87870

ལྷག་བཅས་ལྷག་མེད་ཀྱི་མྱང་འདས་ (1)

Part of speech	མིང་ཚིག
Definition	སྤྱིར་ཀུན་འབྱུང་དང་སྡུག་བསྔལ་སྤངས་པས་རབ་ཏུ་ཕྱེ་བས་ཀུན་འབྱུང་སྤོང་ལ་སྡུག་བསྔལ་གྱི་ལྷག་མ་ལུས་པ་དང་། མ་ལུས་པའོ། །འོ་ན། སྡུག་བསྔལ་ཀུན་འབྱུང་འཇིག་རྟེན་དང་། །ཞེས་དེ་གཉིས་ཁྱབ་མཉམ་པར་བཤད་པ་ཅི་ལྟ་བུ་ཞེ་ན། དེ་ནི་བྱེ་བྲག་ཏུ་སྨྲ་བས་ཐམས་ཅད་དུ་མཉམ་པ་དང་། མདོ་སྡེ་པ་དང་། སེམས་ཙམ་པ་དགྲ་བཅོམ་པའི་ཕུང་པོ་ཐ་མ་སྡུག་བསྔལ་ཡིན་ལ་ཀུན་འབྱུང་མ་ཡིན་པ་དང་། བསྡུ་བར། དགྲ་བཅོམ་པའི་ཕུང་པོ་རིལ་པོ་ཀུན་འབྱུང་མ་ཡིན་པར་བཤད་པར་གསུམ་ཡོད་ཀྱང་། འདིར་ནི་ཀུན་འབྱུང་གི་གཙོ་བོ་ལས་དང་ཉོན་མོངས་པ་སྤངས་ལ། སྡུག་བསྔལ་གྱི་གཙོ་བོ་རྣམ་སྨིན་གྱི་ཕུང་པོ་མ་ལོག་པ་སྟེ། མདོར་ན་སྐུ་ཚེའི་འདུ་བྱེད་མ་བཏང་བ་དང་། བཏང་བའི་སོ་སོར་བརྟགས་འགོག་གོ ། རྟེན་གྱི་སྒོ་ནས་བྱེ་བྲག་ཏུ་བཤད་པ་ནི། བྱང་ཆུབ་གསུམ་ལས། ཉན་ཐོས་དགྲ་བཅོམ་པ་ནི་ཁམས་གསུམ་པའི་རྟེན་ཅན་ཏེ། དེ་ལ་འདོད་པའི་རྟེན་ཅན་ནི་ཁམས་གསུམ་གྱི་ཉོན་མོངས་པ་ཞི་བའི་སོ་སོར་བརྟགས་འགོག་ནི་ཐོབ་ཅིང་མངོན་དུ་བྱས་ལ། སྡུག་བསྔལ་ཞི་བའི་འགོག་པ་ཐོབ་ཀྱང་མངོན་དུ་མ་བྱས་པ་སྟེ། ཅི་ཞིག་ལུས་ན་མཽའུ་འགལ་གྱི་བུ་དང་། སྒུར་ཆུང་ལྟ་བུ་ཚོར་བ་སྡུག་བསྔལ་རྟེན་བཅས་སྡུག་བསྔལ་དང་། ཚོར་བ་བདེ་བ་རྟེན་བཅས་འགྱུར་བ་དང་། ཟག་བཅས་ཐམས་ཅད་ལ་ཁྱབ་པའི་འདུ་བྱེད་སྡུག་བསྔལ་གསུམ་ཀ་ལུས་ལ། ནམ་སྐུ་ཚེ་བཏང་བའི་ཚེ་ལྷག་མེད་དུ་མྱ་ངན་ལས་འདའ་ཞེས་དང་། སྡུག་བསྔལ་དེ་གསུམ་ཞི་བའི་འགོག་པ་ཐོབ་ལ་མངོན་དུ་བྱས་ཞེས་ཏེ། དེ་ནི་བྱེ་བྲག་ཏུ་སྨྲ་བས་རྟག་ཅིང་དགེ་བའི་རྫས་སུ་འདོད་ལ། མདོ་སྡེ་པས་ཟག་བཅས་ཅང་མེད་དུ་སོང་བའི་མེད་དགག་ལ་འདོད་དོ། །བསམ་གཏན་དང་པོ་གསུམ་གྱི་རྟེན་ནི་ལྷག་བཅས་ཀྱི་ཚེ་ཁམས་གསུམ་གྱི་ཉོན་མོངས་དང་། སྡུག་བསྔལ་གྱི་སྡུག་བསྔལ་ཞི་བ་མངོན་དུ་བྱས་ཤིང་། སྡུག་བསྔལ་ཕྱི་མ་གཉིས་ཞི་བའི་འགོག་པ་ཐོབ་ཀྱང་མངོན་དུ་མ་བྱས་ལ་ལྷག་མེད་ཀྱི་ཚེ་མངོན་དུ་བྱས་པའོ། །བསམ་གཏན་བཞི་པ་ནས་སྲིད་རྩེའི་བར་གྱི་རྟེན་ཅན་ནི། ཉོན་མོངས་དང་སྡུག་བསྔལ་དང་པོ་གཉིས་ཞི་བ་མངོན་དུ་བྱས་ཤིང་། འདུ་བྱེད་ཀྱི་སྡུག་བསྔལ་ཞི་བའི་འགོག་པ་ཐོབ་ཀྱང་མངོན་དུ་མ་བྱས་ལ་ལྷག་མེད་ཀྱི་ཚེ་མངོན་དུ་བྱས་པའོ། །རང་སངས་རྒྱས་ནི་གླིང་གསུམ་གྱི་སྐྱེ་པའི་རྟེན་ཅན་ཏེ་སྡུག་བསྔལ་གསུམ་ལུས་པ་ནི་ལྷག་བཅས་དང་། དེ་དོར་བ་ལྷག་མེད་དུ་འཇོག་པའི་ཚུལ་ཉན་ཐོས་འདོད་པའི་རྟེན་ཅན་དང་འདྲའོ། །ཡང་དག་པར་རྫོགས་པའི་སངས་རྒྱས་ནི། འཛམ་བུ་གླིང་གི་སྐྱེས་པ་སྟེ། ཟད་པ་ཤེས་པ་མངོན་དུ་བྱས་པ་ནས་སྐུ་ཚེའི་འདུ་བྱེད་མ་བཏང་གི་བར་ལ་ཞབས་ལ་སེང་ལྡེང་གི་ཚལ་པ་ཟུག་པ་དང་། སྐུ་རོ་རྒྱབ་བསྙུང་བ་དང་། དབུ་ཀླད་པ་མི་བདེ་ནས་སྨན་ཨུཏྤལ་བཙལ་བ་ལ་སོགས་པ་ཚོར་བ་སྡུག་བསྔལ་རྟེན་དང་བཅས་པ་དང་། རེས་འགའ་བདེ་བ་དང་དགྱེས་པར་སྤྱོད་པ་སོགས་ཚོར་བ་བདེ་བ་དང་། ཡིད་བདེ་རྟེན་དང་བཅས་པ་དང་། ཚོར་བ་བཏང་སྙོམས་རྟེན་དང་བཅས་པའི་སྡུག་བསྔལ་གསུམ་ལུས་པ་ནི་ལྷག་བཅས་ཡིན་ལ། ནམ་གྲོང་ཁྱེར་རྩྭ་མཆོག་ཏུ་སྐུ་ཚེའི་འདུ་བྱེད་བཏང་བ་ན་ལྷག་མེད་དུ་ཁས་ལེན་ཏོ་ཞེས་ཀུན་མཁྱེན་གོ་རམས་པའི་ངོ་མཚར་གསུམ་ལྡན་ལས་སོ། །
Domain	[ཆོས་ལུགས།, ལྟ་གྲུབ།]