89874

ཤེས་བྱ་རང་རྒྱལ་གྱི་ལམ་ (1)

Part of speech	མིང་ཚིག
Definition	མདོ། ཕར་ཕྱིན། གཟུང་བ་ཆོས་ཀྱི་བདག་མེད་རྟོགས་པའི་རྟོགས་རིགས་སྟེ། རང་རྒྱལ་ཀྱི་རིགས་ཅན་རྗེས་སུ་བཟུང་བའི་དོན་དུ་དེའི་ལམ་ལ་མཁས་པར་བྱ་དགོས་པས་སོ། །དེ་ལ་བྱང་སེམས་ཀྱི་རྒྱུད་ལ་བསྐྱེད་པ་དང་། རང་རྒྱལ་རིགས་ཅན་གྱི་རྒྱུད་ལ་ཡོད་པ་གཉིས་ལས། སྔ་མ་ནི་རྒྱུད་ལ་བསྐྱེད་ནས་ཤེས་བྱ་དང་། ཕྱི་མ་ནི་རྟོགས་པའི་ཆོས་ཀྱི་སྤྱན་ལ་སོགས་པས་གཞན་རིག་གིས་རྟོགས་པར་བྱའོ། །ངོ་བོ་མཐོང་སྒོམ་གཉིས་ལས། མཐོང་ལམ་གྱི་རྟོགས་རིགས་ཡིན་གྱི་སྒོམ་ལམ་མ་ཡིན་པར་སྡུད་འགྲེལ་ལས་བཤད་དེ། གཞན་གྱི་དོན་དུ་ཤེས་པར་བྱ་བ་ཙམ་ཡིན་གྱི་སྒོམ་པས་མངོན་དུ་བྱ་བ་ནི་མ་ཡིན་ནོ་སྙམ་དུ་དགོངས་ཏེ། འཕགས་སེང་གཉིས་ཀས་གཞི་ཤེས་ཀྱི་སྐབས་སུ་སྒོམ་ལམ་མི་སྟོན་པའི་རྒྱུ་མཚན་དང་འགྲིག་གོ ། གཉིས་པ་ཤེས་ཚུལ་ལ། གཞན་རིག་གིས་ཤེས་ཚུལ་ནི། ཆོས་ཀྱི་སྤྱན་གྱིས་གཞན་རྒྱུད་ལ་སྐྱེ་ཚུལ་མཐོང་བ་ཡིན་ཏེ། མཛོད་ལས། ཉན་ཐོས་མཐོང་བའི་སྐད་ཅིག་གཉིས། །རིག་སྟེ་བསེ་རུ་ལྟ་བུས་གསུམ། །སངས་རྒྱས་སྦྱོར་བ་མེད་པར་ཀུན། །ཞེས་པ་ལྟར་རོ། །རྒྱུད་ལ་མྱོང་བས་ཤེས་ཚུལ་ནི་གཉིས་ཏེ། རང་གི་མཚན་ཉིད་ཀྱི་རྣམ་པ་དང་། སྤྱིའི་མཚན་ཉིད་ཀྱི་རྣམ་པས་ཤེས་པའོ། །དང་པོ་ནི་རྗེས་ཐོབ་དུ་སོ་སོའི་དམིགས་རྣམ་ཇི་ལྟ་བ་བཞིན་རྒྱུད་ལ་བསྐྱེད་པ་ཡིན་ལ། གཉིས་པ་ནི། མཉམ་གཞག་ཏུ་ཆོས་ཀྱི་བདག་མེད་ཀྱི་རྣམ་པས་མི་དམིགས་པར་ཤེས་པའོ། །ཞེས་ཀུན་མཁྱེན་རོང་སྟོན་གྱི་རྣམ་བཤད་ཚིག་དོན་རབ་གསལ་ལས་སོ། ། ཀུན་མཁྱེན་གོ་རམས་པས། མཚན་ཉིད་ནི། རྟོགས་རིགས་གསུམ་གྱི་ནང་ནས་གཟུང་བ་ཆོས་ཀྱི་བདག་མེད་རྟོགས་པའི་རིགས་སུ་གྱུར་པའི་སྒོ་ནས་ཤེས་སྒྲིབ་གཟུང་རྟོག་གི་གཉེན་པོའི་རིགས་སུ་གནས་པའམ། ཡང་ན་རྟོགས་རིགས་རང་ངོས་ནས་གཟུང་རྟོག་སྤོང་བ་དང་། འཛིན་རྟོག་མི་སྤོང་བ་དང། རྟེན་གྱི་ཁྱད་པར་གསུམ་དང་ལྡན་པའི་རྟོགས་རིགས་སོ། །གང་ཟག་གི་སྒོ་ནས་དབྱེ་ན། རང་རྒྱལ་གྱི་རིགས་ཅན་གྱི་རྒྱུད་ཀྱི་ཤེས་བྱ་རང་རྒྱལ་གྱི་ལམ། བྱང་སེམས་ཀྱི་རྒྱུད་ཀྱི་ཤེས་བྱ་རང་རྒྱལ་གྱི་ལམ་གཉིས་སོ། །ཞེས་སྦས་དོན་རབ་གསལ་ལས་གསུངས་སོ། ། པཎ་ཆེན་ཤཱཀྱ་མཆོག་གིས། གདུལ་བྱ་རང་རྒྱལ་གྱི་རིགས་ཅན་རྗེས་སུ་བཟུང་བའི་དོན་དུ་བྱང་སེམས་འཕགས་པས་ཤེས་པར་བྱ་བའི་མངོན་རྟོགས་ཀྱི་རིགས་སུ་གནས་པ་དེ། ཤེས་པར་བྱ་བའི་རང་རྒྱལ་གྱི་ལམ་གྱི་མཚན་ཉིད། དབྱེ་ན། རང་རིག་གིས་ཤེས་པར་བྱ་བའི་ལམ་དང་། གཞན་རིག་གིས་ཤེས་པར་བྱ་བའི་ལམ་གཉིས། དང་པོ་ནི། བྱང་སེམས་རང་རྒྱུད་ཀྱི་གང་ཟག་གི་བདག་མེད་རྟོགས་པའི་རྟོགས་རིགས་ལྟ་བུ་ལ་བྱ། གཉིས་པ་ནི། རང་རྒྱལ་རྒྱུད་ཀྱི་ལམ་རྣམས་ལ་བྱའོ། །ཞེས་རྒྱན་འགྲེལ་ལུང་དོན་རྒྱ་མཚོ་ལས་གསུངས་སོ། །
Domain	ཆོས་ལུགས།