90227

ཤོར་ཕུ་ཀརྨ་སྙན་གྲགས་ (1)

Part of speech

མིང་ཚིག

Definition

ཁོང་ནི་ལྕི་རས་རིན་ཆེན་རྒྱལ་མཚན་གྱི་དབོན་རྒྱུད་སུ་གྱུར་པ་ཆོས་སྐྱོང་བཀྲ་ཤིས་ཀྱི་སྲས་སུ་ཁྱི་ལོ་ལ་འཁྲུངས། དགུང་ལོ་ལྔ་ནས་གཏོར་མ་ཆ་བཅུ་གཏོང་བ་དང༌། ཡི་གེ་ཚིག་མེད་མཁྱེན། ཁུ་བོ་བླ་མ་བཀྲ་ཤིས་རྒྱལ་མཚན་ལས་འབའ་རོམ་ནས་བརྒྱུད་པའི་ཆོས་ཡོད་དགུ་ཅོག་གསན། བདེ་མཆོག་དང་མགོན་པོ་སོགས་ལ་ཐུགས་དམ་གྱི་མཐིལ་མཛད་དེ་ལུང་བསྟན་ཐོབ། རྒྱལ་དབང་ཀརྨ་པ་དབང་ཕྱུག་རྡོ་རྗེ་ལ་ཡོད་དགུ་ཅོག་ཕུལ་ཞིང་དེ་ཉིད་ཀྱི་དྲུང་ནས་རབ་ཏུ་བྱུང༌། མཚན་ཀརྨ་སྙན་གྲགས་དཔལ་བཟང་པོ་གསོལ། རྗེ་བཙུན་ཆོས་ཀྱི་རྒྱལ་མཚན་གྱི་ཞལ་ནས། ཆོས་ཀྱི་གོ་ཆའི་ཕྲིན་ལས་ཀྱི་སྤྲུལ་པ་ཡིན་པར་བཀས་གནང༌། བླ་མ་བསྟེན་པ་ལའང༌། ཡང་དག་པར་རྫོགས་པའི་སངས་རྒྱས་འཇིག་རྟེན་དུ་ཞལ་བསྟན་པ་ལྔ། བསྟན་པ་ཡོངས་རྫོགས་ཀྱི་དགེ་བའི་བཤེས་གཉེན་ཆེན་པོ་བཞི། ཡང་དག་དགེ་བཤེས་གསུམ་སོགས་བསྟེན། དེ་དག་ལས་འོང་བའི་ཆོས་ཡོད་དགུ་ཅོག་ལ་མ་གསན་པ་གཅིག་ཀྱང་མེད། སྐྱོ་བྲག་ཀུན་དགའ་རྒྱ་མཚོ་ལས། འབའ་རོམ་ནས་བརྒྱུད་པའི་ཆོས་ཡོད་དགུ་ཅོག་གསན། དེང་ཐོག་ཀུན་དགའ་རྒྱལ་མཚན་ལས། ལྷ་མོ་དུད་སོལ་མའི་སྐོར་གསན། ཚིག་ལ་མ་ལུས་ཤིང་དོན་ལ་རྟོགས་པ་བླ་མ་འདི་ཙམ། འོག་མིན་ཀརྨའི་གདན་ས་ལོ་བརྒྱད་ཙམ་དུ་མཛད། ལྷ་སྟེང་གི་གཙུག་ལག་ཁང་ལོག་བྲིས་དང་བཅས་པ་བཞེངས། གཏོར་མ་ལས་བདུད་རྩི་བབས། བདུད་རྩི་ཁོལ་བ། སྒྲོལ་མའི་ལུང་བསྟན་སོགས་བྱུང༌། ཉིན་གཅིག་ང་རང་གི་ལྷ་མོ་དེ་དགའ་འདུག་པས་ད་ལོ་འཆི་བ་ཡིན་པ་འདྲ་གསུངས་ནས་དོན་དགུ་ལ་གཤེགས། འཇའ་དང་འོད་ཀྱིས་ནམ་མཁའ་ཁེངས། ཞག་ཞེ་དགུའི་ཉིན་མོ་ཡང་དེ་བཞིན་དུ་བྱུང༌། བསྟན་བཅོས་ཀྱང་མང་དུ་མཛད་པར་འདུག་ཀྱང་ད་ལྟ་མཇལ་དུ་ཡོད་པ་ནི། འབའ་རོམ་དར་མ་དབང་ཕྱུག་གི་རྣམ་ཐར་སོགས་ཉུང་ཤས་ལས་མ་མཐོང་། རབ་བྱུང་བཅུ་པའི་ནང་ཙམ་ལ་བྱོན།

{{#arraymap:ཤོར་ཕུ་ཀརྨ་སྙན་གྲགས་

|; |@@@ | | }}