77805

རྒྱུན་ (1)

Part of speech	མིང་ཚིག
Definition	བར་མ་ཆད་པར་འབྲེལ་བའི་དངོས་པོ་སྟེ། ཆུ་རྒྱུན་ཞེས་དང་། སྲོལ་རྒྱུན་ཞེས་དང་། རྒྱུན་རིང་པོ་ཞེས་དང་། རྒྱུན་མ་ཆད་པ་ཞེས་པ་ལྟ་བུ།

རྒྱུན་ (2)

Part of speech	མིང་ཚིག
Definition	མདོ། དབུ་མ། དོན་དམ་པར་སྐྱེ་འགག་མེད་ཀྱང་ཐ་སྙད་དུ་སྐད་ཅིག་སྔ་མ་འགགས་ནས་ཕྱི་མ་སྐྱེ་བར་སྣང་བ་བར་མ་ཆད་དུ་འབྱུང་བ་ལ་བརྟེན་ནས་རྒྱུན་གཅིག་དང་རྒྱུད་གཅིག་པ་ཞེས་འདོགས་ཏེ། ཆུ་བོའི་རྒྱུན་ཆད་པ་དང་། མ་ཆད་པ་ཞེས་དང། རྒྱུན་དུ་སྦྱོར་མི་སྦྱོར་ཞེས་དང། ལམ་གྱི་དངོས་པོའི་རྒྱུན་དང་ལྡན་པ་དང་མི་ལྡན་པ་ཞེས་སོགས་འཇིག་རྟེན་དང་བསྟན་བཅོས་ལ་མཐོང་བའི་ཕྱིར་རོ། །དེའང་སྐད་ཅིག་སྔ་ཕྱི་དེ་ཉིད་དང་གཞན་ཉིད་ཡིན་ན་རྒྱུན་མི་འཐད་པ་ནི་བདག་སྐྱེ་དང་གཞན་སྐྱེ་ཐ་སྙད་དུའང་འགོག་པའི་རིགས་པས་གྲུབ་ལ། རྩ་ཤེར་ལས། རྟེན་ཅིང་འབྲེལ་བར་འབྱུང་བ་ལ་སྐྱེ་འགག་ལ་སོགས་པ་སྤྲོས་པའི་མཐའ་བརྒྱད་བཀག་པ་དེ། འགྲེལ་བྱེད་གཞན་དག་ཐ་སྙད་དང་དོན་དམ་པའི་དབྱེ་བ་སོ་སོར་ཕྱེ་ནས་འཆད་ཀྱང། སློབ་དཔོན་འདིས་དོན་དམ་པར་སྐྱེ་འགག་སོགས་སྤྲོས་པའི་མཐའ་བརྒྱད་བཀག་པས་ཁྱད་པར་དུ་བྱས་པའི་རྟེན་འབྲེལ་བསྟན་བཅོས་ཀྱི་བརྗོད་བྱའི་གཙོ་བོ་ཡིན་པར་གསུངས་པ་ཉིད་ཀྱིས་ཐ་སྙད་དུ་སྐྱེ་འགག་སོགས་བརྒྱད་ཁས་ལེན་པར་གསལ་ཏེ། མཐའ་བཞིའི་སྐྱེ་བ་དང་གང་ཟག་རྣམ་ལྔར་གྲུབ་པ་སོགས་དགག་བྱ་ཐ་སྙད་དུའང་ཁས་མི་ལེན་པ་རྣམས་ལ་དོན་དམ་གྱི་ཁྱད་པར་སྦྱར་ནས་འགོག་པ་སློབ་དཔོན་འདིས་ལེགས་པར་བཀག་པའི་ཕྱིར་རོ། །དེ་ལྟར་ན། ཆད་པ་མེད་པ་རྟག་མེད་པ། །ཞེས་པའི་འགྲེལ་པར། ཆད་པས་ན་ཆད་པ་སྟེ། རྒྱུན་ཆད་པ་ཞེས་པའི་དོན་ཏོ་ཞེས་གསུངས་པས་རྒྱུན་ཆད་པ་ཐ་སྙད་དུ་ཁས་ལེན་པར་གྲུབ་ཅིང། དེས་ན་ལོག་ཕྱོགས་རྒྱུན་མ་ཆད་པའང་ཐ་སྙད་དུ་ཁས་ལེན་དགོས་ཏེ། དེ་གཉིས་ཕན་ཚུན་ལྟོས་ནས་གྲུབ་པའི་ཕྱིར་རོ། །ཅི་ལྟར་ཞེ་ན། ས་བོན་ལས་མྱུ་གུ་དང། མྱུ་གུ་ལས་སླར་ཡང་ས་བོན་འབྱུང་བ་སོགས་ཐོག་མ་མེད་པ་ནས་བར་མ་ཆད་དུ་ཡོད་པས་རྒྱུན་མ་ཆད་པ་དང། ནམ་ཞིག་ས་བོན་མེས་བསྲེགས་ནས་མྱུ་གུ་སྐྱེ་བ་མེད་པར་གྱུར་བའི་ཚེ་རྒྱུན་ཆད་པ་ཞེས་བྱ་བར་འཇོག་གོ ། ཞེས་ཀུན་མཁྱེན་གོ་རམས་པའི་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།