78102

རྔོག་ཆོས་སྐུ་རྡོ་རྗེ་ (1)

Part of speech

མིང་ཚིག

Definition

རྔོག་ལོ་ཙཱ་བ་ཁུ་དབོན་གྲུང་པོ། ཡབ་བན་ཆེན་ཁ་པོ་དང། ཡུམ་འོད་ལྡན་མའི་སྲས་སུ་རབ་བྱུང་དང་པོའི་ཆུ་རྟ་ ༡༠༤༢ ལོར་འཁྲུངས། གཞུང་གི་རི་བོར་འབྲོག་པ་ཡིན། སྔགས་རྙིང་མ་སློབ་ཏུ་གཙང་སྒྱེར་ཕུའི་དགེ་བཤེས་སྒེར་ཆུང་བའི་མདུན་དུ་བྱོན། སྒྱེར་ཕུའི་ཆགས་ལོ་དང་ཡང་མཇལ། བྱེ་མ་ལུང་པ་ལས་མཚན་བརྗོད་གསན། དེ་དུས་དགེ་བཤེས་སྒྱེར་ཆུང་པ་ལས་རྗེ་མར་པའི་སྙན་པ་ཐོས་པས་དད་པའི་སྤུ་ལོང་གཡོས། ཆོས་འཕྲོ་མྱུར་བར་ཞུས་ནས་གཞུང་དུ་ལོག། རྟ་གཅིག་ཁྲིད་ནས་ལྷོ་གྲོ་བོ་ལུང་དུ་བྱོན། རྟ་ཕུལ་བས། ཁྱོད་ཀྱི་རྟ་ཕུལ་བ་དེ་ཕྱག་རྟེན་ཡིན་ན་ཆེ། འབུལ་བ་ཡིན་ན་ཆུང་གསུང་། དེའི་དུས་རྔོག་རང་དགུང་ལོ་བཅུ་དྲུག་ཙམ་དང་། རྗེ་མར་པ་ཞེ་དྲུག་ཙམ་ཡིན། ཐོག་མར་བདག་མེད་ལྷ་མོ་བཅོ་ལྔའི་དབང་དང་མན་ངག་ཞུས། ཉམས་སུ་བླངས་པས། རིང་པོར་མ་ཐོགས་པར་ལྷ་མོ་བཅོ་ལྔའི་དཀྱིལ་འཁོར་དངོས་སུ་གཟིགས། བླ་མ་ལ་བདག་སྐལ་བར་ལྡན་ནམ། ཆོས་འདི་བྱིན་རླབས་ཆེ་བ་ཡིན་ཞུས་པས། གཉིས་ཀ་ཡིན་གསུང་། དེ་ནས་གཞུང་དུ་ན་མ་ཟླུམ་པོ་ཞིག་གི་ཁར་གནས་གཞི་ཁྱུང་ལྟ་བུ་ཞིག་བཏབ་པས་ཟླུམ་ཁྱུང་དུ་གྲགས་པ་དེར། མར་པ་ལན་དུ་མར་སྤྱན་དྲངས། དངོས་རྫས་སྤང་དག་ལན་གསུམ་བྱས་ནས་དགྱེས་རྡོར་རྩ་འགྲེལ། མཱ་ཡ། གདན་བཞི་ཡོངས་རྫོགས། སོ་སོའི་མན་ངག། ཁྱད་པར་བསྲེ་འཕོ་གནད་ཀྱི་མཚམས་སྦྱོར་རྣམས་གནང་། རྗེས་ཀྱི་བརྒྱུད་པ་བདུན་ཚུན་རྡོ་རྗེ་དྲིལ་བུ་འཛིན་ཤེས་པས་ཆོག། ཁོ་བོ་རང་གིས་བྱིན་གྱིས་རློབ་པ་ཡིན་གསུངས། འདིས་ཐོས་པ་དང་སྒྲུབ་པ་སྟབས་སུ་མཛད་པས་ཡེ་ཤེས་ཀྱི་སྐུ་བརྙེས། འཆད་ཉན་མཛད་པས་སློབ་མ་བསམ་གྱིས་མི་ཁྱབ་པ་ཐོན། དགུང་ལོ་རེ་གཅིག་པ་ཆུ་རྟ་ ༡༡༠༢ ལོར་དབེན་གནས་ནས། སྟོན་བཙས་མ་བརྔ་བའི་དུས་(བོད་ཟླ་དགུ་པའི་ཚེས་གསུམ་ཟེར་བའང་འདུག)གསུང་ཆེན་པོས་བོས་ཏེ། ངའི་ཕྱིས་ལ་སུ་འགྲོ་འདོད་པ་ཤོག་གསུངས་པས། གཞན་སུ་ཡང་མ་བྱུང་བར་ཀུན་གྱིས་མཐོང་བར་ཌཱ་མ་རུ་ཁྲོལ་ལེ་ནམ་མཁའ་ལ་གཤེགས་སོ། །དེ་ལ་སློབ་མ་རམ་ཀླུ་གོང་པ། སྤ་ལྦ་བ་ཅན། རྔོག་དད་པ་ཅན། རྒྱ་འ་མ་ཅན། སུམ་པ་ཕོད་ཁབ་ཅན། ལྷོ་པ་ཆུང་མ་ཅན་སོགས་མང་ཞིང་། སྲས་ནི་རྔོག་མདོ་སྡེའམ་ཞེ་སྡང་རྡོ་རྗེ་ཞེས་བྱའོ། །