97068

སྔགས་ཀྱི་ཐེག་པའི་ཁྱད་ཆོས་ (1)

Part of speech	མིང་ཚིག
Definition	ས་སྐྱ། གསང་སྔགས་ཀྱི་ཐེག་པ་འདི་ཐེག་པ་ཆེན་པོ་དབུ་མ་ལས་ཁྱད་པར་ཅི་ཞིག་ཡོད་པ་བསྟན་ཅེ་ན། རྣམ་པ་བཅུ་གཅིག་གིས་ཁྱད་པར་དུ་འཕགས་སོ། །ཞེས་པའི་དང་པོ་ནི། དགྱེས་པ་རྡོ་རྗེ་ལ་སོགས་པའི་རྒྱུད་སྡེ་བསམ་གྱིས་མི་ཁྱབ་པ་ལ་དམིགས་པའོ། །གཉིས་པ་ནི། བསྐྱེད་པའི་རིམ་པ་ལ་བརྟེན་ནས་ལུས་ཀྱི་བཀོད་པ་སྣ་ཚོགས་པ་དང། ཏིང་ངེ་འཛིན་གྱི་སྟོབས་ཀྱིས་ཀྱང་སྟོན་ནུས་པའོ། །གསུམ་པ་ནི། རྒྱུ་དང། ངོ་བོ་དང། ལས་དག་པ་ཡེ་ཤེས་མྱུར་དུ་འགྲུབ་པའོ། །བཞི་པ་ནི། དམ་ཚིག་རྣམ་པར་དག་པའི་དབང་གིས་བརྩོན་འགྲུས་ཆེན་པོ་མྱུར་དུ་བརྩམ་པའོ། །ལྔ་པ་ནི། མཚམས་མེད་པ་ལྔ་བྱེད་པ་ལ་སོགས་པ་ཐེག་པ་གཞན་དུ་སྤངས་པ་རྣམས་ཀྱང་འདིར་འགྲུབ་པར་འགྱུར་བའོ། །དྲུག་པ་ནི། ལྷ་མཆོད་པའི་ཚུལ་དང་བདེ་བ་ལ་བརྟེན་པའི་རྫོགས་རིམ་ལ་སོགས་པའོ། །བདུན་པ་ནི། ད་ལྟ་ཉིད་ནས་སངས་རྒྱས་ཀྱིས་དབང་བསྐུར་ཞིང་བྱིན་གྱིས་བརླབ་པའོ། །བརྒྱད་པ་ནི། ཚེ་འདི་དང་སྐྱེ་བ་བདུན་ནམ། བཅུ་དྲུག་ན་ངེས་པར་འཚང་རྒྱ་བའོ། །དགུ་པ་ནི། དབྱིབས་དང་ཁ་དོག་གི་དམ་ཚིག་གིས་ཉོན་མོངས་པ་རང་བཞིན་གྱིས་གྲོལ་བའོ། །བཅུ་པ་ནི། བསྐྱེད་རིམ་གྱིས་དམིགས་པས་ཐ་མལ་གྱི་སྣང་བ་འགགས། གསང་སྔགས་བཟླས་པས་ངག་རྒྱལ་བའི་བཀར་འགྱུར། ཐུགས་ཀྱི་རྣལ་འབྱོར་གྱིས་ཆོས་ཐམས་ཅད་སྒྱུ་མ་ལྟ་བུར་ཤེས་ཤིང་ཉོན་མོངས་པ་ཚད་མེད་པ་སྤོང་བའོ། །བཅུ་གཅིག་པ་ནི། དཀའ་ཐུབ་སྡོམ་པ་མི་བཟད་པ། །བསྟེན་པས་འགྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བརྟེན་ན་མྱུར་དུ་འགྲུབ་པར་འགྱུར། །ཞེས་པ་ལྟར་འདོད་པའི་ལོངས་སྤྱོད་ཐམས་ཅད་ལ་རྣམ་པར་རྟོག་པ་སྤངས་ནས་སྤྱོད་པའོ། ། རྗེ་བཙུན་ས་སྐྱ་པ་རྣམས་ཀྱིས་ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང། །ཐབས་མང་དཀའ་བ་མེད་པ་དང། །དབང་པོ་རྣོན་པོའི་དབང་བྱས་ནས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར་བཞེད་དེ། རྒྱུད་སྡེ་སྤྱིའི་རྣམ་གཞག་ཏུ་བལྟ་བར་བྱའོ་ཞེས་ཀུན་མཁྱེན་གོ་རམས་པའི་སྡོམ་གསུམ་རྣམ་བཤད་གསུང་རབ་དགོངས་གསལ་ལས་སོ། །
Domain	ཆོས་ལུགས།