98045

སྟག་སྣ་སྐུ་ཕྲེང་གསུམ་པ་ངག་དབང་བཀྲ་ཤིས་བདེ་ཆེན་རྡོ་རྗེ་ (1)

Part of speech

མིང་ཚིག

Definition

ཁོང་ནི། ལ་དྭགས་དཔེ་ཐུབ་རྒྱ་ཞུད་ཚང་དུ། ཡབ་བློ་བཟང་བསྟན་པ་དང༌། ཡུམ་ཡེ་ཤེས་དཔལ་མོ་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ཤིང་སྤྲེལ་ཕྱི་ལོ་ ༡༨༨༤ ལོར་འཁྲུངས། སྐྱབས་རྗེ་ལ་དྭགས་བ་ཀུ་ལ་གོང་མས་སྤྲུལ་སྐུའི་ངོས་འཛིན་གནང༌། སྐྱབས་མགོན་སྟག་ཚང་སྐུ་ཕྲེང་ལྔ་པ། ངག་དབང་འཇམ་དཔལ་དགེ་ལེགས་རྒྱལ་མཚན་གྱི་དྲུང་དུ། གཙུག་ཕུད་ཕུལ་ཏེ། མཚན་ངག་དབང་བཀྲ་ཤིས་བདེ་ཆེན་རྡོ་རྗེར་གསོལ། ཧེ་མིར་ཆོས་ཞུགས་མཛད་ནས་དགུང་ལོ་བཅུ་དྲུག་ལ་རྒྱུགས་ཐོན་གྱི་གཏོང་སྒོ་གནང༌། དེ་ནས་སྟག་སྣའི་དབུ་ཆོས་འདུས་སྤྱི་དང་འགོ་པ་ཡུལ་མི་རྣམས་ནས་བླ་མར་དགོས་ཞེས། སྐྱབས་རྗེ་སྟག་རས་རིན་པོ་ཆེ་དང་ཧེ་མཛོད་ལ་སྙན་ཞུ་ཕུལ་བས། དེ་བཞིན་ཆོག་པའི་བཀའ་ཕེབས་པར་བརྟེན། ཉེར་གསུམ་པ་མེ་རྟ་ལོར་དཔལ་སྟག་སྣ་རྡོ་རྗེ་གདན་དུ་མཁན་པོའི་ཁྲིར་མངའ་གསོལ་མཛད། གོང་མའི་སྐུ་ཚ་དགེ་རྒན་དོན་གྲུབ་རྡོ་རྗེས་ཤངས་ལེན་གཟབ་རྒྱས་ཞུས། སྟག་སྣ་དགོན་གྱི་འཛིན་སྐྱོང་གནང་ནས་ལོ་མང་བཞུགས། སོ་གསུམ་ལ་ལྷོ་འབྲུག་ཏུ་ཆོས་ཞུགས་ཕེབས་ཁར། དགེ་སློང་ངག་དབང་ཕྲིན་ལས་གདན་སའི་བླ་ཚབ་དང༌། ཟངས་དཀར་འབར་གདན་དུ་དགེ་ནོར་བུ་ཞུ་བ་བླ་ཚབ་བསྐོས་ཤིང༌། གར་ཞའི་ཕྱོགས་ཀྱི་དགོན་པ་རྣམས་ལའང་བླ་མ་རེ་མངགས་ནས། ཞོར་དུ་རྒྱ་གར་དུ་གནས་སྐོར་མཛད་དེ་འབྲུག་ཏུ་བྱོན། དེར་ཞབས་དྲུང་མཆོག་སྤྲུལ་རིན་པོ་ཆེ་སོགས་བླ་མ་དུ་མའི་སྐུ་མདུན་ནས་དབང་ཁྲིད་ལུང་གསུམ་སོགས་གསན་བསམ་གནང་བཞིན་བཞུགས་པའི་སྐབས་སུ། གློ་བུར་དུ་བར་ཆད་ཀྱི་དབང་གིས་དགུང་གྲངས་སོ་དྲུག་པ་ས་ལུག་ ༡༩༡༩ ལོའི་ཟླ་བ་དྲུག་པའི་ཚེས་བཞི་ལ་གཤེགས་སོ། །