85035

ལུས་མངོན་བྱེད་ (1)

Part of speech	མིང་ཚིག
Definition	ལུས་མངོན་བྱེད་ཀྱི་མཚན་ཉིད། ཕྱིར་མི་འོང་འབྲས་གནས་གང་ཞིག་འགོག་པའི་སྙོམས་འཇུག་ཐོབ་པའོ། །དབྱེ་བ་ལ། མཐོང་ལམ་ཐོབ་པའི་ལུས་རྟེན་མ་དོར་བ་དང་། དོར་བ་གཉིས། དང་པོ་ནི། འདོད་པའི་རྟེན་དུ་ངེས་སོ། །ཕྱི་མ་ལ་གཟུགས་ཀྱི་རྟེན་ཅན་དང་། གཟུགས་མེད་ཀྱི་རྟེན་ཅན་གཉིས་ཡོད་དེ། འདོད་པའི་རྟེན་ལ་འགོག་སྙོམས་ཐོབ་པ་གཟུགས་ཀྱི་ཆགས་བྲལ་ལས་ཉམས་ནས་གཟུགས་སུ་སྐྱེ་བ་ལེན་པ་ཡོད་པར་འགོག་སྙོམས་ཀྱི་སྐབས་སུ་བཤད་ཅིང་། དེ་ཉིད་སླར་ཡང་གཟུགས་མེད་དུ་སྐྱེ་བ་གཅིག་ཀྱང་ཁས་ལེན་དགོས་པ་འདྲའོ། །དེ་མིན་པའི་དབང་དུ་བྱས་ན་ཡང་གཟུགས་མེད་ཀྱི་རྟེན་ཅན་ནི་ངེས་པར་ཡོད་དེ། འདོད་པའི་རྟེན་ཅན་གྱི་ལུས་མངོན་བྱེད་དེས་ཅི་ཡང་མེད་མན་ཆད་ཀྱི་ཆགས་བྲལ་ལས་མ་ཉམས་བཞིན་དུ་འཆི་འཕོ་བ་སྲིད་རྩེར་སྐྱེ་བ་ལས་འོས་མེད་པའི་ཕྱིར་རོ། །དེས་ན་མཛོད་ལས། གཟུགས་སུ་ཉེར་འགྲོ་དང་། གཟུགས་མེད་ཉེར་འགྲོ་དང་། མཐོང་ཆོས་ཞི་དང་། ཚེ་ཡོངས་གྱུར་དང་། ལུས་མངོན་བྱེད་རྣམས་གོ་རིམ་བཞིན་བཤད་པ་ནི་དང་པོ་གསུམ་མཐོང་ལམ་ཐོབ་པའི་ལུས་རྟེན་མ་དོར་བ་དང་། བཞི་པ་མཐོང་ལམ་ཐོབ་པའི་ལུས་རྟེན་དོར་བ་དང་། ལྔ་པ་ལ་གཉིས་ཀ་ཡོད་པའི་དབང་དུ་བྱས་ནས་གསུངས་པ་ཡིན་པས་བསྟན་བཅོས་ཆེན་པོའི་གོང་འོག་གི་བབ་འདི་བཞིན་དུ་སྨྲ་བའི་རྗེས་སུ་འབྲང་བར་རིགས་སོ་ཞེས་ཀུན་མཁྱེན་གོ་རམས་པའི་སྐྱེས་བུ་མཆོག་གི་གསལ་བྱེད་ལས་སོ། ། འགོག་པ་ཐོབ་པའི་ཕྱིར་མི་འོང་བ་ནི་མྱ་ངན་ལས་འདས་པ་དང་འདྲ་བའི་སེམས་ཞི་བ་མངོན་དུ་བྱེད་ནུས་པའི་ཕྱིར་ལུས་ཀྱིས་མངོན་སུམ་དུ་བྱེད་པ་ཞེས་བྱ་བར་འདོད་དེ། འགོག་པ་ལ་སྙོམས་པར་ཞུགས་པ་ན་སེམས་མེད་པས་ལུས་ལ་བརྟེན་ནས་སྐྱེ་བའི་ཕྱིར་ལུས་ཀྱིས་མངོན་སུམ་དུ་བྱེད་པའོ། །སློབ་དཔོན་ནི་འགོག་པ་ལ་སྙོམས་པར་ཞུགས་པའི་དུས་ན་དེ་དང་མཐུན་པའི་ལུས་ཀྱིས་འགོག་པ་ཐོབ་པ་མངོན་སུམ་དུ་བྱེད་པའི་ཕྱིར་དང་། དེ་ལས་ལངས་པ་ན་རྣམ་ཤེས་དང་བཅས་པའི་ལུས་ཞི་བ་ཐོབ་པས་ཀྱེ་མ་འགོག་པའི་སྙོམས་འཇུག་ནི་མྱང་འདས་དང་འདྲ་བར་ཞི་བ་ཡིན་ནོ་སྙམ་དུ་ལངས་པའི་སེམས་ཀྱིས་དེ་སོ་སོར་ཡང་དག་པར་མྱོང་བའི་ཤེས་པས་མངོན་སུམ་དུ་བྱེད་པས་ན་ལུས་ཀྱིས་མངོན་སུམ་དུ་བྱེད་པ་ཞེས་བྱའོ་ཞེས་བཞེད་དོ། །འོ་ན་ཅིའི་ཕྱིར་མདོ་ལས་སློབ་པ་བཅོ་བརྒྱད་ཅེས་གསུངས་པ་དེར་ལུས་ཀྱིས་མངོན་སུམ་དུ་བྱེད་པ་མ་གསུངས་ཤེ་ན། སློབ་པར་འཇོག་པའི་རྒྱུ་ཟག་མེད་ཀྱི་བསླབ་པ་གསུམ་དང་དེའི་འབྲས་བུ་བྲལ་བའི་རང་བཞིན་ཡིན་པ་ལ་འགོག་པའི་སྙོམས་འཇུག་ནི་སྤོང་ལམ་གྱི་རང་བཞིན་མ་ཡིན་པས་སློབ་པའང་མ་ཡིན་ལ། བྲལ་བའི་རང་བཞིན་སོ་སོར་བརྟགས་འགོག་མ་ཡིན་པས་སློབ་པའི་འབྲས་བུའང་མ་ཡིན་པའི་ཕྱིར་རོ་ཞེས་མཛོད་འགྲེལ་མངོན་པའི་རྒྱན་ལས་སོ། །
Domain	ཆོས་ལུགས།