8229

གནས་སྐབས་དོན་དམ་འཇོག་བྱེད་ཀྱི་ཚད་མ་ (1)

Part of speech	མིང་ཚིག
Definition	མདོ། དབུ་མ། མཚན་ཉིད་ནི། གནས་སྐབས་ཀྱི་དོན་དམ་པའི་བདེན་པ་ལ་མི་སླུ་བའི་རིག་པའོ། །ཡང་སྤྲོས་པ་ཀུན་བཟློག་པའི་རིགས་པས་གཞལ་ན། དེའི་མཚན་ཉིད་འདི་ལྟར། ལྷན་ཅིག་སྐྱེས་པའི་མ་རིག་པའི་དབང་གིས་གཟུང་འཛིན་གཉིས་སུ་སྣང་ཞིང་། གནས་ཚུལ་ལ་སེམས་པའི་རིགས་ཤེས་ཀྱི་དབང་གིས་དོན་དམ་པའི་གནས་ཚུལ་དང་མཐུན་པར་སྣང་བའོ། །དེ་དབྱེ་ན། གནས་སྐབས་ཀྱི་དོན་དམ་པའི་བདེན་པ་འཇོག་བྱེད་ཀྱི་མངོན་སུམ་ཚད་མ་དང་། རྗེས་དཔག་དང་། དཔེ་ཉེར་འཇལ་དང་། ལུང་ཚད་མ་དང་བཞིའོ། །མངོན་སུམ་གྱི་མཚན་ཉིད་ནི། རང་ཡུལ་གནས་སྐབས་ཀྱི་དོན་དམ་པའི་བདེན་པ་ལ་མི་སླུ་བའི་རྟོག་མེད་ཀྱི་ཤེས་པའོ། །མཚན་གཞི་ནི། ཐེག་དམན་འཕགས་པའི་མཉམ་བཞག་ཡེ་ཤེས་སོ། །མཉམ་བཞག་དེར་བདེན་སྟོང་མངོན་སུམ་དུ་རྟོགས་ཀྱང་སྤྲོས་བྲལ་མངོན་སུམ་དུ་མ་རྟོགས་པས་ན་མཐར་ཐུག་གི་དོན་དམ་བདེན་པ་འཇལ་བའི་མངོན་སུམ་དང་ཁྱད་པར་ཆེའོ། །རྗེས་དཔག་ལ་མཚན་ཉིད་ནི། གཞན་ལ་གྲགས་ཀྱི་གཏན་ཚིགས་ལ་བརྟེན་ནས་གནས་སྐབས་ཀྱི་དོན་དམ་པའི་བདེན་པ་ལ་མི་སླུ་བའི་རིག་པའོ། །མཚན་གཞི་ནི་བྱས་པའི་རྟགས་ལས་སྒྲ་མི་རྟག་པར་རྟོགས་པའི་རྗེས་དཔག་ལྟ་བུའམ། གཅིག་དང་དུ་བྲལ་གྱི་རྟགས་ལས་མྱུ་གུ་བདེན་མེད་དུ་རྟོགས་པའི་རྗེས་དཔག་ལྟ་བུའོ། །སྒྲ་མི་རྟག་པ་ཡང་རྟོག་གེ་ལས་སྐད་ཅིག་གིས་འཇིག་པས་ཁྱད་པར་དུ་བྱས་པའི་མ་ཡིན་དགག་ལ་བསམ་ནས། སྒྲུབ་པར་བཤད་པ་དེའི་ལྟར་ན། གནས་སྐབས་སུ་ཡང་ཀུན་རྫོབ་ཀྱི་བདེན་པ་ལས་མ་འདས་ཀྱང་། ལུང་ཆོས་ལས་དུས་གཉིས་པར་སྡོད་པ་བཀག་ཙམ་གྱིས་མེད་དགག་ལ་འཆད་པ་ལྟར་ན། གནས་སྐབས་ཀྱི་དོན་དམ་པའི་བདེན་པར་བཞག་གོ ། དཔེ་ཉེར་འཇལ་གྱི་ཚད་མ་ནི། རབ་རིབ་དང་བྲལ་བས་སྐྲ་ཤད་མ་མཐོང་བ་དཔེར་བྱས་ནས། དོན་དམ་བདེན་པའི་མཐོང་ཚུལ་ཤེས་དགོས་པར་གསུངས་པ་དང་། མདོ་ལས་རྨི་ལམ་ལྟ་བུའོ། །སྒྱུ་མ་ལྟ་བུའོ། །ཞེས་སྒྲུབ་བྱེད་གཏན་ཚིགས་བཀོད་པ་ལ་མ་ལྟོས་པར། ཤེས་བྱེད་ཀྱི་དཔེ་རྐྱང་པས་གནས་སྐབས་ཀྱི་དོན་དེ་དང་དེ་རྟོགས་པར་བཤད་པ་ལྟ་བུའོ། །ལུང་ཚད་མའི་མཚན་ཉིད་ནི། ཡིད་ཆེས་པའི་གཏན་ཚིགས་ཡང་དག་ལ་བརྟེན་ནས་དེ་ལ་མི་སླུ་བའི་རིག་པའོ། །མཚན་གཞི་ནི། ཤེར་ཕྱིན་གྱི་མདོ་ལས། སྤྲོས་བྲལ་དུ་གསུངས་པའི་རྟགས་ཀྱིས་ཆོས་ཐམས་ཅད་སྤྲོས་བྲལ་དུ་རྟོགས་པའི་རིག་པ་ལྟ་བུའོ། །ཞེས་པཎ་ཆེན་ཤཱཀ་མཆོག་གིས་དབུ་མ་རྣམ་ངེས་བང་མཛོད་ལས་གསུངས་སོ། ། མཁན་ཆེན་ངག་ཆོས་ཀྱིས་དབུ་མའི་སྤྱི་དོན་ལས། རྗེས་དཔག་ཚད་མ་ནི། གཞན་ལ་གྲགས་ཀྱི་རྗེས་དཔག་སོགས་དབུ་མའི་རིགས་པ་ལ་བརྟེན་ནས་སྣང་བ་བདེན་མེད་དུ་རྟོགས་པའི་རིག་ཤེས་ལྟ་བུའོ། །དཔེ་ཉེར་འཇལ་གྱི་ཚད་མ་ནི། སྒྱུ་མ་དང་སྨིག་རྒྱུ་སོགས་དཔེར་བྱས་ནས་སྣང་བའི་དངོས་པོ་ཐམས་ཅད་ཀྱང་མི་བདེན་པར་རྟོགས་པའི་བློ་ལྟ་བུའོ། །ལུང་ཚད་མ་ནི། ངེས་དོན་སྟོང་ཉིད་སྟོན་པའི་ལུང་ལ་བརྟེན་ནས་བརྗོད་བྱ་སྟོང་ཉིད་རྟོགས་པའི་ཤེས་རབ་ལྟ་བུའོ། །ཚད་མ་མཚན་ཉིད་པ་མ་ཡིན་ཏེ། རྗེས་དཔག་ཚད་མ་དང་ལུང་ཚད་མ་གཉིས་གཙོ་བོར་བསྟན་པ་དོོན་དམ་བདེན་པ་འཇལ་བྱེད་ཀྱི་ཚད་མ་དང་། དཔེ་ཉེར་འཇལ་གྱི་ཚད་མ་ནི་ཀུན་རྫོབ་སྣང་ཙམ་འཇལ་བྱེད་ཀྱི་ཚད་མ་ཡིན་པའི་ཕྱིར་རོ། །ཞེས་གསུངས་སོ། །
Domain	ཆོས་ལུགས།