81109

རྣལ་འབྱོར་བླ་མེད་ཀྱི་རྒྱུད་ (1)

Part of speech	མིང་ཚིག
Definition	སྔགས། དུས་འཁོར་སྦྱོར་དྲུག རྣལ་འབྱོར་བླ་མེད་ཀྱི་རྒྱུད་ནི། བསམ་པ་གཞན་ཕན་བྱང་ཆུབ་ཀྱི་སེམས། སྤྱོད་པ་ཕར་ཕྱིན་བཅུ་དང་བསྡུ་བའི་དངོས་པོ་བཞི། ལྟ་བ་བདག་མེད་གཉིས། སྒོམ་པ་རྣམ་པར་མི་རྟོག་པ་སྟེ། མདོ་ལས་ཇི་སྐད་བཤད་པའི་ལམ་རྣམས་ཀྱི་སྟེང་དུ། དབང་གི་སྐབས། ཆུ་ཅོད་པན། རྡོ་རྗེ་དྲིལ་བུ། མིང་བརྟུལ་ཞུགས། རྡོ་རྗེ་སློབ་དཔོན་གྱི་དབང་། རྗེས་གནང་སོགས་མཐའ་རྟེན་རྣམས་དང་བཅས་པ་ཡོད་ཅིང། བུམ་དབང་། གསང་དབང་། ཤེར་དབང་། དབང་བཞི་པ་སྟེ། དབང་བཞི་རྫོགས་པ་དང་། མདུན་བསྐྱེད་ཀྱི་ལྷ་སྤྱན་དྲངས། མཆོད་པ་ཕུལ། སྔགས་བཟླས་པས་ཐུགས་རྒྱུད་བསྐུལ་བའི་བསྙེན་པ་དང་། ལས་ཚོགས་སྣ་ཚོགས་པ་དང་། ཐུན་མོང་གི་དངོས་གྲུབ་མང་དུ་སྒྲུབ་པའི་ཐབས་རྒྱ་ཆེར་བསྟན། ཉམས་ལེན་གྱི་སྐབས་ལམ་བསྐྱེད་རིམ་གྱིས་མ་དག་པའི་སྣང་བ་དབྱིངས་སུ་སྦྱངས་པའི་དཀྱིལ་འཁོར་གྱི་འཁོར་ལོ་རྫོགས་པར་སྒོམ། དབང་དང་བསྐྱེད་རིམ་གཉིས་ཀ་ལ། ཡར་སངས་རྒྱས་དང་རྣམ་པ་མཐུན་པའི་ལམ་དུ་བྱེད་ཚུལ་གཅིག་དང་། མར་འཁོར་བ་དང་རྣམ་པ་མཐུན་པའི་དྲི་མ་སྦྱོར་ཚུལ་གཅིག་སྟེ། སྦྱང་གཞི། སྦྱང་བྱ། སྦྱོང་བྱེད། སྦྱངས་འབྲས་ཞིབ་མོར་སྦྱོར། ཐུན་མཚམས་སུ་སྣང་བ་ཐམས་ཅད་ལྷར་སྒོམ། བདག་བསྐྱེད་ཀྱི་ལྷ་མི་གཤེགས། རྫོགས་རིམ་རྡོ་རྗེའི་ལུས་རྩ་རླུང་ཐིག་ལེ་ལ་གནད་དུ་བསྣུན་པའི་ཐབས་སྟོན། སྤྲོས་བཅས་སྤྲོས་མེད། ཤིན་ཏུ་སྤྲོས་མེད་ཀྱི་སྤྱོད་པ་གསུམ་སྤྱད་པས། འབྲས་བུ་ལ་སྦྱོར་བར་བཞེད། གཙང་རྨེ་མེད་པའི་སྤྱོད་པ་ཡང་བྱེད་དོ། །སྐྱེ་བ་སྔ་མར་བསགས་རྒྱབ་ཅན་མ་ཡིན་ཀྱང་། བསམ་པའི་སྟོབས་ཆེ་བ་གཅིག་གིས་འབད་པས་བསྒོམས་ན། ཚེ་ལོ་བརྒྱ་པའི་མིའི་ཚེ་གང་གཅིག་གི་ཡུན་ལ། ལམ་གཞན་ལ་མ་ལྟོས་པར་སངས་རྒྱས་ཀྱི་ས་ཐོབ་ནུས་ཏེ། དབང་པོ་རྣོ་ཞིང་བར་ཆད་མེད་པའི་དབང་དུ་བྱས་པ་ཡིན་ནོ། །
Domain	ཆོས་ལུགས།

རྣལ་འབྱོར་བླ་མེད་ཀྱི་རྒྱུད་ (2)

Part of speech

མིང་ཚིག

Definition

རྣལ་འབྱོར་བླ་མེད་རྒྱུད། རྗེ་བཙུན་ཏཱ་ར་ནཱ་ཐའི་རྒྱུད་སྡེའི་སྤྱི་རྣམ་ལས། (བྱ་སྤྱོད་རྣལ་འབྱོར་)དེ་གསུམ་ཆར་གྱི་ལྷའི་རྣལ་འབྱོར་ལ་བསྐྱེད་རིམ་གྱི་ཐ་སྙད་དོན་མཐུན་དུ་མི་འཇུག་པ་དང༌། སྦྱང་གཞིའི་རྣམ་པ་ལམ་དུ་བྱེད་པའི་ཚུལ་གྱིས་སྒོམ་པ་ཡང་མེད་དོ། །རྣལ་འབྱོར་བླ་ན་མེད་པར་ན་དེ་དག་ཀྱང་ཡོད་པ་དང༌། སྣང་བ་ཐམས་ཅད་ལྷར་སྒོམ་པ་དང༌། བདག་བསྐྱེད་ཀྱི་ལྷ་གནས་གཞན་དུ་གཤེགས་གསོལ་མི་མངའ་བ་སོགས་ཁྱད་པར་དུ་མས་འཕགས་པ་ཡིན་ནོ། །ཞེས་དང་། ཕྱི་ནང་མཉམ་པ་ཉིད་དུ་ཤེས་ཏེ། ནང་གི་རྣལ་འབྱོར་ཁོ་ན་ལ་སྤྱོད་པ་རྣལ་འབྱོར་བླ་ན་མེད་པའི་རྒྱུད་དེ། ཞེས་གསུངས་སོ། །