8457

གཙང་ཆུང་དགོན་ (1)

Part of speech

མིང་ཚིག

Definition

དགོན་འདི་ནི་གཙང་རྒྱལ་རྩེ། གཙང་འགས་གྲོང་ནས་ནུབ་བྱང་ཕྱོགས་སུ་ཆགས་ཡོད་ཅིང་། ཐོག་མར་གཙང་ཆུང་སྤྲུལ་སྐུ་སྐུ་ཕྲེང་དང་པོས་རྩ་བ་ཕུག་ཅེས་པའི་ས་ཆ་དེར་ཕྱག་བཏབ་པ་དང་། ཕྱིས་སུ་གཙང་ཆུང་སྐུ་ཕྲེང་གང་རུང་ཞིག་གིས་ད་ལྟའི་གནས་འདིར་སྤོ་གནང་མཛད། གཙང་ཆུང་སྤྲུལ་སྐུ་དཔལ་ལྡན་ངག་དབང་བསྟན་འཛིན་ཆོས་ཀྱི་རྒྱལ་པོ་མཆོག་ནི་འབྲུག་བདེ་ཆེན་ཆོས་འཁོར་དགོན་པར་སྐྱབས་རྗེ་ཆོས་མགོན་བརྒྱད་པ་མཐུ་སྟོབས་ཆོས་ཀྱི་རྒྱ་མཚོའི་ཞབས་པད་བསྟེན་ཅིང་། དབང་ལུང་ཁྲིད་གསུམ་རྫོགས་པར་ཞུས་ཐོག་བདེ་ཆོས་སྒྲུབ་ཁང་དུ་ལྟ་བ་ཕྱག་རྒྱ་ཆེན་པོ་དང་། སྒོམ་པ་ནཱ་རོའི་ཆོས་དྲུག་སོགས་སྒྲུབ་པ་ཉམས་ལེན་མཛད་དེ་ཡུན་རིང་བཞུགས། ཕྱིས་རང་དགོན་དུ་བྱོན་ཁར་དུས་རྐྱེན་དབང་གིས་བླ་གྲྭ་གཞན་ལྟར་སེར་ཁྱིམ་པར་གྱུར་འདུག། བོད་དུ་སྤྱི་ཚོགས་ལྷིང་འཇགས་དང་ཆོས་ལུགས་ཀྱི་བྱེད་སྒོ་ཁག་སྤེལ་ཆོག་པའི་སྲིད་ཇུས་མགོ་ཚུགས་པར་བརྟེན། སླར་ཡང་ཕྱི་ལོ་ ༡༩༨༣ ལོ་ཙམ་དུ་དགོན་ཤུལ་དེ་གར་རིན་པོ་ཆེ་མཆོག་ནས། འདུ་ཁང་ཀ་བ་དྲུག་དང་། སྒོ་འཕྱོར་ཀ་བ་གཉིས། རུང་ཁང་ཀ་བ་གཉིས། གཟིམ་ཆུང་ཀ་བ་གཅིག གཉེར་ཚང་ཀ་བ་གཉིས། མགོན་ཁང་ཀ་བ་གཅིག གྲྭ་ཤག་བཞི་བཅས་བསྐྱར་བཞེངས་གནང་སྟེ་བཙུན་མ་ལྔ་ཙམ་གསོ་སྐྱོང་གནང་། སླར་བདེ་ཕུ་དགོན་ཡང་བསྐྱར་བཞེངས་གནང་བ་སོགས་བསྟན་ལ་སྨན་པའི་ཕྱག་ལས་མང་དུ་བསྒྲུབས། རིན་པོ་ཆེ་མཆོག་དགུང་ལོ་བཞི་བཅུ་ཞེ་ལྔ་ཕྱི་ལོ་ ༡༩༨༧ ལོར་དགོངས་པ་རྫོགས། སྐུ་གདུང་ཞུགས་འབུལ་སོགས་གསང་གླིང་རིན་པོ་ཆེས་གནང་སྟེ། སྐུ་གདུང་མཆོད་རྟེན་དགོན་པའི་ཉེ་འགྲམ་དུ་བཞེངས་པ་ད་ལྟ་མཇལ་རྒྱུ་ཡོད། ཕྱིས་དགོན་འདིའི་འགན་འཁུར་བ་ཡག་པོ་མ་བྱུང་སྟབས་བཙུན་མ་རྣམས་ཀྱང་རང་རང་ཕྱོགས་ཁག་ཏུ་སོང་སྟེ་ད་ལྟ་དགོན་པར་ཡོན་ཆབ་ཙམ་ཡང་འབུལ་མཁན་མེད་པར་ཡིད་སྐྱོ་བའི་གནས་སུ་གྱུར་ཡོད། མ་དགོན་འབྲུག་བདེ་ཆེན་ཆོས་འཁོར་གླིང་ཡིན་ནོ། །