94088

སྐབས་དང་པོའི་སྦྱོར་ལམ་གྱི་ངོ་བོ་བློ་རིག་ངོས་འཛིན་ཚུལ་ (1)

Part of speech	མིང་ཚིག
Definition	མདོ། ཕར་ཕྱིན། རང་གི་ལུགས་ནི་ཤེས་རབ་གསུམ་གྱིས་གོམས་པར་བྱས་པའི་རང་རིག་མངོན་སུམ་ཡིན་ཏེ། དཔེར་ན་འདོད་ཆགས་ལ་སོགས་པ་གོམས་པའི་རང་རིག་བཞིན་ནོ། །ཞེས་ཆོས་རྗེ་ས་པཎ་གྱི་ཐུབ་པ་དགོངས་གསལ་ལས་སོ། ། རྟོག་གེ་པ་ལྟར་ན་རྟོགས་ཟིན་གྱི་དོན་ལ་འཇུག་པའི་དྲན་པ་ཡིན་ཞིང་ཚད་མ་མིན་ནོ་ཞེས་བཞེད་ལ། དབུ་མ་པས་ནི་ཚད་མ་སྟེ། ཆོས་ཉིད་ཀྱི་དོན་ལ་མི་བསླུ་བའི་ཕྱིར་རོ། །མི་བསླུ་བ་ཙམ་གྱིས་ཚད་མར་གྲུབ་ཀྱི། ཡུལ་སྔར་མེད་གསར་དུ་རྟོགས་པ་ནི་མི་དགོས་སོ། །པྲ་མ་ན་ཞེས་པ་ལ་མ་ན་ནི་འཇལ་བ་སྟེ་བྱིངས་སོ། །པྲ་ནི་ཉེར་བསྒྱུར་རོ། །དེ་ཡང་པྲ་ཀ་ར་ཞེས་པ་དང། པྲཛྙཱ་ཞེས་པ་རབ་ལ་འཇུག་པ་དང། པྲ་ཏིཙྪ་ཞེས་པ་སོ་སོ་ལ་འཇུག་པ་དང་དང་པོ་ལ་འཇུག་པ་རྣམས་ལས། རྟོག་གེ་པས་འདི་དང་པོ་ལ་འཇུག་པར་བཞེད་ལ། དབུ་མ་པས་རབ་ལ་འཇུག་པར་འདོད་པས་རབ་ཏུ་འཇལ་བས་ན་ཚད་མ་ཞེས་བྱའོ། །ཞེས་ཀུན་མཁྱེན་རོང་སྟོན་གྱི་ཟབ་དོན་གནད་ཀྱི་ཟླ་འོད་ལས་སོ། ། འདི་བསྟན་སྦྱོར་ལམ་གྱི་ངོ་བོ་བློ་རིག་གང་ཡིན་དཔྱད་པ་ལ། རྣལ་འབྱོར་མངོན་སུམ་དུ་འདོད་པ་ནི་སྔ་མ་ཕལ་ཆེར་གྱིས་བཀག་ཅིང་དོན་ལ་ཡང་མི་གནས་སོ། །གཞན་དག་རང་རིག་མངོན་སུམ་དུ་འདོད་པ་ནི་ཤེས་པ་ཐམས་ཅད་རང་གི་ངོ་བོ་ལ་རང་རིག་མངོན་སུམ་ཡིན་པ་ཙམ་ལ་དགོངས་སོ། །འཐད་པའི་ཕྱོགས་ནི་རྒྱུན་ཞུགས་སོགས་ཀྱི་རྟོགས་པ་སྔོན་དུ་སོང་བའི་དབང་དུ་བྱས་པ་དང། མ་སོང་བའི་དབང་དུ་བྱས་པ་དང་གཉིས་ལས། དང་པོ་ལྟར་ན་རྣལ་འབྱོར་མངོན་སུམ་ཡིན་པ་ཡང་ཡོད་དེ། སྔར་གྱི་ཉོན་སྒྲིབ་ཀྱི་ལྷག་མ་སྤོང་དགོས་པས་གང་ཟག་གི་བདག་མེད་སྒོམ་པའི་ཚེ་དེ་མངོན་སུམ་དུ་རྟོགས་པ་ཡིན་པའི་ཕྱིར་དང་། དགྲ་བཅོམ་གྱི་རྟོགས་པ་སྔོན་སོང་ལ་ཡང་རེས་འགའ་མངོན་དུ་འགྱུར་སྲིད་པའི་ཕྱིར། གལ་ཏེ་དེ་དག་བྱང་སེམས་ཀྱི་སྦྱོར་ལམ་མ་ཡིན་ནོ་སྙམ་ན་བྱང་སེམས་སྦྱོར་ལམ་པའི་རྒྱུད་ཀྱི་གཞི་ཤེས་ཀྱི་རྣམ་པ་སྒོམ་པའི་བློ་ཡིན་པས་རྣམ་རྫོགས་སྦྱོར་བར་འབད་མེད་དུ་གྲུབ་ལ། བྱང་སེམས་སྦྱོར་ལམ་པའི་རྒྱུད་ཀྱི་རྣམ་རྫོགས་སྦྱོར་བ་ལ་བྱང་སེམས་ཀྱི་སྦྱོར་ལམ་མ་ཡིན་པ་མི་སྲིད་དོ། །གཉིས་པ་ལྟར་ན་ཐེེག་པ་གསུམ་ཆར་འཐོབ་པའི་རྒྱུར་གྱུར་པའི་ཐེག་པ་གསུམ་གྱི་རྟོགས་རིགས་སུ་གྱུར་པའི་སྦྱོར་ལམ་རྣམས་ནི་སྒྲ་དོན་འདྲེས་འཛིན་གྱི་རྟོག་པ་ཁོ་ན་ཡིན་ཏེ། བདག་མེད་གསུམ་པོ་དོན་སྤྱིའི་ཚུལ་གྱིས་རྟོགས་པའི་བློ་ཡིན་པའི་ཕྱིར་རོ། །དམན་ལམ་སྔོན་དུ་མ་སོང་བ་ལ་ཡང་སྦྱོར་ལམ་ཐམས་ཅད་ནི་དེར་མ་ངེས་ཏེ། བྱང་སེམས་སྦྱོར་ལམ་པའི་རྒྱུད་ཀྱི་གཞན་སེམས་ཤེས་པའི་མངོན་ཤེས་དེ་བྱང་སེམས་ཀྱི་སྦྱོར་ལམ་དུ་ཁས་ལེན་དགོས་པའི་ཕྱིར་རོ། །ཞེས་ཀུན་མཁྱེན་གོ་རམས་པའི་སྦས་དོན་ཟབ་མོ་ལས་སོ། །
Domain	ཆོས་ལུགས།