94470

སྐུ་འབུམ་དགོན་ཐུབ་བསྟན་མེ་ཏོག་ཆོས་གླིང་ (1)

Part of speech

མིང་ཚིག

Definition

སྤྱན་སྔ་རས་པ་དཀར་པོས་རབ་བྱུང་བཞི་པའི་མེ་ཕོ་སྤྲེལ་ཕྱི་ལོ་ ༡༢༣༦ ལོ་ལ་བླ་མ་དམ་པ་འགྲོ་མགོན་ཏི་ཤྲཱི་རས་ཆེན་མྱ་ངན་ལས་འདས་པའི་གཤེགས་རྫོང་ལ་སོགས་ཕྱི་ནང་རྟེན་གསུམ་གྱི་རིམ་པ་རྣམས་གྲུབ་པར་མཛད་ཅིང༌། སྐུ་འབུམ་གྱི་མཆོད་རྟེན་ཆེན་མོ་དེ་བཞེངས་པའི་རྩར་སྒར་པ་བསྡད་པ་ལ་བརྟེན་ནས། མཁའ་དེལ་བྱ་བའི་དིལ་འབུར་གཅིག་གི་སྟེང་དུ། གཟིམས་ཁང་ནང་སོ་ཆེན་མོ་བརྩིགས་ཤིང༌། དགོན་པ་དེར་བཏབ་པས་དགོན་པའི་མིང་ཡང་སྐུ་འབུམ་རྩ་ཞེས་གྲགས་སོ། དེ་ནས་ཧོར་སེ་ཆེན་རྒྱལ་པོའི་རྒྱལ་བུ་གཽ་པེ་ལར་གྲགས་པའི་དུས་ཟླ་རྒྱུད་དུ་དམག་དྲངས་ནས་མདོ་སྨད་དུ་བྱོན། རས་པ་དཀར་པོ་དཔོན་སློབ་དང་གུང་པ་ཨའུ་སོགས་མཇལ་དུ་ཕེབས་ཤིང༌། སྐུ་འབུམ་ཆེན་མོའི་དོན་དུ་གཙུག་ལག་ཁང་བཞེངས་པའི་བཀའ་ལུང་ཞུས་པས། རས་པ་དཀར་པོ་ལྷ་ཆོས་ཀྱི་བླ་མ་དང༌། གུང་སྒོམ་ཨའུ་མི་ཆོས་ཀྱི་དཔོན་དུ་སྐོས། གནས་དྲུག་ཁྲི་སྐོར་བཅུ་གཉིས་མངའ་འབངས་སུ་ཕུལ། གཙུག་ལག་ཁང་བཞེངས་པའི་ལུང་དང༌། ཁྲོ་ཐམ་ཆེན་མོ། གོས་དར་གསེར་དངུལ་སོགས་འབུལ་བ་རྒྱ་ཆེན་མཛད། ཡར་ཕེབས་ཏེ་གནས་དྲུག་ཁྲི་སྐོར་མངའ་ཞབས་སུ་བསྡུས། མེ་ཉག་ཡུལ་ནས་ཤིང་བཟོ་བ་དང་རྡོ་བཟོ་བ་བོས་ཏེ་ལྷ་ཁང་ནང་སོ་ཆེན་མོ་ཞེས་པ་ཀ་བ་བརྒྱ་དང་ཉི་ཤུའི་མལ་ཐོག་གསུམ་བྱ་འདབ་གསེར་གྱི་གཉྫི་ར་ཁྱམས་སྐོར་ལམ་དང་བཅས་ པ་འགྲན་གྱི་ཟླ་དང་བྲལ་བ་རྒྱ་ཕིགས་སུ་བཞེངས། ཐོག་བར་མར་བཀའ་བརྒྱུད་དང་རྒྱུད་སྡེའི་ལྷ་རིས་འོག་མར་ཟངས་གསེར་གྱི་ཐུབ་ཆེན་སོགས་རྟེན་མཆོད་ཀྱི་རིམ་པ་བསམ་ལས་འདས། ལྷ་མཁར་གྱི་ཐད་ཀྱི་བྲག་མགོར་རྡོ་མཁར་གྱི་ཕོ་བྲང་སོགས་མཛད། དགེ་འདུན་སྟོང་ཕྲག་ཕྱེད་གཉིས་ཙམ་འཚོགས་དེ་དག་ཐམས་ཅད་ཀྱང་ཕྱི་དགེ་སློང་ཞི་དུལ་གྱིས་སེམས་ཅན་གྱི་དང་བ་འདྲེན་པ། ནང་སྔགས་ཀྱི་བསྐྱེད་རིམ་དང་ལྡན་པ། གསང་བ་བྱང་སེམས་ཀྱི་འགྲོ་བ་ཐར་ལམ་ལ་བཀོད་པ། དེ་ཁོ་ན་ཉིད་ཕྱག་ཆེན་གྱི་དངོས་གྲུབ་ཐོབ་པ་ཤ་སྟག་གོ ། ལྷ་ནང་ཚུལ་གསུམ་གྱི་སྐུ་དུས་སུ་གདན་ས་སྐུ་འབུམ་དུ་བླ་མ་དགེ་བའི་བཤེས་གཉེན་དགེ་འདུན་པ་ཁྲི་ཕྲག་ལས་མི་ཉུང་ཞིང་ཕྱོགས་ཀྱི་མི་སྣ་སྐྱེ་བོ་ཕོ་མོའི་འདུ་བ་བསམ་གྱིས་མི་ཁྱབ་པའི་ཆོས་སྲིད་དང་ཆབ་སྲིད་ཆེར་རྒྱས་པའང་མདོ་ཁམས་སྒང་འདིར་འདི་ལས་ལྷག་པ་མ་བྱུང་ཞིང་དཔལ་ལྡན་འབའ་རོམ་པའི་བསྟན་པའི་རྩ་ལག་ཆེན་པོ་རྨད་དུ་བྱུང་བ་ཞིག་སྟེ་འདི་སྐབས་ཀྱི་མཚན་ལ་རས་ཚང་སྒོམ་སྡེ་ཞེས་ཡོངས་སུ་གྲགས་ཤིང་གྲུབ་པ་ཉིད་དོ། །