93310

སེར་སྨད་གྲྭ་ཚང་ (1)

Part of speech

མིང་ཚིག

Definition

དགེ་ལུགས་པའི་གདན་ས་ཆེན་པོ་སེ་ར་ཐེག་ཆེན་གླིང་གི་ཡ་གྱལ་གྲྭ་ཚང་ཆེན་པོ་ཞིག་སྟེ། རྗེ་ཙོང་ཁ་པའི་དངོས་སློབ་ཀུན་མཁྱེན་བྱང་ཆུབ་འབུམ་པས་ཕྱག་བཏབ་ཅིང་། གྲྭ་ཚོགས་ཇེ་རྒྱས་སུ་སོང་སྟེ་ཁང་ཚན་བཅུ་དྲུག་ཡོད་པ་སྟེ། ༡ གཞུང་པ། ༢ ཡེར་པ། ༣ ཚ་རྡོར། ༤ སྨར་ཉུང་། ༥ ཐེ་བོ་སྟེ་ཅོ་ནེ་ཁག་ལྔ་དང་། ༦ རོང་པོ། ༧ སྤོ་བོ། ༨ གུང་རུ། ༩ ཚ་བ། ༡༠ ཨ་ར། ༡༡ སྤོ་འབོར། ༡༢ མི་ཉག། ༡༣ ཏཱ་དབེན། ༡༤ རྒྱལ་རོང་། ༡༥ གཙང་པ། ༡༦ ཀོང་པོ་བཅས་ཡིན། སེར་སྨད་ཀྱི་གྲྭ་རྒྱུན་མང་ཆེ་བ་ནི་སྨད་མདོ་ཁམས་སྒང་གསུམ་གྱི་ནང་ཚན་བར་ཁམས་ཕལ་ཆེ་བ་དང་། ལི་ཐང་། རྒྱལ་ཐང་། མུ་ལི། རྔ་བ། མགོ་ལོག རྒྱལ་རོང་རྒྱལ་ཁག་གསུམ། ཅོ་ནེ་ཡུལ་ཚོ་ལྔ། ཀོང་པོ་དང་། གཙང་ཁུལ་གྱི་དགོན་པ་ཁག་ཅིག་ཡིན་ལ། བར་སྐབས་དུས་རབས་བཅོ་བརྒྱད་པའི་འགོ་ཙམ་ནས་རིམ་བཞིན་མདོ་སྨད་ཕྱོགས་ནས་དབུས་གཙང་དུ་གྲྭ་རྒྱུན་ཡོང་མཁན་ཉུང་དུ་སོང་རྐྱེན་ཨ་མདོའི་ཐོབ་ཁུངས་ཁང་ཚན་སོ་སོར་ལྷ་སའི་ཉེ་འཁོར་གྱི་འཕན་པོ་དང་སྟོད་ལུང་། ཟད། ཆུ་ཤུལ། འབྲི་གུང་། མལ་དྲོ་སོགས་ནས་མི་མང་པོ་སོ་སོའི་ངོ་ཤེས་འབྲེལ་བཏགས་བརྒྱུད་ནས་གྲྭ་པ་མང་པོ་གསར་དུ་ཞུགས་པ་ནས་གྲྭ་རྒྱུན་དང་ཉེ་འཁོར་བ་ཞེས་པའི་ཁྱད་པར་དེ་བྱུང་། ཚེ་སྨོན་གླིང་སྐུ་ཕྲེང་དང་པོ་ངག་དབང་ཚུལ་ཁྲིམས་བོད་ཀྱི་སྲིད་སྐྱོང་གནང་སྐབས་གོང་གསལ་གྱི་གནས་ཚུལ་དང་། རང་ཉིད་སྐུ་ན་གཞོན་དུས་ཨ་མདོའི་ཡུལ་ནས་གྲྭ་རྒྱུན་བྱས་ཏེ་སེ་རར་ཆོས་ཞུགས་སློབ་གཉེར་རྒྱུན་རིང་གནང་རིང་། ཐག་རིང་ནས་ཡོང་བའི་གྲྭ་རྒྱུན་ཚོའི་དངོས་ཡོད་དཀའ་ངལ་མང་པོ་མྱོང་ཚོར་བྱུང་བར་གཞིགས་ཏེ་གདན་ས་གསུམ་གྱི་གྲྭ་རྒྱུན་རྣམས་ལ་ཁྲལ་རྒྱུག་མི་དགོས་པའི་དམིགས་བསལ་ཡོད་པ་དང་། ཉེ་འཁོར་ནས་ཡོང་བའི་གྲྭ་པ་རྣམས་དཔེ་ཆ་བལྟ་མཁན་ཡིན་ན་དམིགས་བསལ་ཡོད་པའི་གཏན་འབེབས་ཐོག་མར་བཟོ་གནང་མཛད། རབ་བྱུང་བཅུ་གསུམ་པའི་ལྕགས་སྦྲུལ་ཕྱི་ལོ་ ༡༧༦༡ ལོར་གྲྭ་ཚང་ལ་མེ་སྐྱོན་བྱུང་སྟེ། དེ་མོ་བདེ་ལེགས་རྒྱ་མཚོས་གསར་བཞེངས་གནང་།

{{#arraymap:སེར་སྨད་གྲྭ་ཚང་

|; |@@@ | | }}