96488

སྒྲ་རྟོག་གི་གཞན་སེལ་ (1)

Part of speech	མིང་ཚིག
Definition	རྗོད་བྱེད་ཀྱི་སྒྲས་བཞག་པའི་གཞན་སེལ་གྱི་མཚན་ཉིད་ནི། གཞན་སེལ་གང་ཞིག རང་གི་ཡུལ་ཅན་གྱི་སྒྲས་རང་མིན་རྣམ་པར་བསལ་ཙམ་གྱི་ཆ། དཔེ་ནི། བུམ་པ་ཞེས་བརྗོད་པའི་སྒྲའི་དངོས་ཀྱི་བརྗོད་བྱར་གྱུར་པའི་བུམ་མིན་བསལ་ཙམ་ལྟ་བུ་ལ་བྱ། བློས་བཞག་པའི་གཞན་སེལ་གྱི་མཚན་ཉིད་ནི། གཞན་སེལ་གང་ཞིག རང་གི་ཡུལ་ཅན་གྱི་རྟོག་པས་དེ་མིན་རྣམ་པར་བསལ་ཙམ་ལ་དེར་སྒྲོ་བཏགས་པའི་ཆ། དཔེ་ནི་བུམ་འཛིན་རྟོག་པ་ལ་བུམ་པར་སྣང་བ་ལ་ཕྱི་རོལ་གྱི་བུམ་པར་སྒྲོ་བཏགས་པའི་ཆ་ལྟ་བུའོ། །དེ་རེ་རེ་ལ་མེད་པར་དགག་པ་དང་། མ་ཡིན་པར་དགག་པའི་དབྱེ་བ་གཉིས་གཉིས་སོ། །དེ་གང་ཞེ་ན། བུམ་པ་ཞེས་བརྗོད་པའི་སྒྲའི་དངོས་ཀྱི་བརྗོད་བྱར་རློམ་ཚོད་དང་སོང་ཚོད་གཉིས་ཀ་བུམ་མིན་རྣམ་པར་བསལ་ཙམ་དེ་ཁོ་ན་ཡིན་ལ། བུམ་པས་དག་པའི་ས་ཕྱོགས་ཞེས་བརྗོད་པའི་སྒྲའི་དངོས་ཀྱི་བརྗོད་བྱར་སོང་ཚོད་ནི། ས་ཕྱོགས་མིན་པ་རྣམ་པར་བསལ་ཙམ་གྱི་མེད་པར་དགག་པ་དེ་ཉིད་ཡིན་ལ། རློམ་ཚོད་ནི་བུམ་པ་བཀག་ཤུལ་དུ་འཕངས་པའི་ས་ཕྱོགས་དེ་ཉིད་དོ། །ཡང་བུམ་འཛིན་རྟོག་པའི་ངོར་བུམ་མིན་རྣམ་པར་བསལ་ཙམ་དེ་མེད་དགག་གི་ཆ་ཡིན་ལ། དེ་ལ་ཕྱི་རོལ་དོན་དུ་ཞེན་པའི་ཆ་ནི། མ་ཡིན་པར་དགག་པའི་སེལ་བའོ། །ཞེས་བྱ་བ་འདི་ནི་སྒྲ་བློའི་སེལ་བ་གཉིས་ཀྱི་ངོས་འཛིན་པའི་ཚུལ་གྱི་རྣམ་གྲངས་གཅིག་ཡིན་ལ། རྣམ་གྲངས་གཉིས་པ་ནི། བུམ་པ་ཞེས་བརྗོད་པའི་སྒྲའི་དངོས་ཀྱི་བརྗོད་བྱར་སོང་ཚོད་དེ་བུམ་པ་ལ་ལྟོས་པའི་སྒྲ་སེལ་གྱི་མཚན་ཉིད། བུམ་འཛིན་རྟོག་པའི་དངོས་ཀྱི་ཡུལ་དུ་སོང་ཚོད་དེ། བུམ་པ་ལ་ལྟོས་པའི་བློ་སེལ་གྱི་མཚན་ཉིད། དེ་གཉིས་ཀའི་མཚན་གཞི་བུམ་པའི་དོན་སྤྱིའོ། །ཞེས་པཎ་ཆེན་ཤཱཀ་མཆོག་གི་རྟོག་གེ་འཁྲུལ་འཇོམས་ལས་སོ། །
Domain	ཚད་མ།