867

ཀླ་ཀློོའི་བྱེད་རྩིས་ཀྱི་རྩིས་འགོ་ (1)

Part of speech	མིང་ཚིག
Definition	ཀླ་ཀློ་ཞེས་བྱ་བའི་ཆོས་ལུགས་ཀྱི་སྐར་རྩིས་ཀྱི་ལོ་འགོ་སྟེ། མེ་མཁའ་རྒྱ་མཚོའི་འདས་ལོའི་ཐོག་མའི་སྔར་ལོ་ཆུ་མོ་ལུག་གམ་ཕྱི་ལོ་༦༢༣ པའི་ལོར་བྱུང་བར་འདོད་ལ། རྩིས་གཞུང་ཉིན་བྱེད་སྣང་བ་ལས། ཤིང་སྤྲེར་སྦྲང་རྩིའི་བློ་གྲོས་ནི། །མ་ཁར་ཞུགས་ཤིང་མུ་སྟེགས་པའི། །བྱེད་རྩིས་བྱུང་དང་དུས་མཉམ་པར། །རྒྱ་མཚོ་རྣམ་རྒྱལ་ཁྲིར་ཕེབས་ཏེ། །ལོ་བརྒྱ་གྱ་གཉིས་བར་དུ་བཞུགས། །ཞེས་དང་། དེའི་རྣམ་འགྲེལ་གསེར་ཤིང་ལས། ཀླ་ཀློ་དེའི་ཆོས་ལ་མུ་སྟེགས་པ་རྣམས་ཀྱང་ཞུགས་པའི་དབང་གིས་དུས་དེར་ཕྲག་དོག་གི་བསམ་པས་གཞན་གྱིས་མི་ཤེས་པར་བྱ་བའི་ཕྱིར་སྐར་རྩིས་ཀྱི་གྲུབ་པའི་མཐའ་སྦས་ཏེ། ཉུང་ངུའི་བྱེད་པ་ཞེས་བྱ་བའི་རྩིས་རེ་ཞིག་གི་བར་གཟའ་སྐར་གྱི་འགྲོས་སོགས་རྟོགས་པར་སླ་ལ་ལག་ལེན་བྱེད་བདེ་ཡང་། མ་འོངས་པ་ན་གཟའ་སྐར་གྱི་འགྲོས་མི་ཤེས་པའི་རྩིས་ཀྱི་གྲུབ་པའི་མཐའ་སྦས་པ་ཞིག་བརྩམས་པས། སྐར་མཁན་མཐའ་དག་རང་གི་ལུགས་དོར་ནས་ཚམ་ཚོམ་མེད་པར་དེ་ལ་འཇུག་པས་ཆུ་བོ་ཤཱི་ཏའི་ལྷོར་མུ་སྟེགས་པའི་གྲུབ་པའི་མཐའ་བཞི་ཉམས་པར་བྱས་པ་སྟེ། རྒྱུད་ལས། དེ་ནས་ཀླུ་ཡི་ལོ་བརྒྱ་རྣམས་ཀྱི་ངེས་པར་མ་ཁའི་ཡུལ་དུ་ཀླ་ཀློའི་ཆོས་དག་རབ་ཏུ་འཇུག ། དེ་ཡི་དུས་སུ་འཛིན་མ་ལ་ནི་ཉུང་ངུའི་བྱེད་པ་གསལ་བར་མི་རྣམས་དག་གིས་རིག་པར་བྱ། །མཐའ་དག་ས་གཞི་ལ་ནི་གྲུབ་པའི་མཐའ་རྣམས་རྣམ་པར་ཉམས་པ་དུས་ཀྱི་སྦྱོར་བ་ལ་འབྱུང་འགྱུར། །ཞེས་སོ། །ཞེས་བྱུང་།
Domain	རྩིས་རིག