8197

གནས་རིགས་བཞི་བཅུ་ཞེ་གཅིག་ (1)

Part of speech	མིང་ཚིག
Definition	སྔགས། མ་ཧཱ་ཡོ་ག རྙིང་མ། གནས་རིགས་བཞི་བཅུ་ཞེ་གཅིག་ནི། ངན་སོང་གནས་བཅུ། མཐོ་རིས་གནས་བཅུ། གཟུགས་ཁམས་གནས་རིགས་བཅུ་བདུན། གཟུགས་མེད་སྐྱེ་མཆེད་མུ་བཞི་བཅས་བཞི་བཅུ་ཞེ་གཅིག་སྟེ། དཔལ་གསང་བ་སྙིང་པོའི་རྒྱུད་དོན་གསལ་བྱེད་མེ་ལོང་ལས། ཁམས་གསུམ་ལ་གནས་རིགས་བཞི་བཅུ་ཞེ་གཅིག་གོ ། དེ་ཡང་མས་རིམ་གྱིས་བགྲངས་ན། དམྱལ་བ་ལ་དམྱལ་ཁམས་བཅོ་བརྒྱད་ཡོད་ཀྱང་ཚ་དམྱལ་རེ་དང་གྲང་དམྱལ་རེ་ཐད་སོར་ཚེ་ཚད་དང་ལུས་ཚད་དང་སྡུག་བསྔལ་གྱི་ཚད་མཉམ་པས་གནས་རིས་རེ་རེར་བརྩི་ལ། ཉི་ཚེ་བ་དང་ཉེ་འཁོར་བའི་དམྱལ་བ་གཉིས་ནི་གནས་རིགས་རེ་རེ་ནའང་ཡོད་ཅིང་དེ་དང་དེའི་རིགས་སུ་གཏོགས་པས་ན་དམྱལ་བ་ལ་གནས་རིགས་བརྒྱད་དང་། ཡི་དྭགས་དང་དུད་འགྲོའི་གནས་རིགས་གཉིས་ཏེ། དེ་ལྟར་གནས་རིགས་བཅུ་ནི་ངན་སོང་གནས་བཅུ་ཞེས་བྱའོ། །གླིང་བཞིའི་མི་ནི་ཚེ་ཚད་དང་། ལུས་ཚད་དང་། བསོད་ནམས་ཀྱི་ཚད་མི་མཉམ་པས་ན་གནས་རིགས་སོ་སོར་བགྲང་ལ། རྒྱལ་ཆེན་རིགས་བཞི་ནི་ཚེ་ལུས་བསོད་ནམས་ཀྱི་ཚད་མཉམ་པས་གནས་རིགས་གཅིག་ཏུ་བརྩི་སྟེ། རྒྱལ་ཆེན་རིགས་བཞི་ནས་གཞན་འཕྲུལ་དབང་བྱེད་ཀྱི་བར་གྱི་འདོད་ལྷ་རིགས་དྲུག་ལ་གནས་རིགས་རེ་རེ་བརྩིས་པས་མི་དང་ལྷའི་གནས་རིགས་བཅུ་སྟེ། མཐོ་རིས་གནས་བཅུ་ཞེས་བྱའོ། །དེ་ལྟར་གནས་རིགས་ཉི་ཤུ་ནི་འདོད་པའི་ཁམས་ཡིན་ལ། བསམ་གཏན་བཞི་ལ་ལྷ་རིགས་གསུམ་གསུམ་སྟེ་བཅུ་གཉིས། གཙང་རིགས་ཀྱི་ལྷ་ལྔ་ནི་གནས་རིགས་རེ་རེ་སྟེ། གཟུགས་ཁམས་གནས་རིགས་བཅུ་བདུན་ཞེས་བྱའོ། །གཟུགས་མེད་ཀྱི་ཁམས་ལ་སྐྱེ་མཆེད་མུ་བཞི་སྟེ། གནས་རིགས་གང་དང་གང་དུ་ཤི་བ་དེ་དང་དེའི་གནས་སུ་སྐྱེ་བས་གནས་གཞན་ལོགས་པ་མེད་ཀྱང་ཚེ་དང་བསོད་ནམས་ཀྱི་ཚད་སྐྱེས་པའི་གནས་གང་ཡིན་དེ་དང་ཡང་མི་མཐུན་པས་གནས་རིགས་སོ་སོར་བརྩི་སྟེ། གཟུགས་མེད་སྐྱེ་མཆེད་མུ་བཞི་ཞེས་བྱའོ། །ཞེས་གསུངས།
Domain	ཆོས་ལུགས།

{{#arraymap:གནས་རིགས་བཞི་བཅུ་ཞེ་གཅིག་

|; |@@@ | | }}