85877

ལྐོག་གྱུར་ངེས་པའི་གཞན་སེལ་ (1)

Part of speech	མིང་ཚིག
Definition	རློམ་ཚོད་ཀྱི་གཞལ་བྱ་རང་མཚན་འཛིན་པའི་རྟོག་པའི་ཡུལ་དུ་སོང་ཚོད་དེ་ལྐོག་གྱུར་ངེས་པའི་གཞན་སེལ་གྱི་མཚན་ཉིད། སྤྱིར་གཞལ་བྱ་ལྐོག་གྱུར་འཛིན་པའི་རྟོག་པའི་ཡུལ་དུ་སོང་བ་ཙམ་གྱི་མི་ཆོག་སྟེ། འདི་ཡོད་པ་གཞན་སེལ་གྱི་དབྱེ་བ་འཆད་པའི་སྐབས་ཡིན་པའི་ཕྱིར། དབྱེ་ན། བདེན་པ་ལ་འཇུག་པ་རྗེས་དཔག་གི་གཞན་སེལ། རྫུན་པ་ལ་འཇུག་པ་ལོག་ཤེས་ཀྱི་གཞན་སེལ། མཐའ་གཉིས་ལ་འཇུག་པ་ཐེ་ཚོམ་གྱི་གཞན་སེལ་དང་གསུམ་མོ། །འདིར་གསུམ་དུ་ཕྱེ་བའི་དགོས་པ་ནི། རིགས་པ་མཁྱེན་པས་སེལ་འཇུག་གི་མཚན་ཉིད་འཆད་པ་ན། གཞན་གྱི་ཆ་སྒྲོ་མ་བཏགས་པ། །ཞེས་དང་། ཆ་ཤས་སྒྲོ་འདོགས་ཇི་སྙེད་པ། །ཞེས་བསལ་བྱ་སྒྲོ་འདོགས་བསལ་བའི་ཚུལ་གྱི་འཇུག་པ་ལ། དེའི་དོན་དུ་བཤད་པས་རྟོག་པ་ལོག་ཤེས་དང་ཐེ་ཚོམ་གཉིས་སེལ་འཇུག་མིན་ནམ་སྙམ་པའི་ལོག་པར་རྟོག་པ་སྐྱེ་སྲིད་པས་དེ་བསལ་བའི་ཕྱིར་དུའོ། །ཞེས་པཎ་ཆེན་ཤཱཀ་མཆོག་གི་རྟོག་གེ་འཁྲུལ་འཇོམས་ལས་སོ། ། ལྐོག་གྱུར་ལ་ངེས་པའི་གཞན་སེལ་གྱི་མཚན་ཉིད་ནི། མངོན་སུམ་གྱིས་དོན་རང་མཚན་མཐོང་བ་ལ་མ་ལྟོས་པར་སྒྲ་རྟོག་གི་དངོས་ཡུལ་དུ་གྱུར་པ་སྟེ། དབྱེ་ན་བདེན་པ་རྗེས་དཔག་གི་གཞན་སེལ། མི་བདེན་པ་ལོག་ཤེས་ཀྱི་གཞན་སེལ། གཉིས་ཆར་དོགས་པ་ཐེ་ཚོམ་གྱི་གཞན་སེལ་དང་གསུམ་མོ། །ཞེས་ཀུན་མཁྱེན་གོ་རམས་པའི་རིགས་གཏེར་གསལ་བྱེད་ལས་སོ། །
Domain	ཚད་མ།