9086

གཞི་ཤེས་ཀྱི་སྦྱོར་བ་ (1)

Part of speech	མིང་ཚིག
Definition	མདོ། ཕར་ཕྱིན། སྦྱོར་བའི་ངོ་བོ། གཞི་རང་བཞིན་མེད་པར་རྟོགས་པའི་ཤེས་རབ་མཚུངས་ལྡན་དང་བཅས་པའོ། །དབྱེ་བ་ནི་ཡུལ་གྱི་དབྱེ་བས་བཅུ་ལས། དང་པོ་བཞི་ནི་རང་བཞིན་གྱི་སྦྱོར་བ་སྟེ། གཞི་ལ་མཚན་མར་འཛིན་པ་མ་སྤངས་པ་དེ་སྲིད་དུ་བསྒོམ་པར་བྱ་བ་ཡིན་པའི་ཕྱིར། ཕྱི་མ་དྲུག་ནི་གནས་སྐབས་ཀྱི་སྦྱོར་བ་སྟེ། མི་མཐུན་ཕྱོགས་སྐྱེས་ན་བསྒོམ་ཞིང་མ་སྐྱེས་ན་སྒོམ་མི་དགོས་པའི་ཕྱིར་རོ། །མཉམ་རྗེས་གང་ཡིན་ནི། སྙིང་པོ་མཆོག་ལས་སྔ་མ་རྣམས་མཉམ་གཞག་དང་ཕྱི་མ་རྗེས་ཐོབ་དུ་བསྒོམ་པར་བཤད་ལ། འདིར་ནི་མཉམ་བཞག་སྣང་བཅས་སུ་བཞེད་པས་ཐམས་ཅད་མཉམ་བཞག་དུ་བསྒོམ་པ་མི་འགལ་ལ། སྦྱོར་བ་དང་པོ་བཞི་ངོ་བོ་གཅིག་ལ་ལྡོག་པས་ཕྱེ་བ་ཡིན་པས་གཅིག་ཆར་བསྒོམ་ཞིང་ཕྱི་མ་དྲུག་སོ་སོར་བསྒོམ་མོ། །ས་མཚམས། སྦྱོར་བ་ཙམ་ནི་ས་བཅུ་པའི་བར་དུ་ཡོད་དེ། གཞིའི་ཆོས་ལ་མངོན་པར་ཞེན་པའི་དྲི་མ་ཡོད་པ་དེ་སྲིད་དུ་བསྒོམ་པར་བྱ་བ་ཡིན་པའི་ཕྱིར་དང་། རྒྱུན་མཐའི་བར་དུ་བག་ལ་ཉལ་ཡོད་པའི་ཕྱིར་རོ། །ས་བོན་རགས་པའི་དངོས་གཉེན་ནི། ས་བདུན་པའི་བར་དུ་བསྒོམ་དགོས་ཏེ། ས་བརྒྱད་པ་མ་ཐོབ་པ་དེ་སྲིད་དུ་གཞི་ལ་མཚན་མར་འཛིན་པ་འབྱུང་བའི་ཕྱིར་རོ། །ཞེས་ཀུན་མཁྱེན་རོང་སྟོན་གྱི་རྣམ་བཤད་ཚིག་དོན་རབ་གསལ་ལས། ཀུན་མཁྱེན་གོ་རམས་པས། གཟུགས་སོགས་དེ་མི་རྟག་སོགས་དང། །ཞེས་པའི་སྐབས་སུ་གཞི་ཤེས་སྦྱོར་བའི་མཚན་ཉིད་ནི། གཞི་ལམ་འབྲས་གསུམ་སྤྲོས་བྲལ་དུ་རྟོགས་ནས་སྒོམ་པའི་ཐམས་ཤེས་ཟུང་འཇུག་གི་རྣལ་འབྱོར་རོ། །ཞེས་དང། །ས་མཚམས་ནི། སྤྱིར་གཞི་ཤེས་སྦྱོར་བ་ཙམ་ནི་རྒྱུན་མཐའི་བར་ན་ཡོད་དེ། རྒྱུན་མཐའི་བར་དུ་གཞིའི་ཆོས་ལ་མངོན་ཞེན་གྱི་བག་ལ་ཉལ་ཡོད་པའི་ཕྱིར། མཚན་འཛིན་རགས་པའི་གཉེན་པོ་ནི་ས་བདུན་པའི་བར་དུ་སྒོམ་དགོས་ཏེ། ས་བདུན་པ་མན་ཆད་དུ་མཚན་འཛིན་མངོན་གྱུར་བ་འབྱུང་སྲིད་པའི་ཕྱིར་རོ། །ཞེས་ཡུམ་དོན་རབ་གསལ་ལས་གསུངས། པཎ་ཆེན་ཤཱཀ་མཆོག་གིས། གཟུགས་སོགས་ཡུལ་བཅུ་ལ་སྒྲུབ་པའི་ཡོངས་སུ་ཤེས་པ་གསལ་བའི་བྱང་སེམས་ཀྱི་རྣལ་འབྱོར་དེ། འདིར་བསྟན་སྦྱོར་བའི་མཚན་ཉིད། དབྱེ་ན། ཡུལ་བཅུ་ཡོད་པའི་རྒྱུ་མཚན་གྱིས་བཅུར་ཕྱེ་ལ། དེ་ཡང་བྱ་དཀའ་རྣམ་གསུམ་ལ་སྤྱོད་པ་བཀག་པའི་སྦྱོར་བ་གཅིག་ཏུ་བྱས་པ་ཡིན་ནོ། །བཅུ་པོ་བསྡུ་ན་ཉི་སྣང་ལས། དང་པོ་བཞི་ལ་སྤྱོད་པ་བཀག་པའི་སྦྱོར་བ་དང། ཕྱི་མ་དྲུག་ལ་སྦྱོར་བ་ཙམ་གྱི་ཐ་སྙད་མཛད། སློབ་དཔོན་གྱིས་ནི་ཐམས་ཅད་ལ་སྤྱོད་པ་བཀག་པའི་སྦྱོར་བ་ཙམ་གྱི་ཐ་སྙད་བྱས་སོ། །ས་མཚམས་ནི། སྦྱོར་ལམ་ནས་ས་བཅུ་པའི་བར་ན་ཡོད་དོ། །ཞེས་རྒྱན་འགྲེལ་ལུང་དོན་རྒྱ་མཚོ་ལས་གསུངས་སོ། །
Domain	ཆོས་ལུགས།