92938

སེམས་ཅན་སྨིན་པའི་ཚད་ (1)

Part of speech	མིང་ཚིག
Definition	མདོ། ཕར་ཕྱིན། རང་ཉིད་སངས་རྒྱས་པའི་ཞིང་དེ་ན་རང་གི་སྐུས་དངོས་སུ་གདུལ་བའི་སྐལ་པ་དང་ལྡན་པའི་སེམས་ཅན་རྣམས་སྒྲིབ་པ་དངོས་སུ་སྤོང་རུང་དང་གཉེན་པོ་དངོས་སུ་སྐྱེ་རུང་དུ་བྱས་པའི་སེམས་ཅན་ཡོངས་སུ་སྨིན་པར་བྱས་པའོ། །ཞེས་གཡག་སྟོན་གྱི་ཤེར་འགྲེལ་རིན་དབང་རྒྱལ་པོ་ལས་སོ། ། སྐུ་དངོས་ཀྱི་གདུལ་བྱ་ཚོགས་ལམ་དུ་སྡུད། སྦྱོར་ལམ་དུ་སྨིན་པར་བྱེད་པ་སྟེ་སྤང་བྱ་མངོན་གྱུར་སྤངས་པ་དང་གཉེན་པོ་དང་ལྡན་པ་དེ་སེམས་ཅན་སྨིན་པར་བྱས་པའོ། །འདིར་སྨིན་པ་ཡིན་ལ་གྲོལ་བ་མིན་པ་ནི་སྦྱོར་ལམ་པའོ། །གྲོལ་བ་ཡིན་ལ་སྨིན་པ་མ་ཡིན་པ་ནི་སངས་རྒྱས་སོ། །སྨིན་གྲོལ་གཉིས་ཀ་ཡིན་པ་ནི་སློབ་པ་འཕགས་པ་རྣམས་སོ། །གཉིས་ཀ་མ་ཡིན་པ་ནི་ཚོགས་ལམ་པ་ལྟ་བུའོ། །ཅིའི་ཕྱིར་སངས་རྒྱས་སྨིན་པར་མི་བརྗོད་ཅེ་ན། སྨིན་པའི་དོན་ནི་གྲོལ་བ་མཐར་ཐུག་པའི་ལམ་ཉམས་སུ་ལེན་པའི་སྣོད་དུ་གྱུར་པ་ལ་བརྗོད་པས་སོ། །ཞེས་ཀུན་མཁྱེན་རོང་སྟོན་ཆེན་པོས་ཟབ་དོན་གནད་ཀྱི་ཟླ་འོད་ལས་གསུངས་སོ། ། སེམས་ཅན་སྨིན་པ་ནི་སྤང་བྱ་མཐོང་སྤང་དངོས་སུ་སྤོང་བ་དང་གཉེན་པོ་མཐོང་ལམ་དངོས་སུ་སྐྱེ་རུང་ཡིན་ལ། རང་ཉིད་སྤྲུལ་སྐུར་སངས་རྒྱ་བའི་འཁོར་གྱི་ཐོག་མར་དེ་དེ་ལྟར་དུ་བྱས་པ་ནི་སྨིན་པར་བྱས་པའི་ཚད་དེ། རྒྱན་དུ། ཇི་ལྟར་རྨ་དང་ཟས་ལ་དེ་དག་གི ། གཟག་དང་དཔྱད་དུ་རུང་བ་སྨིན་འདོད་ལྟར། །དེ་བཞིན་རྟེན་འདིར་ཕྱོགས་གཉིས་ཞི་བ་དང་། །ཡོངས་སུ་སྤྱད་པ་ཉིད་དུ་སྨིན་པ་བསྟན། །ཞེས་སོ། །ཞེས་ཀུན་མཁྱེན་གོ་རམས་པའི་སྦས་དོན་ཟབ་མོ་ལས་གསུངས་སོ། །སེམས་ཅན་སྨིན་པའི་ཚད་ནི། སྐུ་དངོས་ཀྱི་གདུལ་བྱ་རྣམས་དངོས་ཀྱི་སྒྲིབ་པ་སྤོང་རུང་དང་། དངོས་ཀྱི་གཉེན་པོ་སྐྱེ་རུང་དུ་བྱས་པ་ལ་འཆད་པ་ཡིན་ལ། དེའི་གོ་བ་ཡང་སྐུ་དངོས་ཞེས་པ། བྱང་སེམས་དེ་གང་དུ་སངས་རྒྱས་པའི་སྤྲུལ་པའི་སྐུ་ལ་བྱ་བ་ཡིན་ལ། དེའི་དངོས་ཀྱི་གདུལ་བྱ་ནི། ཚེ་དེ་ལ་ཟག་མེད་ཀྱི་ཡེ་ཤེས་སྐྱེས་པས་ཁྱབ་ལ། དེ་ལྟར་སྐྱེ་རུང་དུ་བྱེད་པ་ནི། བྱང་སེམས་དེས་སློབ་པ་ལམ་གྱི་གནས་སྐབས་སུའོ། །ཞེས་པཎ་ཆེན་ཤཱཀ་མཆོག་གིས་རྒྱན་འགྲེལ་ལུང་རིགས་རོལ་མཚོ་ལས་གསུངས་སོ། །
Domain	ཆོས་ལུགས།