85562

ལོ་རི་བདུན་པ་མི་ཕམ་ངག་གི་དབང་ཕྱུག་ (1)

Part of speech

མིང་ཚིག

Definition

རྗེ་ལོ་རི་བདུན་པའི་འཁྲུངས་ཡུལ། སྒ་ཁྲི་འདུ། མོ་ལོ་གྲོང་དུ། ཡབ་གཙང་པ་བཀྲ་ཤིས་དཔལ་འབར་དང༌། ཡུམ་ཚེ་རིང་ལྷ་སྒྲོན་གཉིས་ཀྱི་སྲས་སུ། རབ་བྱུང་བཅོ་ལྔ་པའི་ཆུ་གླང་ ༡༩༡༣ ལོར་འཁྲུངས། ཆུང་ངུའི་དུས་རྟག་ཏུ་ཁམས་མི་བདེ་བས། ཏྲེ་ཧོར་ཆོས་རྗེ་རིན་པོ་ཆེ་ལ་གང་དྲག་ཞུས་པས། ཁྱོད་ཚོ་ཕྱུག་པོའི་བུ་རྒྱུད་གྲྭ་པ་ནི་བྱེད་པ་མ་རེད། ད་འཆི་རྒྱུ་རེད་གསུངས་ནས་སྐུ་རིམ་གང་ཡང་མ་གསུངས། དེ་ནས་རོང་ཐ་པཎྜི་ཏ་བློ་བཟང་དམ་ཆོས་རྒྱ་མཚོ་ལ་གང་དྲག་ནན་ཏན་དུ་ཞུས་པས། རྣམ་རྒྱལ་སྟོང་མཆོད་རྒྱས་པ་ཕུལ་ནས། མིང་ལ་རྣམ་རྒྱལ་ཚེ་སྲུང་གནང་ཞིང༌། གྲྭ་པ་བྱས་ན་འཆི་མི་འོང་གསུངས་པ་བཞིན། དགེ་སློང་གཞན་ཕན་ཟླ་བ་ལ་གཙུག་ཕུད་ཕུལ་བས་སྙུང་གཞི་ཇེ་དྭངས་སུ་གྱུར། ཀློག་ཡིག་བརྡ་བསྟན་པ་ཙམ་གྱིས་ཚེགས་མེད་པར་ཤེས། དགུང་གྲངས་ལྔ་པར། ཀརྨ་པ་མཁའ་ཁྱབ་རྡོ་རྗེས་ཡུལ་དང་ཡབ་ཡུམ་གྱི་མཚན་ཟུར་ཙམ་གསུངས་ནས་ལུང་བསྟན་གནང༌། ཁྱད་པར་རྗེ་འཛི་སྒར་བདུན་པས་གང་མགྱོགས་གསེར་ཁྲིར་མངའ་གསོལ་དགོས་པའི་ཞལ་བཀོད་བཀའ་ཤོག་བཅས། མཚན་མི་ཕམ་ངག་དབང་ཆོས་ཀྱི་དབང་ཕྱུག་ཕྲིན་ལས་དཔལ་བཟང་པོ་ཞེས་བསྩལ། ཇི་ལྟར་བཀའ་སྩལ་པ་ལྟར་དགུ་ལོ་བརྒྱད་པར་གདན་སར་མངའ་གསོལ་མཛད། དེ་ནས་རིམ་བཞིན་ལབ་མཁན་ཆེན་ལས་དགེ་ཚུལ་དང༌། འབྲུ་འཇམ་དབྱངས་གྲགས་པ་ལས་བསྙེན་རྫོགས་བསྒྲུབས་ཤིང༌། རྗེ་དེ་ལས་བླ་མ་ཡང་ཏིག་གི་སྨིན་གྲོལ་བཅས་བཀའ་ཆོས་མང་པོ་གསན། ཉེར་ལྔ་ལ་དབུས་ཕྱོགས་སུ་ཕེབས་ཏེ། ཙ་རི་དང་གངས་རི་སོགས་གནས་ཆེན་ཕལ་ཆེར་ཞབས་ཀྱིས་བཅགས། འབྲུག་ཡུལ་དུ་ཕེབས། དེར་རྒྱལ་བློན་རྣམས་ཀྱི་དབུའི་མཆོད་གནས་སུ་ལོ་ཤས་བཞུགས། སླར་བོད་དུ་བྱོན། གདན་ས་སེ་ར་ཐེག་ཆེན་གླིང་དུ་ལོ་མང་པོའི་རིང་མཚན་ཉིད་རིག་པའི་གཞུང་ལ་ཐོས་བསམ་མཛད། གདན་ས་གསུམ་དུ་ས་འདུའི་སྐུ་ཞབས་ཞེས་མཁས་པའི་སྙན་གྲགས་རྒྱས། ཞེ་གཅིག་པར་སླར་རང་དགོན་དུ་ཕེབས། སྡེ་དགོན་ཡོངས་ལ་ཆོས་ཀྱི་འཁོར་ལོ་བསྐོར། དེ་ནས་རབ་བྱུང་བཅུ་དྲུག་པའི་ཤིང་ལུག་ ༡༩༥༥ ལོར། ཨ་གྲགས་སྤྲུལ་སྐུ་ཡོན་ཏན་རབ་རྒྱས་དང་ཁོང་རྣམ་གཉིས་དགོངས་པ་གཅིག་མཐུན་གྱིས། སྔར་གྱི་དགོན་གནས་ནས་སྟག་ཉིན་མདར་དགོན་ས་གསར་དུ་སྤོས་ཏེ། བླ་བྲང་དང་མགོན་ཁང་སོགས་གསར་དུ་བཞེངས་བཞིན་པའི་སྐབས། ས་ཁྱི་ ༡༩༥༨ ལོའི་རྒྱ་དམར་གྱི་དུས་ཟིང་དང་ཁེལ་ནས་བོད་ཀྱི་དགོན་སྡེ་སྤྱི་མཚུངས་ལྟར་མིང་གི་ལྷག་མ་ཙམ་དུ་གྱུར། ཁོང་ཡང་མི་དམངས་ཀུང་ཧྲེ་ཟེར་བའི་ལས་འགུལ་ནང་ཞུགས་དགོས་བྱུང་སྟེ། ས་རྐོ་རྡོ་སློག་དང༌། ཕྱུགས་འཚོ་བ་སོགས་འོ་བརྒྱལ་ཚད་མེད་མྱངས་པའི་མཐར་དགུང་ལོ་ང་ལྔ་པ་མེ་ལུག་ ༡༩༦༧ ལོར་རོང་པོ་སྡེ་བའི་ནང་གཤེགས་སོ། །