77443

རྒྱུ་མཐུན་གྱི་སྐུ་ (1)

Part of speech	མིང་ཚིག
Definition	མདོ། དབུ་མ། རང་ཉིད་ཀྱི་སྐུ་གཅིག་གམ་བ་སྤུའི་ཁུང་བུ་གཅིག་ལའང་རང་གཞན་གྱི་དུས་གསུམ་གྱི་སྤྱོད་པ་དང་འཁོར་འདས་ཀྱི་སྣང་བ་མ་ལུས་པ་སྟོན་པ་སྟེ། འདི་ལ་སྤྲུལ་པའི་སྐུ་ཞེས་པའི་ཐ་སྙད་ནི་མི་མཛད་པར་སྣང་ངོ་། །འདི་དག་ལ་སྐུ་གསུམ་ཞེས་པའི་ཐ་སྙད་མཛད་པ་ཡང་། དག་པ་འདི་ནི་བཞེད་པ་འཇུག་པ་ཡིས། །ཞེས་པའི་སྔ་འགྲེལ་དུ། སྐུ་གསུམ་རྫོགས་པར་བརྗོད་ནས་རྣམ་པར་རྟོག་པ་མི་མངའ་བར་ཟིན་ཀྱང་བཞེད་པ་ལ་མངའ་བསྒྱུར་བ་ཉིད་ཕུན་སུམ་ཚོགས་པར་བསྟན་པའི་ཕྱིར་བཤད་པ། ཞེས་པས་གྲུབ་བོ་ཞེས་ཀུན་མཁྱེན་གོ་རམས་པའི་དབུ་མའི་སྤྱི་དོན་ལས་གསུངས་སོ། ། ཆོས་སྐུ་དང་ལོངས་སྐུ་ཅི་རིགས་པའི་མཐུ་ལས་རང་གིས་དང་པོ་ཐུགས་བསྐྱེད་པ་དང་། ཚོགས་བསགས་པ་དང་། དེ་དག་གི་སྐབས་ཀྱི་སངས་རྒྱས་འཁོར་དང་བཅས་པ་དང་། གཞན་ཡང་དུས་གསུམ་གྱི་སངས་རྒྱས་རྣམས་ཀྱིས་དང་པོ་ཐུགས་བསྐྱེད་པ་ནས་བྱང་ཆུབ་སྙིང་པོའི་བར་གྱི་མཛད་སྤྱོད་ཀུན་བ་སྤུའི་ཁུང་བུར་དུས་གཅིག་ལ་གསལ་བར་སྣང་བའི་སྐུ་རྣམས་ནི་རྒྱུ་མཐུན་གྱི་སྐུ་ཡིན་ནོ། །འོ་ན་རྒྱུ་མཐུན་གྱི་སྐུ་དེ་དག་ཆོས་སྐུ་ལོངས་སྐུ་སྤྲུལ་སྐུ་གསུམ་པོ་གང་ཡིན་ཞེ་ན། སྤྲུལ་སྐུ་མ་ཡིན་པ་ནི་གཞིར་བཞག་ལ། ཆོས་སྐུ་དང་ལོངས་སྐུ་གཉིས་ཀྱང་མ་ཡིན་ཏེ། ཐུབ་དབང་དུས་ཁོ་ནར་ཞེས་སོགས་ཀྱི་སྔ་འགྲེལ་ལས། ཆོས་སྐུ་ལས་བྱུང་བའམ་གཟུགས་ཀྱི་སྐུའི་མཐུ་ལས་བྱུང་བ་ཡིན་ཡང་རུང་སྟེ། ཇི་སྐད་བཤད་པའི་སྐུ་ལས་གཞན་དུ་གྱུར་པ་རྒྱུ་མཐུན་པའི་སྐུ་གང་དག་ཅེས་གསུངས་པའི་ཕྱིར། འོན་ཀྱང་འདི་ཆོས་སྐུ་དང་ལོངས་སྐུ་ཅི་རིགས་པའི་ཆོ་འཕྲུལ་གྱི་སྐུ་ཡིན་ཞིང་། སྐུ་གསུམ་གྱི་གྲངས་ངེས་ལྟར་ན་ལོངས་སྐུའི་ཁོངས་སུ་བསྡུ་དགོས་པ་ཙམ་ཡིན་ནོ་ཞེས་པཎ་ཆེན་ངག་ཆོས་ཀྱི་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།