9859

གཟུགས་མེད་ཀྱི་སྙོམས་འཇུག་ (1)

Part of speech	མིང་ཚིག
Definition	མདོ། མངོན་པ། སྤྱིའི་མཚན་ཉིད་ནི། བསམ་གཏན་དེ་བཞིན་དུ་གཟུགས་མེད་དག་ནི་རྣམ་པ་བཞི་སྟེ། དེར་སྐྱེ་བ་དག་རབ་ཏུ་བཤད། །སྙོམས་འཇུག་དགེ་བ་རྩེ་གཅིག་པ། །རྗེས་འབྲང་བཅས་ན་ཕུང་པོ་བཞི། །ཞེས་པ་སྟེ། རྗེས་སུ་འབྲང་བའི་གཟུགས་མེད་པས་སོ། །སོ་སོའི་ངོ་བོ་ནི། འོག་མའི་ས་ལས་དབེན་པ་ལས་སྐྱེས་པ་སྟེ། བསམ་གཏན་བཞི་པ་ལས་དབེན་པ་ལས་སྐྱེས་པ་ནི་ནམ་མཁའ་དང་། དེ་ལས་དབེན་པ་རྣམ་ཤེས་སོགས་སོ། །དབེན་པ་ནི་འོག་ས་ལ་འདོད་ཆགས་དང་བྲལ་བར་བྱེད་པའི་ལམ་སྟེ་ཉེར་བསྡོགས་ཡིན་ལ། དེ་ལས་སྐྱེས་པའོ། །གཟུགས་མེད་དངོས་གཞི་བཞི་པོ་ཉེར་བསྡོགས་གོང་མ་གསུམ་དང་བཅས་པར་ནི་གཟུགས་ཀྱི་འདུ་ཤེས་བཤིག་ཅེས་བྱ་བའོ། །ནམ་མཁའི་ཉེར་བསྡོགས་ནི་བསམ་གཏན་བཞི་བ་ལ་དམིགས་པའི་གཟུགས་ཀྱི་འདུ་ཤེས་དང་མ་བྲལ་བས་སོོ། །གཟུགས་མེད་པ་ན་གཟུགས་གཏན་ནས་མེད་དོ། །ཕལ་ཆེན་པ་སོགས་གཟུགས་མེད་དུ་བརྗོད་པ་ནི་དམན་པ་ལ་དགག་པའི་སྒྲ་སྦྱར་བ་ཡིན་ཞེས་འདོད་པ་ནི་མི་རིགས་ཏེ། གཟུགས་ཀྱི་རྣམ་པ་ཕྲ་བས་གཟུགས་མེད་དུ་འཇོག་ན་ཆུའི་སྲོག་ཆགས་ཕྲ་མོ་ཡང་དེར་འགྱུར་ལ། རང་བཞིན་ཕྲ་བས་ཡིན་ན་གཟུགས་ཁམས་ཀྱང་དེར་འགྱུར་རོ། །ཆེས་ཕྲ་ཞིང་དྭངས་པ་ལ་འདོད་ན་བར་སྲིད་ཀྱང་གཟུགས་མེད་དུ་ཐལ་བར་འགྱུར་རོ། །རྒྱས་པར་འགྲེལ་བར་བལྟའོ། །འོ་ན་གཟུགས་མེད་ནས་ཁམས་འོག་མར་སྐྱེ་བའི་གཟུགས་རྒྱུ་ཅི་ལས་སྐྱེ་ཞེ་ན། གཟུགས་མེད་ནི་ཁམས་འོག་མར་སྐྱེ་བའི་གཟུགས་དེ་ནི་གཟུགས་ཀྱི་རྣམ་སྨིན་གྱི་རྒྱུས་བསྒོམས་པའི་སེམས་ཀྱི་འཇུག་པ་རྙེད་པ་ལས་སྐྱེ་བར་འགྱུར་ཏེ། འདི་ནི་མདོ་སྡེ་པའི་ལུགས་སོ། །བྱེ་བྲག་སྨྲ་བ་ནི། སྔར་གྱི་འདས་པའི་གཟུགས་ལས་སྐྱེ་བར་འདོད་དོ། །ཅི་ནམ་མཁའ་མཐའ་ཡས་དང་རྣམ་ཤེས་མཐའ་ཡས་སོགས་བཞི་བོ་ནམ་མཁའ་དང་རྣམ་ཤེས་སོགས་ལ་དམིགས་པའི་མིང་དེ་སྐད་ཅེས་བྱའམ་ཞེ་ན། མིན་ཏེ། གཟུགས་མེད་དང་པོ་གསུམ་ནི་སྦྱོར་བའི་སྐབས་སུ་ནམ་མཁའ་མཐའ་ཡས་སོ། །རྣམ་ཤེས་མཐའ་ཡས་སོ། །དམིགས་པ་ཅི་ཡང་མེད་དོ་ཞེས་དེ་ལྟར་ཡིད་ལ་བྱེད་ཅིང་རབ་ཏུ་སྦྱོར་བའི་ཕྱིར་ན་སྦྱོར་བའི་མིང་གིས་བཏགས་སོ། །དངོས་གཞིའི་གནས་སྐབས་སུ་ནི་ཆོས་གཞན་ཡང་དམིགས་པ་ཡིན་ནོ། །སྲིད་རྩེ་ནི་འདུ་ཤེས་དམན་པའི་ཕྱིར་མིང་དེ་སྐད་ཅེས་བརྗོད་དེ། འདུ་ཤེས་གསལ་བའང་མེད་ལ། འདུ་ཤེས་པ་ཁོ་ནའང་མིན་པས་སོ་ཞེས་ཀུན་མཁྱེན་རོང་སྟོན་གྱི་མངོན་མཛོད་རྣམ་བཤད་ཤེས་བྱ་རབ་གསལ་ལས་སོ། །
Domain	ཆོས་ལུགས།