96845

སྒྲོ་འདོགས་སེལ་ཚུལ་ (1)

Part of speech	མིང་ཚིག
Definition	ངེས་དང་སྒྲོ་འདོགས་ཞེན་ཡུལ་གཅིག ། ཞེན་སྟངས་ཐ་དད་ཕྱིར་ན་སེལ། །ཞེས་བྱ་བ། མངོན་སུམ་དངོས་ཀྱིས་སྒྲོ་འདོགས་མི་གཅོད་ཀྱང་དེས་དྲངས་པའི་ངེས་ཤེས་དང་རྗེས་དཔག་གི་ངེས་པ་གཉིས་པོ་དང་། སྒྲོ་འདོགས་གཉིས་དམིགས་པར་བྱ་བའི་ཡུལ་གཅིག་པས་བསལ་བྱ་སེལ་བྱེད་དུའང་འཐད་ལ། འཛིན་སྟངས་ཐ་དད་ལས་སྒྲོ་འདོགས་འཁྲུལ་པ་དང་། ཚད་མ་མ་འཁྲུལ་བ་འཐད་དེ། ཚད་མའི་ཡུལ་ཡོད་ཅིང་སྒྲོ་འདོགས་ཀྱི་ཡུལ་མེད་པའི་ཕྱིར་རོ། །དེ་བཞིན་དུ་ཐག་པ་ལ་སྦྲུལ་དུ་འཁྲུལ་པ་ན་ཚད་མའི་ཡུལ་ཁྲ་བོ་ཉིད་ཡིན་ནོ། །ཐག་པར་མི་བརྗོད་དེ་དེའི་ལྡོག་པ་མ་ངེས་པའི་ཕྱིར་དང་། སྦྲུལ་དུ་མི་བརྗོད་དེ་དེ་ན་མི་གནས་པའི་ཕྱིར་རོ། །དེས་ན་མངོན་སུམ་གྱིས་སྒྲོ་འདོགས་བཅད་ཅེས་བརྗོད་ཀྱང་མངོན་སུམ་མ་ཡིན་གྱི་དེའི་རྗེས་སུ་སྐྱེས་པའི་རྟོག་པས་བཅད་པ་ཡིན་ཏེ། ཀུ་ཤ་ལག་པས་བཟུང་ནས་ཟོར་བས་གཅོད་པ་བཞིན་ནོ། །ཞེས་གསུངས་ལ། འོ་ན་ངེས་པས་སྒྲོ་འདོགས་མི་སེལ་བར་འགྱུར་རམ་ཞེ་ན། ཕྲད་ནས་སེལ་བ་མེད་ཀྱང་བློའི་རྒྱུན་གཅིག་ལ་དང་པོ་སྒྲོ་འདོགས་སྐྱེས་ནས་ཕྱིས་ཚད་མ་ལས་བྱུང་བའི་ངེས་པ་སྐྱེས་པས་སྒྲོ་འདོགས་ཀྱི་རྒྱུན་སྐྱེ་མ་ནུས་པ་ཉིད་ལ་སྒྲོ་འདོགས་བསལ་ཞེས་ཐ་སྙད་འཇོག་པ་ཡིན་ནོ། །དེ་བཞིན་དུ་སྤང་བྱ་དང་གཉེན་པོ་ལ་སོགས་པ་རྒྱུན་གཅིག་ལ་གནོད་བྱ་གནོད་བྱེད་ཐ་དད་སྔ་ཕྱི་བའི་རྣམ་པར་གཞག་པ་ཐམས་ཅད་འདི་ཡིན་ནོ། །ཚ་རེག་གྲང་རེག་ལ་སོགས་པ་རྫས་ཐ་དད་དུས་མཉམ་པ་ལ་ནི་སྐད་ཅིག་དང་པོ་ལ་ཕྲད། གཉིས་པ་ལ་ནུས་མེད་དུ་བྱས། གསུམ་པ་ལ་སྤང་བྱ་ལྡོག་གོ ། ཞེས་འཇམ་མགོན་ས་པཎ་གྱི་རིགས་གཏེར་རང་འགྲེལ་ལས་སོ། །
Domain	ཚད་མ།