96837

སྒྲོ་འདོགས་ཀྱི་མེད་མཐའ་ (1)

Part of speech	མིང་ཚིག
Definition	མདོ། དབུ་མ། མེད་མཐའ་ལ་གཉིས་ཡོད་པའི་ནང་གསེས་ཤིག་སྟེ། མཁས་གྲུབ་བསྟན་དར་བའི་དབུ་མའི་མཐའ་དཔྱོད་ལས། མེད་མཐའ་ལ་སྒྲོ་འདོགས་ཀྱི་མེད་མཐའ་དང༌། སྐུར་འདེབས་ཀྱི་མེད་མཐའ་གཉིས་ལས་སྔ་མ་བདེན་མེད་བདེན་གྲུབ་ལྟ་བུ་དང༌། དེར་འཛིན་པའི་རྟོག་པ་ལྟ་བུ་མེད་པའི་སྒྲོ་འདོགས་ཀྱི་མཐར་འཛིན་ཡིན་ཏེ། རྩ་ཤེ་ཊཱིཀ་ཆེན་ལས། དགག་བྱ་བཀག་པའི་མེད་པ་ཡང་དག་པར་ཡོད་དོ་ཞེས་འཛིན་པ་དངོས་པོ་མེད་པའི་མཐར་ལྟུང་བ་ཡིན་པས་དེ་འགོག་པ་ཡང་མེད་མཐའ་འགོག་པ་ཡིན་ནོ། །ཞེས་གསུངས་པའི་ཕྱིར། རྟོག་པ་དེས་བདེན་མེད་མེད་པར་མི་འཛིན་ཀྱང༌། དེ་མེད་པའི་མཐར་འཛིན་དུ་འཇོག་པའི་རྒྱུ་མཚན་ཡོད་དེ། དེ་ལྟར་བཟུང་བས་འཛིན་པ་པོའི་གང་ཟག་དེས་བདེན་མེད་གཏན་མེད་དུ་ཁས་ལེན་དགོས་པའི་རྒྱུ་མཚན་གྱིས་དེ་ལྟར་བཤད་པའི་ཕྱིར། དེ་ལ་ཁོ་ན་རེ། བདེན་མེད་བདེན་གྲུབ་ཆོས་ཅན། ཡོད་མཐའ་མ་ཡིན་པར་ཐལ། མེད་མཐའ་ཡིན་པའི་ཕྱིར་ཟེར་ན། མྱུ་གུ་རང་བཞིན་གྱིས་གྲུབ་པ་དུས་སྐད་ཅིག་གཉིས་པར་མེད་པ་ཆོས་ཅན། ཡོད་མཐའ་མ་ཡིན་པར་ཐལ། མེད་མཐའ་ཡིན་པའི་ཕྱིར། རྟགས་དེར་ཐལ། རྩ་ཤེ་ལས། སྔོན་བྱུང་ད་ལྟར་མེད་ཅེས་པ། །དེས་ན་ཆད་པར་ཐལ་བར་འགྱུར། །ཞེས་གསུངས་པའི་ཕྱིར། རྩ་བར་འདོད་མི་ནུས་ཏེ། རྩ་ཤེ་ལས། གང་ཞིག་རང་བཞིན་གྱིས་ཡོད་པ། །དེ་ནི་མེད་ཉིད་མི་འགྱུར་རོ། །ཞེས་གསུངས་པའི་ཕྱིར། ཞེས་གསུངས།
Domain	ཆོས་ལུགས།