91688

སངས་རྒྱས་ཡེ་ཤེས་ (1)

Part of speech	མིང་ཚིག
Definition	མདོ། དབུ་མ། ཡེ་ཤེས་ཀྱི་ངོ་བོ་ངོས་བཟུང་ནི། རྣམ་པར་ཤེས་པ་གནས་ཡོངས་སུ་གྱུར་པའི་གསལ་རིག་གི་ཆའོ། །དེ་ཡང་ཀུན་གཞིའི་རྣམ་པར་ཤེས་པ་གནས་ཡོངས་སུ་གྱུར་པ་ནི་མེ་ལོང་ལྟ་བུའི་ཡེ་ཤེས་སོ། །ཉོན་མོངས་པ་ཅན་གྱི་ཡིད་གནས་ཡོངས་སུ་གྱུར་པ་ནི་མཉམ་པ་ཉིད་ཀྱི་ཡེ་ཤེས་སོ། །སྒོ་ལྔའི་རྣམ་པར་ཤེས་པ་གནས་ཡོངས་སུ་གྱུར་པ་ནི་སོ་སོར་རྟོག་པའི་ཡེ་ཤེས་སོ། །ཡིད་ཀྱི་རྣམ་པར་ཤེས་པ་དེར་གྱུར་པ་ནི་བྱ་བ་གྲུབ་པའི་ཡེ་ཤེས་སོ། །དེ་སྐད་དུ་ཡང་མདོ་སྡེའི་རྒྱན་ལས། དབང་པོ་ལྔ་རྣམས་གཞན་གྱུར་ན། །ཞེས་སོགས་རྒྱས་པར་གསུངས་སོ། །མེ་ལོང་ལྟ་བུའི་ཡེ་ཤེས་ནི། ཇི་ལྟ་བ་དང་ཇི་སྙེད་པ་མཁྱེན་པའི་ཡེ་ཤེས་གང་དུ་ཡང་རིས་སུ་མ་ཆད་པ། དེ་གཉིས་ཀའི་རྟེན་དུ་གྱུར་པ་ཡིན་ཏེ། དཔེར་ན་སེམས་ཅན་གྱི་གནས་སྐབས་སུ་ཀུན་གཞིའི་རྣམ་པར་ཤེས་པ་དེ་ཡུལ་གང་གི་ཡང་རྣམ་པ་མི་འཛིན་ཅིང་། རྣམ་པར་ཤེས་པ་གཞན་རྣམས་ཀྱི་འབྱུང་ཁུངས་ཡིན་པ་བཞིན་ནོ། །མཉམ་པ་ཉིད་ཀྱི་ཡེ་ཤེས་ནི་ཇི་ལྟ་བ་མཁྱེན་པའི་ཡེ་ཤེས་སོ། །སོ་སོར་རྟོག་པའི་ཡེ་ཤེས་ནི་ཇི་སྙེད་པ་མཁྱེན་པའི་ཡེ་ཤེས་སོ། །བྱ་བ་གྲུབ་པའི་ཡེ་ཤེས་ནི་ཕྲིན་ལས་ཀྱི་ཡེ་ཤེས་སོ་ཞེས་པཎ་ཆེན་ཤཱཀ་མཆོག་གིས་དབུ་མ་རྣམ་ངེས་ལས་གསུངས་སོ། །རྗེ་བཙུན་རྩེ་མོས། ཕ་རོལ་ཏུ་ཕྱིན་པའི་ཐེག་པར་སྐུ་གསུམ་དང་ཡེ་ཤེས་བཞི་ལས་མ་བཤད་ལ། སྐུ་བཞི་དང་ཡེ་ཤེས་ལྔ་ནི་རྡོ་རྗེ་ཐེག་པའི་ཁྱད་ཆོས་ཡིན་པར་གསུངས་པས། འདིར་ཡང་ཡེ་ཤེས་ནི་བཞི་སྟེ། མེ་ལོང་ལྟ་བུའི་ཡེ་ཤེས། མཉམ་པ་ཉིད་ཀྱི་ཡེ་ཤེས། སོ་སོར་རྟོགས་པའི་ཡེ་ཤེས། བྱ་བ་གྲུབ་པའི་ཡེ་ཤེས་སོ། །ཡེ་ཤེས་བཞི་པོ་དེ་དག་སྤྲོས་པ་དང་བྲལ་བའི་སངས་རྒྱས་ཀྱི་ཡེ་ཤེས་གཅིག་ཉིད་ལ་རྒྱུ་དང་ཡོན་ཏན་གྱི་ལྡོག་པ་གཞན་སྣང་གི་བློས་རྣམ་པར་གཞག་པ་ཙམ་ཞིག་ནི་འགལ་བ་མེད་ལ། རང་སྣང་ལ་ནི་མི་འདྲ་བའི་དབྱེ་བ་མེད་དོ། །ཇི་ལྟར་སྣོད་ཀྱི་དབྱེ་བས་མཁའ་ལ་དབྱེ་བ་མེད་དེ་ལྟར། །དངོས་བྱས་དབྱེ་བ་འགའ་ཡང་དེ་ཉིད་ལ་མེད་དེ་ཡི་ཕྱིར། །རོ་མཉམ་ཉིད་དུ་ཡང་དག་ཐུགས་སུ་ཆུད་པར་མཛད་གྱུར་ནས། །ཞེས་པའི་ལྡོག་པ་ནས། ཇི་ལྟ་བ་མཁྱེན་པའི་ཡེ་ཤེས་དང། མཁྱེན་བཟང་ཁྱོད་ཀྱིས་སྐད་ཅིག་གིས་ནི་ཤེས་བྱ་ཐུགས་སུ་ཆུད། །ཅེས་པའི་ཡོན་ཏན་གྱི་ལྡོག་པ་ནས་ཇི་སྙེད་པ་མཁྱེན་པའི་ཡེ་ཤེས་སུ་བཞག་སྟེ། དེ་གཉིས་ཐ་དད་དུ་སྣང་བ་གཞན་སྣང་དང་། རང་སྣང་ལ་དབྱེ་བ་མེད་པའི་ཚུལ་ནི་སྔ་མ་ལྟར་རོ་ཞེས་ཀུན་མཁྱེན་གོ་རམས་པའི་དབུ་མའི་སྤྱི་དོན་ལས་གསུངས་སོ། །
Domain	ཆོས་ལུགས།

{{#arraymap:སངས་རྒྱས་ཡེ་ཤེས་

|; |@@@ | | }}