90597

ས་དང་པོ་རབ་ཏུ་དགའ་བ་ (1)

Part of speech	མིང་ཚིག
Definition	མདོ། དབུ་མ། ས་རབ་ཏུ་དགའ་བ་ལ་གནས་པའི་རྟོགས་པ་དེ་ལ། དོན་དམ་པའི་སེམས་བསྐྱེད་དང་པོ་ཞེས་བྱ་སྟེ། ས་དང་པོ་ཡིན་པའི་ཕྱིར། འགྲོ་བ་རང་བཞིན་གྱིས་སྟོང་པར་མངོན་སུམ་གྱིས་མཐོང་བའི་རྒྱལ་བའི་སྲས་པོ་ས་དང་པོ་པ་འདིའི་སྟོང་ཉིད་མངོན་སུམ་སུ་རྟོགས་པའི་སེམས་གང་ཡིན་པ་དེ་ལ། ས་རབ་ཏུ་དགའ་བ་ཞེས་བྱ་སྟེ། འགྲོ་བ་རྣམས་རྣམ་པར་གྲོལ་བར་བྱ་བའི་ཕྱིར་དུ་སྙིང་རྗེ་ཆེན་པོའི་གཞན་དབང་དུ་གྱུར་ཅིང། ཀུན་ཏུ་བཟང་པོའི་སྨོན་པས་རབ་ཏུ་བསྔོས་པ་སྟེ། གཙོ་བོར་སྨོན་ལམ་ཆེན་པོ་བཅུ་ལ་སོགས་པ་སྨོན་ལམ་འབུམ་ཕྲག་གྲངས་མེད་པ་བཅུ་འདེབས་པར་བྱེད་པའི་ས་ཡིན་པའི་ཕྱིར་རོ་ཞེས་པཎ་ཆེན་ཤཱཀ་མཆོག་གིས་ངེས་དོན་གནད་ཀྱི་ཊཱི་ཀ་ལས་གསུངས་སོ། ། ཆོས་དབྱིངས་མངོན་སུམ་དུ་རྟོགས་པའི་ཟག་མེད་ཀྱི་ཡེ་ཤེས་དང་། བརྩེ་བ་སྙིང་རྗེ་ཆེན་པོ་ཟུང་དུ་འབྲེལ་བའི་མཉམ་གཞག་ཡེ་ཤེས་སྐད་ཅིག་མ་བཅུ་དྲུག་གིས་བསྡུས་པ་དེ་ནི་ས་དང་པོའི་ངོ་བོ་ཡིན་ཏེ། དེའི་རྗེས་ཐོབ་ཏུ་སྨོན་ལམ་ཆེན་པོ་བཅུ་ལ་སོགས་པ་སྨོན་ལམ་འབུམ་ཕྲག་གྲངས་མེད་པ་ཕྲག་བཅུ་འདེབས་པ་སོགས་དང་། ས་ཐོབ་པ་ལ་ཡིད་རབ་ཏུ་དགའ་བ་ཁྱད་པར་ཅན་འབྱུང་ཞིང་། དེ་དག་གིས་སྔར་གྱི་མཉམ་གཞག་དེ་ཉིད་ས་དང་པོར་ཉེ་བར་མཚོན་པར་བྱེད་པའི་ཕྱིར་རོ། །དེ་ཡང་གཉིས་སུ་མེད་པའི་ཡེ་ཤེས་ནི། ཐབས་ཤེས་ཟུང་འཇུག་གི་ངོ་བོར་གྱུར་པའི་མཐོང་ལམ་སྐད་ཅིག་མ་བཅུ་དྲུག་པོ་དེ་ཡིན་ལ། དེའི་རྒྱུ་ཅན་གྱི་འབྲས་བུ་ནི། བཅུ་དྲུག་པ་རྫོགས་མཚམས་ནས་བྱུང་བའི་ས་དང་པོའི་རྗེས་ཐོབ་ཡེ་ཤེས་མཐའ་དག་ཡིན་ཅིང་། རྗེས་ཐོབ་ཏུ་ཕར་ཕྱིན་བཅུའི་ནང་ནས་སྤྱིན་པའི་ཕར་ཕྱིན་ལ་ལྷག་པར་སྤྱོད་པ་སོགས་ཡོན་ཏན་ལྡོག་ཆ་ནས་ཕྱེ་བ་ན་སྔར་གྱི་མཉམ་གཞག་དེ་ཉིད་ལ་ས་དང་པོ་ཞེས་བྱ་བའི་མིང་ཐོབ་པས་ན་ཉེ་བར་མཚོན་ཞེས་བཤད་པ་ཡིན་ནོ་ཞེས་པཎ་ཆེན་ངག་ཆོས་ཀྱི་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།