87897

ལྷག་མཐོང་ལས་ཚོལ་བ་དྲུག་གི་ལྷག་མཐོང་ (1)

Part of speech	མིང་ཚིག
Definition	འབུམ་གྱི་འགྲེལ་རྐང་བརྒྱ་རྩ་བརྒྱད་ལས་བྱུང་བ་སྟེ། དོན་ཚོལ་བ་ནི། ཚིག་དང་དོན་ཚོལ་བའོ། །དངོས་པོ་ཚོལ་བ་ནི། ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་རབ་འབྲིང་ཐ་གསུམ་ལ་དཔྱོད་པའོ། །མཚན་ཉིད་ཚོལ་བ་ནི། མི་རྟག་པ་འདུས་བྱས་སྤྱི་ཡི་མཚན་ཉིད། མི་གཙང་བ་ལ་དྲི་ཞིམ་མེད། །འགྲོ་བ་དག་ལ་བདེ་བ་མེད། །ཅེས་པ་ལྟ་བུ་ནི་རང་གི་མཚན་ཉིད་ཚོལ་བའོ། །ཕྱོགས་ཚོལ་བ་ནི། ནག་ཕྱོགས་ཀྱི་སྐྱོན་དང་ཉེས་དམིགས་ཀྱི་སྒོ་ནས་བསམ་པ། དཀར་ཕྱོགས་ཀྱི་ཡོན་ཏན་དང་ཕན་ཡོན་གྱི་སྒོ་ས་བསམ་པའོ། །དུས་ཚོལ་བ་ནི། འདས་མ་འོངས་ད་ལྟ་དུས་གསུམ་དཔག་ཏུ་མེད་པ་སོགས་བསམ་པའོ། །རིགས་པ་ཚོལ་ལ་བཞི། རིགས་པ་བཞི་པོ་ནི། ལྟོས་པའི་རིགས་པ། བྱ་བ་བྱེད་པའི་རིགས་པ། འཐད་པ་སྒྲུབ་པའི་རིགས་པ། ཆོས་ཉིད་ཀྱི་རིགས་པ་དང་བཞིའོ། །དེ་ལ་ལྟོས་པའི་རིགས་པས་ནི་ཀུན་རྫོབ་ཀྱང་ཀུན་རྫོབ་ཀྱི་སྒོ་ནས། དོན་དམ་པ་ཡང་དོན་དམ་པའི་སྒོ་ནས། གཞི་ཡང་གཞིའི་སྒོ་ནས་ཡོངས་སུ་ཚོལ་བར་བྱེད་དོ། །བྱ་བ་བྱེད་པའི་རིགས་པས་ནི། ཆོས་རྣམས་ཀྱི་བྱེད་པ་ཡོངས་སུ་ཚོལ་བར་བྱེད་དེ། འདི་ནི་ཆོས་སོ། །འདི་ནི་བྱེད་པའོ། །འདི་ནི་འདིའི་བྱེད་པའོ་ཞེས་ཡོངས་སུ་ཚོལ་བར་བྱེད་པའོ། །འཐད་པ་སྒྲུབ་པའི་རིགས་པས་ནི། ཚད་མ་གསུམ་པོ་ཡིད་ཆེས་པའི་ལུང་དང༌། མངོན་སུམ་དང༌། རྗེས་སུ་དཔག་པ་དག་ཡོངས་སུ་ཚོལ་བར་བྱེད་དེ། ཅི་འདི་ལ་ཡིད་ཆེས་པའི་ལུང་ཡོད་དམ་མེད། ཅི་མངོན་སུམ་དུ་དམིགས་སམ་འོན་ཏེ་མ་ཡིན། ཅི་རྗེས་སུ་དཔག་པས་རིགས་སམ། འོན་ཏེ་མ་ཡིན་ཞེས་ཡོངས་སུ་ཚོལ་བར་བྱེད་དོ། །ཆོས་ཉིད་ཀྱི་རིགས་པས་ནི། ཆོས་རྣམས་ཀྱི་དེ་ལྟར་གྱུར་པ་ཉིད་དང༌། གྲགས་པའི་ཆོས་ཉིད་དང༌། བསམ་གྱིས་མི་ཁྱབ་པའི་ཆོས་ཉིད་དང༌། གནས་པའི་ཆོས་ཉིད་ལ་མོས་པར་བྱེད་ཅིང༌། སེམས་པར་མི་བྱེད། རྣམ་པར་རྟོག་པར་མི་བྱེད་དེ། དེ་ལྟར་རིགས་པ་ཡོངས་སུ་ཚོལ་བར་བྱེད་དོ། །
Domain	ཆོས་ལུགས།