82608

རྫས་བྱུང་གི་བསོད་ནམས་བདུན་ (1)

Part of speech	མིང་ཚིག
Definition	མདོ། མངོན་པ། ལུང་རྣམ་འབྱེད་ལས། བདུན་པོ་འདི་དག་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ཕན་ཡོན་ཆེ་བ་གཟི་བརྗིད་ཆེ་བ་རྒྱ་ཆེ་བ་ཡིན་ཏེ། དེ་དག་དང་ལྡན་པའི་དད་པའི་རིགས་ཀྱི་བུའམ། རིགས་ཀྱི་བུ་མོ་ནི་རྒྱུ་ཡང་རུང་འདུག་ཀྱང་རུང་ཉལ་ཡང་རུང་མི་ཉལ་ཡང་རུང་སྟེ་རྟག་ཏུ་རྒྱུན་མི་ཆད་པར་བསོད་ནམས་མངོན་པར་འཕེལ་བ་ཁོ་ནར་འགྱུར་རོ། །བདུན་གང་ཞེ་ན་འདི་ནི་དད་པའི་རིགས་ཀྱི་བུའམ་བུ་མོ་ཕྱོགས་བཞིའི་དགེ་སློང་གི་དགེ་འདུན་ལ་ཀུན་དགའ་རྭ་བ་འབུལ་བར་བྱེད་དེ། འདི་ནི་རྫས་ལས་བྱུང་བའི་བསོད་ནམས་བྱ་བའི་དངོས་པོ་འབྲས་བུ་ཆེ་བ་ཕན་ཡོན་ཆེ་བ་གཟི་བརྗིད་ཆེ་བ་རྒྱ་ཆེ་བ་དང་པོ་ཡིན་ཏེ། དེ་དང་ལྡན་པའི་དད་པའི་རིགས་ཀྱི་བུའམ་རིགས་ཀྱི་བུ་མོ་ནི་རྒྱུ་ཡང་རུང་འདུག་ཀྱང་རུང་ཉལ་ཡང་རུང་མི་ཉལ་ཡང་རུང་སྟེ་རྟག་ཏུ་རྒྱུན་མི་ཆད་པར་བསོད་ནམས་མངོན་པར་འཕེལ་བ་ཁོ་ནར་འགྱུར་ཞིང་བསོད་ནམས་ཉེ་བར་སྐྱེ་བ་ཁོ་ནར་འགྱུར་རོ་ཞེས་བྱ་བ་ནས་དེ་བཞིན་དུ་ཀུན་དགའི་རྭ་བ་དེ་ཉིད་དུ་གཙུག་ལག་ཁང་རྩིག་པ་དང་། མལ་ཆ་དང་སྟན་འབུལ་བ་དང་། འཚོ་བ་ནར་མ་འབུལ་བ་དང་། མགྲོན་བུ་གློ་བུར་དུ་འགྲོ་འོང་བྱེད་པ་ལ་སྦྱིན་པ་གཏོང་བ་དང་། ནད་པ་དང་ནད་གཡོག་ལ་སྦྱིན་པ་གཏོང་བ་དང་། རླུང་དང་ཆར་པ་ལ་སོགས་པ་ཡུལ་ངན་པའི་ཚེ་གཙུག་ལག་ཁང་གི་ནང་དུ་བསོད་སྙོམས་འབུལ་བ་ཞེས་བྱ་བ་དྲུག་ལའང་སྦྱར་ནས་རྒྱས་པར་གསུངས་སོ། །དེ་དག་ལ་མཁས་པ་དག་གིས། ཀུན་དགའ་རྭ་བ་གཙུག་ལག་ཁང་། །མལ་སྟན་ཚོར་བ་ནར་མ་དང་། །གློ་བུར་ནད་པ་ནད་གཡོག་དང་། །ཡུལ་ངན་ཚེ་ན་སྦྱིན་པ་ནི། །རྫས་ལས་བྱུང་བའི་བསོད་ནམས་བདུན། །ཞེས་སྡོམ་དུ་མཛད་དོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།