90630

ས་དྲུག་པ་མངོན་དུ་གྱུར་པ་ (1)

Part of speech	མིང་ཚིག
Definition	མདོ། དབུ་མ། ས་ལྔ་པའི་གནས་སྐབས་ན་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་དག་པ་ཐོབ་པས་དྲུག་པ་མངོན་དུ་གྱུར་པ་འདིར་མཉམ་པར་བཞག་པའི་སེམས་ལ་གནས་ཏེ། རྒྱུ་དང་རྐྱེན་འདི་བ་ཙམ་ལ་བརྟེན་ནས་འབྱུང་བའི་དེ་ཁོ་ན་ཉིད་མཐོང་བའི་བྱང་ཆུབ་སེམས་དཔའ་དེ་ནི་ཤེས་རབ་ཀྱི་ཕ་རོལ་དུ་ཕྱིན་པ་ཡོངས་སུ་དག་པ་སྟེ་ཕུལ་བྱུང་གསར་བུ་ཐོབ་པས་སྤྲོས་པ་ཐམས་ཅད་ཞི་བའི་འགོག་པ་ཐོབ་པ་ཡིན་ནོ། །སྔ་རོལ་དུ་ཐོབ་ནུས་པ་ནི་མ་ཡིན་ཏེ། མངོན་པར་ཞེན་པའི་སྤྲོས་པ་ནི་མ་རིག་པའི་རྩ་བ་ཅན་ཡིན་ལ། དེ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ཕུལ་དུ་བྱུང་བ་མེད་པར་སྦྱིན་པ་ལ་སོགས་པས་མ་ལུས་པ་སྤོང་མི་ནུས་པའི་ཕྱིར་རོ། །སེམས་བསྐྱེད་པ་དང་པོ་ལ་སོགས་པའི་སྐབས་ན་ཡང་སྤྲོས་པ་ཉེ་བར་ཞི་བ་ཡོད་པ་མ་ཡིན་ནམ། ཅིའི་ཕྱིར་འགོག་པ་མེད་ཅེ་ན། དངོས་པོ་ལ་མངོན་པར་ཞེན་པའི་གཉེན་པོ་སྟོང་པ་ཉིད་ཡུན་རིང་དུ་གོམས་པ་ལས་མཉམ་བཞག་ཏུ་སྤྲོས་པ་ཉེ་བར་ཞི་བ་ཡོད་ཀྱང་། རྗེས་ཐོབ་ཏུ་དངོས་པོ་དང་སྟོང་ཉིད་ལ་ཞེན་པའི་བག་ཆགས་ལྡང་བའི་ཕྱིར་འགོག་པ་ཐོབ་པ་མེད་ལ། ས་དྲུག་པ་ལ་ནི་མཉམ་པར་གཞག་པའི་ཡེ་ཤེས་ཀྱི་འོད་ཟེར་གྱི་དྲྭ་བས་རྗེས་ཐོབ་ཀྱི་གནས་སྐབས་ན་ཡང་དངོས་པོ་ལ་མངོན་པར་ཞེན་པ་དང་། སྟོང་པ་ཉིད་ལ་མངོན་པར་ཞེན་པའི་བག་ཆགས་མ་ལུས་པ་རྣམ་པར་བསལ་བས་འགོག་པ་ཐོབ་ཅེས་བརྗོད་དོ། །ཅིའི་ཕྱིར་ས་འདི་ལ་མངོན་དུ་གྱུར་པ་ཞེས་བྱ་ཞེ་ན། རྟེན་ཅིང་འབྲེལ་བར་འབྱུང་བ་གཟུགས་བརྙན་དང་འདྲ་བའི་ཆོས་ཉིད་ཁོང་དུ་ཆུད་པའི་ཕྱིར་དང་། རྗོགས་པའི་སངས་རྒྱས་ཀྱི་ཆོས་སྟོབས་དང་མི་འཇིགས་པ་ལ་སོགས་ལ་མངོན་དུ་ཕྱོགས་པའི་ཕྱིར་རོ། །ཞེས་ཀུན་མཁྱེན་རོང་སྟོན་གྱི་དབུ་འཇུག་རྣམ་བཤད་ལས་གསུངས་སོ། ། ས་ལྔ་པར་བསམ་གཏན་གྱི་ཕར་ཕྱིན་ཡོངས་སུ་དག་པ་ཐོབ་པས་ས་དྲུག་པར་ཞི་གནས་ཕུལ་དུ་བྱུང་བ་ལ་གནས་ཤིང་ལྷག་མཐོང་རྟེན་འབྲེལ་ཟབ་མོའི་དེ་ཁོ་ན་ཉིད་མཐོང་བའི་བྱང་ཆུབ་སེམས་དཔའ་ནི་ཤེར་ཕྱིན་ལྷག་པར་ཐོབ་པས་སྤྲོས་པ་མཐའ་དག་བཀག་པའི་འགོག་པ་ཐོབ་པར་འགྱུར་གྱི་སྔ་རོལ་དུ་ནི་མ་ཡིན་ཏེ། ཤེས་རབ་ལྷག་པར་གྱུར་པ་མེད་པའི་ཕྱིར། ཅིའི་ཕྱིར་མངོན་དུ་གྱུར་པ་ཞེས་བྱ་ཞེ་ན། གཟུགས་བརྙན་དང་འདྲ་བའི་ཆོས་ཉིད་ཁོང་དུ་ཆུད་པའི་ཕྱིར་དང་། བྱང་ཆུབ་སེམས་དཔའི་ས་ལྔ་པར་ལམ་གྱི་བདེན་པ་ལ་དམིགས་པའི་ཕྱིར་དང་། རྗོགས་པའི་སངས་རྒྱས་ཀྱི་ཆོས་ལ་མངོན་དུ་ཕྱོགས་པའི་ཕྱིར་ཞེས་རྒྱུ་མཚན་གསུམ་གསུངས་སོ་ཞེས་ཀུན་མཁྱེན་གོ་རམས་པའི་འཇུག་པའི་དཀའ་འགྲེལ་ལས་གསུངས་སོ། །
Domain	ཆོས་ལུགས།