96708

སྒྲུབ་པའི་ཆེད་དུ་བྱ་བ་སེམས་ཆེན་པོ་ (1)

Part of speech	མིང་ཚིག
Definition	མདོ། ཕར་ཕྱིན། སེམས་ཆེན་པོ་ནི་མི་ཕྱེད་པ་རྡོ་རྗེ་ལྟ་བུའི་སེམས་བསྐྱེད་དང་། རྒྱུན་མི་འཆད་པ་རླབས་པོ་ཆེའི་སེམས་སོགས་སོ། །མདོ་ལས་སེམས་ཅན་གྱི་ཕུང་པོ་ཆེན་པོ་དང་སེམས་ཅན་གྱི་སྡེ་ཆེན་པོ་ཀུན་གྱི་མཆོག་ཉིད་དུ་བྱེད་པར་འགྱུར་བ་དེའི་ཕྱིར་སེམས་ཆེན་པོ་ཞེས་བྱའོ། །ཞེས་སོ། །འདི་ལ་གནས་སྐབས་དང་མཐར་ཐུག་གི་དབྱེ་བ་གཉིས་ལས། དང་པོ་ནི་ཚོགས་ལམ་ནས་ཀྱང་ལྡན་པར་འཕགས་པས་བཤད་ལ། གཉིས་པ་ནི་སངས་རྒྱས་ཀྱི་ས་ཁོ་ནར་བཟུང་ངོ་། །ཞེས་ཀུན་མཁྱེན་རོང་སྟོན་གྱི་རྣམ་བཤད་ཚིག་དོན་རབ་གསལ་ལས་སོ། ། ཀུན་མཁྱེན་གོ་རམས་པས། སེམས་ཆེན་པོའི་མཚན་ཉིད་ནི། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་སེམས་བསྐྱེད་དོ། །ཞེས་དང་། ས་མཚམས་ལ། འཕགས་གྲོལ་གྱིས། ཆེན་པོ་གསུམ་རེ་རེ་ལའང་གནས་སྐབས་དང་མཐར་མཐུག་གི་དབང་དུ་བྱས་པ་གཉིས་གཉིས་ཡོད་པའི་དང་པོ་ཐེག་ཆེན་གྱི་ཚོགས་ལམ་ན་ཡོད་ལ། ཕྱི་མ་སངས་རྒྱས་ཀྱི་ས་ཁོ་ནར་ཡོད་དོ་ཞེས་གསུངས་སོ། །ཆེད་དུ་བྱ་བ་མཚན་ཉིད་པ་ནི་ཕྱི་མ་ཁོ་ན་སྟེ། ཆེན་པོ་གསུམ་གང་རུང་ཡིན་ན། རང་རྒྱུད་ལྡན་གྱི་གང་ཟག་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་ཆོས་ཡིན་དགོས་པའི་ཕྱིར་རོ། །ཞེས་ཡུམ་དོན་རབ་གསལ་ལས་གསུངས་སོ། ། པཎ་ཆེན་ཤཱཀྱ་མཆོག་གིས། རང་གང་ལ་ལྡན་པའི་གང་ཟག་དེ་སེམས་ཅན་ཀུན་གྱི་ནང་ནས་མཆོག་ཉིད་དུ་བྱེད་པའི་བྱེད་ཆོས་དེ་དེར་བྱེད་པའི་སེམས་བསྐྱེད་དེ། སེམས་ཆེན་པོའི་མཚན་ཉིད་དོ། །ཞེས་རྒྱན་འགྲེལ་ལུང་རིགས་རོལ་མཚོ་ལས་གསུངས་སོ། །
Domain	ཆོས་ལུགས།