7869

གནམ་མཚོ་དོ་པ་ཆོས་གྲུབ་དཔལ་བཟང་ (1)

Part of speech

མིང་ཚིག

Definition

ཁོང་ནི། ཀུན་མཁྱེན་པདྨ་དཀར་པོའི་དངོས་སློབ་ཡིན། འཕན་པོར་འཁྲུངས། ཀུན་མཁྱེན་ཆེན་པོའི་འཁྲུངས་ལོ་རབ་བྱུང་དགུ་པའི་མེ་ཕག་ ༡༥༢༧ ཐོག་མར་གསེར་མདོག་ཅན་དུ་མདོ་ཕྱོགས་ཀྱི་གསན་བསམ་མཐར་ཕྱིན། ཀུན་མཁྱེན་རྒྱལ་བའི་དབང་པོ་གཙང་རྒྱལ་བྱེད་ཚལ་དུ་ཆོས་ཀྱི་འཁོར་ལོ་བསྐོར་བའི་དུས་ཞབས་པད་བསྙེན། དབང་ཁྲིད་གདམས་པ་མང་དུ་མནོས་ཏེ། ཙ་རིར་སྒྲུབ་པ་ལོ་གསུམ་མཛད། སླར་ཞབས་དྲུང་དུ་གདམས་པ་ལྷག་མ་མ་ལུས་པར་གསན། ཁོང་གིས་ཞུས་ངོར། ལུས་མེད་མཁའ་འགྲོའི་ཆོས་སྡེའི་རྣམ་བཤད་མཛད། བྱང་གནམ་མཚོ་སེན་མོ་དོར་ལོ་བཅུ་བཞིར་སྒྲུབ་པ་མཛད། ཕྱག་རྒྱ་ཆེན་པོའི་རྟོགས་པ་མངོན་དུ་གྱུར། དེ་སྐབས་རླུང་ཟས་ལོ་གཅིག་མཛད་པས། ནམ་མཁའི་རླུང་ཟིན་རྟགས་སུ་བར་སྣང་ལ་སྐྱིལ་ཀྲུང་བཅའ་ནུས་པ་བྱུང་གསུང༌། གྲུབ་ཐོབ་ཀྱི་སྙན་པས་ཕྱོགས་ཀུན་ཁྱབ། རྒྱ་མ་ཁྲི་དཔོན་སོགས་མི་ཆེན་མང་པོས་ཞབས་ལ་གཏུགས། རྟོགས་ལྡན་གྱི་རྣལ་འབྱོར་པ་རྒྱུན་དུ་ཚོགས། ཕྲིན་ལས་བསམ་གྱིས་མི་ཁྱབ། སྒྲུབ་ཚུགས་འཛིན་ལུགས་འདི་ལྟ་བུ་དཀོན་ཞེས་རྒྱལ་བའི་དབང་པོ་ཉིད་ཤིན་ཏུ་དགྱེས་ནས་འདི་ཉིད་ལ་གནང་བའི་ཞལ་གདམས་ཀྱང་མང་ངོ༌། །