ་པ་ན་གསེར་དང༌། དངུལ་དང༌། ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། དུང་དང༌། མན་ཤེལ་དང༌། བྱི་རུ་ལ་སོགས་པ་རིན་པོ་ཆེ་སྣ་ཚོགས་ཀྱི་སྣོད་གང་དག་ཡོད་པ་དེ་དག་ཐམས་ཅད་ཀྱང་ཁ་བྱེ་ཞིང་དྲི་མ་མེད་ལ་རྣམ་པར་དག་ཅིང་རབ་ཏུ་གང་བར་སྣང་ངོ་། །༨ ཉི་ཟླའི་འོད་ཟིལ་གྱིས་རླག་པར་བྱེད་ཅིང༌། ལུས་དང་སེམས་དགའ་བསྐྱེད་པའི་འོད་དག་ཅིང་དྲི་མ་མེད་པས་སྣང་བར་གྱུར་ཏོ། །
Domain	ཆོས་ལུགས།