77282

རྒྱལ་སྲས་བསོད་ནམས་ལྡེའུ་བཙན་ (1)

Part of speech

མིང་ཚིག

Definition

ཁོང་ནི་རིག་འཛིན་བདུད་འདུལ་རྡོ་རྗེའི་སྐྱེ་བ་འཕོས་མ་ཐག་པ་ཡིན་ཏེ། ཡབ་གཏེར་སྟོན་རིག་འཛིན་ཀློང་གསལ་དང༌། ཡུམ་མཚན་ལྡན་མ་ལྷ་སྐྱིད་ཅེས་པའི་སྲས་སུ་ཤིང་མོ་ཡོས་ ༡༧༣༥ ཀྱི་ལོར་གནས་ཆེན་མཚོ་ཕུ་དང་ཉེ་བའི་ཆར་འཁྲུངས། བལྟམས་མ་ཐག་དབྱངས་གསལ་ཞལ་འདོན་མཛད་པ་སོགས་ངོ་མཚར་ཆེ་བའི་ལྟས་མང་དུ་བྱུང༌། དེ་ནས་རིམ་གྱིས་གདན་ས་ཆེན་པོ་དཔལ་གྱི་ཀཿཐོག་ཏུ་བྱོན། ཡབ་རྗེའི་དྲུང་ནས་བཀའ་ཆོས་མང་དུ་གསན། ཀུན་བཟང་ཁྱབ་གདལ་ལྷུན་གྲུབ་ཀྱིས་ལྗགས་ཀློག་སོགས་འབུལ་བར་མཛད། ཀཿཐོག་ཏུ་བཞུགས་ནས་རང་ལུགས་ཀྱི་དབང་ལུང་རྣམས་གསན་བཞེས་གནང༌། ཡབ་རྗེ་གཏེར་ཆེན་བླ་མ་དེ་ཉིད་དགོངས་པ་རྫོགས་རྗེས། ཞལ་ཆེམས་ལྟར་གྲུབ་དབང་པདྨ་རིག་འཛིན་གྱི་དྲུང་ནས་རྫོགས་ཆེན་གྱི་སྨིན་ཁྲིད་རྒྱས་པ་གསན་པས་གནས་ལུགས་ཀྱི་རྟོགས་པ་མངོན་དུ་གྱུར། དེ་ནས་དབུས་ཕྱོགས་སུ་ཕེབས་ནས་ཨོ་རྒྱན་སྨིན་གྲོལ་གླིང་དུ་ཆོས་རྒྱལ་གཏེར་བདག་གླིང་པ་དང་གཅུང་ལོ་ཆེན་དྷརྨ་ཤྲཱི་ལས་སྨིན་གྲོལ་གདམས་པའི་བདུད་རྩི་མང་དུ་གསན་ཅིང༌། སྐྱེས་བུ་དམ་པར་བཀུར་བའི་བསྔགས་བརྗོད་ཀྱང་བསྩལ། གཞན་ཡང་དགེ་བའི་བཤེས་གཉེན་སྐལ་བཟང་ཨོ་རྒྱན་བསྟན་འཛིན་ལས་གོང་མ་བདུད་འདུལ་རྡོ་རྗེའི་ཆོས་སྐོར་ཡོངས་རྫོགས་གསན། གཏེར་ཆེན་སྟག་ཤམ་རྡོ་རྗེའི་དྲུང་དུ་བྱོན་པའི་ཚེ་ཆོས་བདག་ཏུ་མངའ་གསོལ་བར་མཛད། རྫོགས་ཆེན་གཉིས་པ་འགྱུར་མེད་ཐེག་མཆོག་བསྟན་འཛིན་ལ་སོགས་བླ་མ་མང་པོ་བསྟེན་ནས་གསན་སྦྱངས་དང་ཉམས་བཞེས་མཐར་ཕྱིན་པར་མཛད། གྲུབ་རྟགས་ཀྱང་རྡོ་ལ་ཕྱག་ཞབས་ཀྱི་རྗེས་དང༌། དཀར་ཡོལ་རྒྱང་རིང་དུ་བསྐྱུར་ཀྱང་ཆག་གྲུམ་མེད་པ་དང༌། མངོན་མཁྱེན་ལ་ཆགས་ཐོགས་མེད། ཡི་དམ་ལྷའི་ཞལ་གཟིགས་པ་སོགས་གྲངས་ཀྱིས་མི་ཆོད། ཁྱད་པར་ཡབ་གཏེར་ཆེན་རིན་པོ་ཆེ་རྟ་ཁོག་ཕ་ཝཾ་བོན་མོ་ཞེས་བན་བོན་གཉིས་ཀའི་གནས་ཡིན་པ་དེར་ཕེབས་སྐབས། རྒྱལ་སྲས་འདི་དགུང་ལོ་བརྒྱད་ཀྱི་ཐོག་ཡབ་རྗེ་དང་ལྷན་དུ་བྱོན་པས་འབྲོང་དེའུ་ཞེས་པའི་ས་ཆར་ཞབས་རྗེས་ཤིན་ཏུ་གསལ་བར་བྱོན་པས་དེང་སང་ཡང་ཞབས་རྗེས་ལུང་པ་ཞེས་འབོད། རྟེན་སྔགས་འཆང་དུ་བཞུགས་ཀྱང་རིགས་བརྒྱུད་གཞན་ཡོད་པ་མ་ངེས། ཡུམ་ཟུར་པ་ཞིག་ལ་སྲས་ཨོ་རྒྱན་བསྟན་འཕེལ་འཁྲུངས་ཏེ། དྲུང་ནམ་མཁའ་རྒྱ་མཚོས་བསྐྱངས་ནས་ཕྱིས་སུ་ཁ་བ་དཀར་པོའི་ཕྱོགས་སུ་བྱོན་པས་འཕྲིན་ལས་རྒྱ་ཆེ་ཞིང་མོན་འཇང་ཡུལ་དུ་གནས་སྒོ་ཕྱེ་བ་སོགས་མཛད་ནས་ཡུལ་ཕྱོགས་དེའི་སྡེ་དགོན་ཕལ་ཆེར་དེང་གི་བར་རྒྱལ་བ་ཀཿཐོག་པའི་ཆོས་བརྒྱུད་དུ་གཏོགས་པ་འདི་བྱུང༌། དེ་ལས་གདན་སར་བཞུགས་པའི་སྲས་མ་བྱུང་ཞིང༌། ཀཿཐོག་གདན་ས་བསྐྱང་བཞིན་པའི་འཕྲོར་དགུང་ལོ་ཞེ་དགུ་ཆུ་ཡོས་ལ་དག་པའི་ཞིང་དུ་གཤེགས། འདིའི་སློབ་མ་བཀྲ་ཤིས་འོད་ཟེར་དང༌། ཞེ་ཆེན་རབ་འབྱམས་སོགས་ཡིན། སྐུ་གདུང་ཡང་རིང་བསྲེལ་གྱི་ཕུང་པོར་གྱུར་པས་ཀུན་ངོ་མཚར་ཞིང་དད་པར་གྱུར་ཏོ། །

{{#arraymap:རྒྱལ་སྲས་བསོད་ནམས་ལྡེའུ་བཙན་

|; |@@@ | | }}