84690

ལུང་གཞན་གྱིས་མི་གནོད་པའི་ཚུལ་ (1)

Part of speech	མིང་ཚིག
Definition	གལ་ཏེ་གྲུབ་མཐའ་ཁས་ལེན་ཡང་། །གཞུང་ནས་བཤད་པའི་གྲུབ་མཐའ་ཀུན། །རྩོད་པའི་སྐབས་སུ་བླང་མི་དགོས། །རྩོད་པའི་སྐབས་ཀྱི་གྲུབ་མཐའ་ཉིད། །སྒྲུབ་པ་མཁས་པ་རྣམས་ཀྱི་ལུགས། །དཔེར་ན་ཕྱི་རོལ་དོན་སྒྲུབ་ཚེ། །རྣམ་རིག་གཞུང་གིས་འདིར་མི་གནོད། །དེ་བཞིན་གྲུབ་མཐའ་ཀུན་ལ་སྦྱར། །སངས་རྒྱས་པའི་གྲུབ་མཐའ་ཁས་བླངས་ནས་རྩོད་ཀྱང་མུ་སྟེགས་བྱེད་སུན་འབྱིན་པའི་སྐབས་སུ་མདོ་སྡེ་པ་ལྟར་ཕྱི་རོལ་གྱི་དོན་ཁས་བླངས་ནས་རྩོད་མོད་ཀྱི། ཁྱེད་རང་གི་གཞུང་ལ་སྣང་བ་སེམས་སུ་བཤད་པ་དང་འགལ་ལོ་ཞེས་བརྩད་པས་མི་གནོད། དེ་བཞིན་དུ་སེམས་ཙམ་ཁས་ལེན་པའི་སྐབས་སུ་མདོ་ལས་ཕྱི་རོལ་གྱི་དོན་གསུངས་པའི་ཁྱེད་རང་གི་དམ་བཅའ་འགྱུར་རོ་ཞེས་བྱ་བ་དང་། དབུ་མ་རྩོད་པ་ན་རྣམ་རིག་ཀྱང་ཁྱེད་རང་གི་མདོ་ཡིན་པས་དམ་བཅར་འགྱུར་རོ་ཞེས་བྱ་བ་དང་། དེ་བཞིན་དུ་མུ་སྟེགས་བྱེད་ནང་ལ་ཡང་བྱེ་བྲག་པ་ལ་གྲངས་ཅན་པས་སྒྲ་མི་རྟག་པའི་སྒྲུབ་བྱེད་བརྗོད་པ་ན་རང་གི་གཞུང་ལས་སྒྲ་ནམ་མཁའི་ཡོན་ཏན་ཡང་དམ་བཅར་འགྱུར་བས་དེ་དང་འགལ་བ་ཡང་དམ་བཅའ་དང་འགལ་བ་ཡིན་ནོ་ཞེས་བྱ་བའི་སྐྱོན་གྱིས་མི་གནོད་དེ། གྲུབ་མཐའ་ཁས་ལེན་དུ་ཟིན་ཡང་། རང་ཉིད་འདོད་པའི་སྐབས་ཀྱི་དོན་དེ་ཉིད་དམ་བཅར་འགྱུར་གྱི་དོགས་པ་ཐ་དད་ལ་དགོངས་པའི་དོན་ཐམས་ཅད་དམ་བཅར་ཁས་མི་ལེན་པའི་ཕྱིར་རོ། །ཞེས་འཇམ་མགོན་ས་པཎ་གྱི་མཁས་འཇུག་ལས་སོ། །
Domain	ཚད་མ།