8466

གཙང་ནག་པ་བརྩོན་འགྲུས་སེང་གེ་ (1)

Part of speech

མིང་ཚིག

Definition

དུས་རབས་བཅུ་གཉིས་པའི་སྟོད་དུ་འཁྲུངས། དགེ་བའི་བཤེས་གཉེན་མང་པོ་བསྟེན། མདོ་སྔགས་རིག་གནས་དང་བཅས་པར་སྦྱངས། ལྷག་པར་དུ་ཕྱཱ་བ་ཆོས་ཀྱི་སེང་གེ་ལ་བསྟེན་ནས་ཚད་མ་དང་དབུ་མ་སོགས་ལ་སྦྱངས། རྗེ་བཙུན་འཇམ་པའི་དབྱངས་ཀྱི་བསྙེན་པ་མང་དུ་བཟླས། བློ་རྣོ་ཞིང་རིགས་ལམ་ལ་ཤིན་ཏུ་བྱང་བས་སེང་ཆེན་བརྒྱད་ལས་དང་པོ་ཡིན། ཕྱཱ་བ་ཆོས་ཀྱི་སེང་གེས་སློབ་དཔོན་ཟླ་བ་གྲགས་པའི་གཞུང་ལ་དགག་པ་མང་དུ་མཛད་ཀྱང་། ཁོང་གིས་དཔལ་ལྡན་ཟླ་བ་གྲགས་པའི་གཞུང་ལུགས་ལ། སྦྱངས་པའི་སྟོབས་ཀྱིས་གཞུང་དོན་ངེས་གྱུར་པ། ང་འདྲའི་སྐྱེ་བོ་སླན་ཆད་འབྱུང་མི་འགྱུར། ཞེས་གསུངས་ནས་གཙིགས་སུ་འཛིན། དབུ་མའི་བསྡུས་པའང་ཆེ་ཕྲ་མང་དུ་མཛད་པ་རྣམས་ཟླ་བ་གྲགས་པའི་ལུགས་ཡིན། ཚད་མ་རྣམ་ངེས་ཀྱི་འགྲེལ་ཆེན་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྦྱོར་དང་། བསླབ་བཏུས། སྤྱོད་འཇུག དབུ་མའི་བསྟན་བཅོས་རྣམས་ལའང་རྣམ་བཤད་མང་དུ་བརྩམས། །