93606

སོ་སྐྱེ་དང་ཉན་རང་སློབ་པའི་རྟེན་འབྲེལ་འགག་རིམ་ (1)

Part of speech	མིང་ཚིག
Definition	འདིར་ཡང་ཀུན་ནས་ཉོན་མོངས་ཀྱི་རྟེན་འབྲེལ་འགག་པའི་རིམ་པ་ལ་རྣམ་བྱང་གི་རྟེན་འབྲེལ་དུ་འཇོག་པའི་ཚུལ་བཤད་ན། སོ་སོ་སྐྱེ་བོ་དང་ཉན་རང་སློབ་པ་ལ་ཡོད་པའི་རྟེན་འབྲེལ་འགག་པའི་རིམ་པ་ནི། དབུ་མ་རྩ་བ་ལས། མ་རིག་འགག་པར་གྱུར་པ་ནི། །འདུ་བྱེད་རྣམས་ཀུན་འབྱུང་མི་འགྱུར། །མ་རིག་འགག་པར་འགྱུར་བ་ནི། །ཤེས་པས་དེ་ཉིད་བསྒོམ་པས་སོ། །ཞེས་པས། མ་རིག་པ་འགགས་པས་འདུ་བྱེད་མི་འབྱུང་བ་དང་། མ་རིག་པ་འགག་པའི་རྒྱུ་ངོས་བཟུང་ནས། དེ་དང་དེ་ནི་འགག་གྱུར་པས། །དེ་དང་དེ་ནི་མངོན་མི་འབྱུང་། །སྡུག་བསྔལ་ཕུང་པོ་འབའ་ཞིག་པ། །དེ་ནི་དེ་ལྟར་ཡང་དག་འགག ། ཅེས་འདུ་བྱེད་འགགས་པས་ཡན་ལག་ཕྱི་མ་རྣམས་རིམ་གྱིས་འགག་པའི་ཚུལ་གསུངས་སོ། །ལུགས་འདི་ལ་མ་རིག་པ་འགག་པའི་རྒྱུ་དེ་ཁོ་ན་ཉིད་ཀྱི་དོན་བསྒོམ་པ་ནི་གང་ཟག་གི་བདག་མེད་རྟོགས་པའི་ལྟ་བ་བསྒོམ་པ་ཡིན་ལ། དེ་རྟོགས་པ་ལ་ཉེར་ལེན་གྱི་ཕུང་པོ་བདེན་མེད་དུ་རྟོགས་དགོས་པས། ཐེག་དམན་ཚོགས་སྦྱོར་གྱི་གནས་སྐབས་སུ་གང་ཟག་གི་བདག་མེད་བསྒོམས་ནས་མཐོང་ལམ་དུ་མངོན་གསུམ་མཐོང་བའི་ཚེ་མཐོང་སྤངས་སུ་གྱུར་པའི་མ་རིག་པ་འགག་ཅིང་། སྒོམ་སྤངས་སུ་གྱུར་པའི་མ་རིག་པ་མ་འགགས་ཀྱང་དེས་འཕེན་བྱེད་ཀྱི་ལས་སློང་བར་མི་བྱེད་དེ། བདེན་པ་མངོན་སུམ་མཐོང་བའི་ཕྱིར། སྔར་སོ་སྐྱེའི་རྟེན་ལ་འཕེན་བྱེད་ཀྱི་ལས་མང་དུ་བསགས་པས། འགྲུབ་བྱེད་ཀྱི་ལས་ཀྱིས་གསོས་བཏབ་པའི་དབང་གིས་སྐྱེ་བ་དུ་མ་ལེན་པ་ད་དུང་ཡོད་དེ། སྲིད་པ་ལན་བདུན་པ་བཞིན་ནོ། །སྒོམ་ལམ་གྱི་གནས་སྐབས་སུ་མཐོང་སྤངས་ཀྱི་མ་རིག་པའི་རྐྱེན་གྱིས་ཡན་ལག་ཕྱི་མ་འགགས་ཟིན་ཀྱང་སྔར་སོ་སྐྱེའི་རྟེན་ལ་སྒོམ་སྤང་གི་མ་རིག་པའི་རྐྱེན་གྱིས་འདུ་བྱེད་འགགས་པའི་དབང་གིས་བྱུང་བའི་ཡན་ལག་ཕྱི་མ་རྣམས་ནི་མ་འགགས་ལ། བསྒོམ་ལམ་སྐད་ཅིག་མ་ཐ་མས་སྒོམ་སྤང་གི་མ་རིག་པ་བཅོམ་པའི་རྗེས་སུ་ནི་སྒོམ་སྤང་གི་མ་རིག་པའི་རྐྱེན་གྱིས་བྱུང་བའི་ཡན་ལག་ཕྱི་མ་རྣམས་ཀྱང་མི་འབྱུང་བར་ཤེས་པར་བྱའོ། །བྱང་སེམས་ལ་ནི་མཐོང་ལམ་སྐྱེས་པའི་ཚེ་སྔར་གྱི་མཐོང་སྤང་དང་བསྒོམ་སྤངས་ཀྱི་མ་རིག་པ་ཐམས་ཅད་ཅིག་ཆར་འགགས་པས་ལས་དང་ཉོན་མོངས་ཀྱི་དབང་གིས་སྐྱེ་འཆི་སྤངས་པ་ནི་རྒྱུད་བླ་མ་སོགས་ཚད་ལྡན་གྱི་གཞུང་རྣམས་ལས་གསུངས་ཏེ་གཞན་དུ་བཤད་ཟིན་ཏོ་ཞེས་ཀུན་མཁྱེན་གོ་རམས་པའི་རྟེན་འབྲེལ་རབ་གསལ་ལས་སོ། །
Domain	ཆོས་ལུགས།