79925

རྡོ་རྗེ་འཛིན་པ་ཀུན་དགའ་སྙིང་པོ་ (1)

Part of speech

མིང་ཚིག

Definition

རྡོ་རྗེ་འཛིན་པ་ཀུན་དགའ་སྙིང་པོ་མཆོག་ནི། ཀུན་མཁྱེན་པདྨ་དཀར་པོའི་དངོས་སློབ་ཡིན། འཁྲུངས་ཡུལ་ཡར་སྟོད་ཤར། (ཀུན་མཁྱེན་ཆེན་པོའི་འཁྲུངས་ལོ་རབ་བྱུང་དགུ་པའི་མེ་ཕག་ ༡༥༢༧ ལོར་སྐུ་བལྟམས། )གཡའ་བཟང་ཁྲི་དཔོན་གྱི་སྐུ་ཚར་དུ་བལྟམས། དགུང་ལོ་བརྒྱད་ནས་ཐམས་ཅད་མཁྱེན་པའི་ཞབས་པད་བསྟེན། དཀར་བརྒྱུད་ཀྱི་གདམས་པ་མཐའ་དག་དང༌། ཁྱད་པར་བཀའ་འབུམ་རིན་པོ་ཆེའི་དབང་ལུང་གི་རྒྱུན་ཡོངས་སུ་རྫོགས་པ་གསན། སྐུ་སྲུང་པ་ཆེན་པོ་ཚེ་བདག་བཀྲ་ཤིས་པར། རྒྱལ་བའི་དབང་པོ་ཉིད་དང་དཔོན་སློབ་ལྷན་དུ་སྒྲུབ་ཕྲིན་མཐའ་དག་ཕྱག་ལེན་དང་བཅས་པ་དཔྱིས་ཕྱིན་པ་དང༌། རྗེ་བཙུན་མཐུ་ཆེན་དཔའ་བོ་ལའང་གཏུགས་ཏེ། བསྟན་སྲུང་ཆོས་སྐྱོང་གི་སྐོར་མ་ལུས་པ་ནོད། བཀའ་བབ་ཏུ་མངའ་གསོལ། བསྙེན་སྒྲུབ་མཐར་ཕྱིན། དྲག་སྔགས་ཀྱི་བདག་པོར་གྱུར་ཏེ། རྗེ་མཐུ་ཆེན་གཉིས་ཀྱི་གདན་ས་བཟུང༌། སྔགས་འཆང་སྐུ་རིམ་པ་ཀུན་གྱི་ཏོག་ཏུ་ཐོན། ལྷོ་རྒྱུད་ཀྱི་སྔགས་གྲྭའི་སློབ་དཔོན་དུ་བསྐོས་པས། སྔགས་གྲྭ་རྒྱུན་རིང་བསྐྱངས། སློབ་མ་གཞན་གྱིས་བླ་མར་འོས་པ་མང་དུ་བྱུང༌། དེ་ནས་གནས་ཆེན་ཙ་རི་ཏྲའི་རྡོ་རྗེ་འཛིན་པ་ཆེན་པོའི་གདན་སེང་གེའི་ཁྲིར་ཕེབས། སྒྲུབ་སྡེ་པདྨ་དཀར་པོ་སོགས་བསྐྱངས། ལྷོ་ཕྱོགས་ཆོས་ཀྱི་རྒྱལ་པོ་བྱ་པ་གོང་མ་སྐུ་མཆེད་སྲས་བཙུན་མོ་དང་བཅས་པའི་བླ་མར་གྱུར། རྗེ་ལྷ་རྩེ་བ་ངག་དབང་བཟང་པོ་སོགས་སྒར་པའི་གཞོན་རིམ་ཕལ་གྱིས་ཞབས་ལ་གཏུགས། ཕྲིན་ལས་མཁའ་ཁྱབ་པ་ཞིག་ཡིན་ནོ། །