8026

གནས་ཆུང་ཆོས་རྒྱལ་ཆེན་པོ་ (1)

Part of speech

མིང་ཚིག

Definition

བསམ་ཡས་གཙུག་ལག་ཁང་བཞེངས་ཟིན་རྗེས་ལྷ་ཁང་འདི་ཉིད་སྲུང་སྐྱོབ་བྱེད་མཁན་གྱི་སྲུང་མ་གཉན་པོ་ཞིག་སློབ་དཔོན་པདྨ་ལ་ཞུས་པས་སློབ་དཔོན་གྱིས་བོད་ཀྱི་ལྷ་སྲིན་སྡེ་བརྒྱད་མང་པོ་ཞིག་ལ་བཀའ་ཕབ་སྐབས་ཁོ་ཚོས། བྱང་ཕྱོགས་བྷ་ཏ་ཧོར་གྱི་སྒོམ་གྲྭ་ཟེར་བ་ན་དམུའི་རིགས་ལས་བྱུང་བའི་མི་མ་ཡིན་རྒྱལ་པོ་པེ་ཧར་ཟེར་བ་ཞིག་ཡོད་ཅིང༌། དེ་ནི་ནོར་རྒྱ་ཁབ་ཙམ་གྱི་རྗེས་ལ་བྱ་རྒོད་པོའི་ཉིན་ལམ་བཅོ་བརྒྱད་ཀྱི་བར་རྗེས་འདེད་བྱེད་ཐུབ་པ་ཞིག་ཡིན་པས་དེ་ལྷ་ཁང་འདིའི་སྲུང་མར་བསྐོས་ན་ཞེས་ཞུས། དེ་ནས་སློབ་དཔོན་གྱིས་མུ་ཏིག་བཙན་པོ་དཔུང་དང་བཅས་མངགས་ཏེ་བྷ་ཏ་ཧོར་གྱི་སྒོམ་གྲྭ་བཅོམ། རྒྱུ་ནོར་རིན་ཐང་ཆེ་བ་ཐམས་ཅད་བོད་དུ་དྲངས། དེ་དང་མཉམ་དུ་རྒྱལ་པོ་པེ་ཧར་ཡང་རྗེས་འབྲངས་བྱས་ཏེ་བོད་དུ་ཕེབས་པ་སློབ་དཔོན་པདྨས་དམ་ལ་བཏགས་ཏེ་བསམ་ཡས་གཙུག་ལག་ཁང་གི་སྲུང་མར་བསྐོས། གནས་ཆུང་ནི་དེའི་ལས་བྱེད་བློན་པོ་རྡོ་རྗེ་གྲགས་ལྡན་ཞེས་པ་དེ་ཡིན་ཅིང༌། ཐོག་མར་ལྷ་ས་ཚལ་གུང་ཐང་གི་སྲུང་མར་ཡོད་པ་ལ་བོད་ཀྱི་རབ་བྱུང་དགུ་པའི་མེ་རྟ་ཕྱི་ལོ་ ༡༥༤༦ ལ་ཚལ་གུང་ཐང་གི་གཙུག་ལག་ཁང་ལ་མེ་སྐྱོན་བྱུང་སྐབས་དགོན་པ་དེའི་མཁན་པོས་སྡུག་འདྲེ་ཁྱོད་ཀྱིས་དགོན་པ་འདི་ཙམ་ཡང་སྲུང་མི་ཐུབ་ན་ང་ཚོས་བསྟེན་མཆོད་བྱས་པར་དགོས་པ་མེད་ཟེར་ནས་གནས་ཆུང་བཀུག་ཐོག་ཕུག་རོན་གྱི་རོ་ཞིག་ལ་བསྟིམས་ནས་སྒམ་གྱི་ནང་བླུགས་ཏེ་ལྷ་ས་སྐྱིད་ཆུའི་ནང་དོར། དེ་སྐབས་འབྲས་སྤུངས་བདེ་ཡངས་གྲྭ་ཚང་གི་མཁན་པོ་ལྕོག་པ་བྱང་ཆུབ་དཔལ་བ་ཡིན་པས་ཁོང་གིས་ཉེ་གནས་ལ། དེ་རིང་འབྲས་སྤུངས་མདུན་གྱི་གཙང་པོའི་འགྲམ་དུ་བསྒུག་སྟེ་གཙང་ཆུའི་ནང་ནས་དངོས་པོ་བླུགས་པའི་སྒམ་ཆུང་ཞིག་ཁྱེར་ཡོང་བ་ཡོད་པས་དེ་ཁྱོད་ཀྱིས་ཁྱེར་ཤོག་གསུངས་པ། ཅི་བཞིན་བྱུང་པ་ཁོང་གིས་ཁྱེར་ནས་ཡོང་སྐབས་འབྲས་སྤུངས་དགོན་པའི་མདུན་གཤམ་ལ་སླེབས་ཚེ་ཁོའི་བསམས་པར། དེ་རིང་ངའི་བླ་མས་སྒམ་འདི་ཆེད་མངགས་ལེན་པར་བཏང་བ་འདིའི་ནང་རིན་ཐང་ཆེ་བའི་དངོས་པོ་ཇི་འདྲ་ཞིག་ཡོད་དམ་སྙམ་ནས་ཁ་ཕྱེ་བས་དེ་ཡི་ནང་ནས་ཕུག་རོན་ཞིག་འཕུར་སོང་བ་དང༌། དགོན་པའི་གཤམ་གྱི་སྦྱར་སྡོང་ཆེན་པོ་ཞིག་གི་རྩེར་བབས། དེའི་གནས་ཚུལ་བླ་མར་ཞུས་པས་བླ་མས་ཁྱོད་ཀྱིས་དེ་རིང་གོ་མ་ཆོད། སྒམ་ཆུང་དེ་ཁ་མ་ཕྱེ་པར་ངའི་མདུན་དུ་འཁྱེར་ཡོང་ན་སྲུང་མ་འདི་ཉིད་དགོན་པའི་ནང་དུ་གནས་རྒྱུ་ཡིན་པ་ལ་ཞེས་གསུངས་ནས་ཕུག་རོན་བབས་པའི་ཤིང་སྡོང་དེའི་འགྲམ་དུ་རྟེན་མཁར་ཆུང་ངུ་ཞིག་བརྩིགས། དེ་ནས་བཟུང་ཆོས་སྐྱོང་དེར་གནས་ཆུང་ཞེས་མིང་དུ་ཆགས་ཤིང་འབྲས་སྤུངས་དགོན་པའི་སྲུང་མར་གྱུར། ཏཱ་ལའི་བླ་མ་སྐུ་ཕྲེང་གཉིས་པ་ནས་བཟུང་སྐུ་ཕྲེང་རིམ་བྱོན་གྱི་སྲུང་མར་བསྟེན་ཅིང་། དགའ་ལྡན་ཕོ་བྲང་གི་སྲིད་གཞུང་ཚུགས་རྗེས་སྲིད་གཞུང་གིས་བསྟེན་གསོལ་བྱེད་པའི་སྲུང་མའི་གཙོ་བོར་གྱུར་ཏེ་སྡེ་སྲིད་སངས་རྒྱས་རྒྱ་མཚོས་གནས་ཆུང་གི་རྟེན་མཁར་ཆུང་ངུ་དེར་གཞི་བྱས་ནས་གནས་ཆུང་རྡོ་རྗེ་སྒྲ་དབྱངས་གླིང་ཞེས་པའི་དགོན་པ་དེ་བཏབ་པ་ཡིན།

{{#arraymap:གནས་ཆུང་ཆོས་རྒྱལ་ཆེན་པོ་

|; |@@@ | | }}