90755

ས་བཟང་མ་ཏི་པཎ་ཆེན་ (1)

Part of speech

མིང་ཚིག

Definition

བྱམས་པའི་སྤྲུལ་པ་ས་བཟང་མ་ཏི་པཎ་ཆེན་ནི་ཕྱི་ལོ་ ༡༢༩༤ ཤིང་ཕོ་རྟ་ལ་མངའ་རིས་སུ་སྐུ་འཁྲུངས། བཙས་མ་ཐག་གོམ་གསུམ་བཞེས་ནས་བྱམས་པའི་སྤྲུལ་པའི་འགྲོ་དོན་མཛད་ཚུལ་གྱི་ཚིགས་བཅད་གསུངས། དགུང་ལོ་བཞི་ནས་བྱམས་པའི་ཆོས་ལྔ་ཁ་ཏོན་མཛད། ལོ་བཅོ་ལྔ་སྐོར་ནས་མཁས་པའི་གྲགས་པ་ཆེན་པོ་ཐོབ་ཅིང་དབང་ལུང་མན་ངག་མང་པོ་གསན། ལོ་ཉེར་ལྔར་ཞྭ་ལུར་བྱོན་ནས་མཁན་ཆེན་དྲུང་ནས་བསྙེན་རྫོགས་མཛད། དེར་དབྱར་ཆོས་མཁའ་འགྲོ་རྒྱ་མཚོའི་རྒྱུད་གསུངས་པའི་ཆོས་གྲྭར་ཀུན་མཁྱེན་ཆེན་པོའི་རྣམ་ཐར་གསན་པས་དད་པས་དབང་མེད་དུ་ཇོ་ནང་ལ་བྱོན་ཏེ་ཆོས་རྗེ་ཉིད་ལ་མངའ་བའི་ཆོས་ཡོངས་རྫོགས་ཞུས་ཏེ་ཀུན་ལ་མཁས་པའི་ཐུགས་སྲས་མཆོག་ཏུ་གྱུར། གཞན་ཀུན་སྤངས་ཆོས་གྲགས་དཔལ་དང་ལོ་ཙཱ་བློ་བརྟན་གཉིས་ལའང་ཆོས་བཀའ་རིག་གནས་མང་པོ་ཞུས། བླ་མ་ཟླ་བ་རྒྱལ་མཚན་གྱིས་ས་བཟང་དགའ་ལྡན་དགོན་གཞི་རྟེན་བཅས་ཕུལ་ནས་དེར་ཆོས་མང་དུ་གསུངས། བྱམས་གླིང་དུ་སྡེ་བ་དོལ་བ་བསྐུལ་ནས་ཇོ་ནང་དཔལ་གྱི་མཆོད་རྟེན་ཚད་ལྡན་བཞེངས། གསུང་རྩོམ་ལ། སྒྲ་ཊཱིཀ སྤྱོད་འགྲེལ། བླང་དོར་རབ་གསལ། རྩིས་ཐིག་རྩ་སོགས་མང༌། དགུང་ལོ་གྱ་གསུམ་ཕྱི་ལོ་ ༡༣༧༦ མེ་འབྲུག་ལོའི་ཐ་སྐར་ཟླ་བའི་ཚེས་བཅོ་ལྔ་ལ་ངོ་མཚར་དུ་མ་དང་བཅས་སྐུ་གཤེགས་སོ། །