9929

གཟུགས་མེད་སྙོམས་འཇུག་ཉོན་མོངས་ཅན་གྱི་དམིགས་རྣམ་ (1)

Part of speech	མིང་ཚིག
Definition	མདོ། མངོན་པ། གཟུགས་མེད་ཀྱི་སྙོམས་འཇུག་ཉོན་མོངས་ཅན་གྱི་དམིགས་རྣམ་ལ་མཛོད་ཀྱི་ལུགས་དང་། ཀུན་བཏུས་ཀྱི་ལུགས་གཉིས། དང་པོ་ནི། ཁ་ཆེ་བྱེ་བྲག་ཏུ་སྨྲ་བ་རྣམས་ཀྱིས་སྙོམས་འཇུག་ཉོན་མོངས་ཅན་ཐམས་ཅད་ཀྱང་སྲེད་པ་ཤས་ཆེ་བའི་སྙོམས་འཇུག་ཁོ་ནར་འདོད་དེ། སྙོམས་འཇུག་དེ་ལ་རོ་མྱོང་མཚུངས་ལྡན་དང་། དག་པ་བ་དང་། ཟག་མེད་གསུམ་དུ་ཕྱེ་ནས་རོ་མྱོང་མཚུངས་ལྡན་སྲེད་བཅས་སོ་ཞེས་གསུངས་པའི་ཕྱིར་རོ། །ས་ན་སྲེད་པ་ཤས་ཆེ་བའི་སྙོམས་འཇུག་དེས་འོག་ས་ལ་དམིགས་པ་མེད་དེ། དེས་གང་ལ་དམིགས་པའི་ཡུལ་དེ་ལ་སྲེད་དགོས་ཤིང་། འོག་ས་ལ་འདོད་ཆགས་དང་བྲལ་ཟིན་པའི་ཕྱིར་རོ། །གོང་ས་ལ་དམིགས་པ་མེད་དེ། ཟག་བཅས་ཀྱི་ས་རྣམས་ནི་སྲེད་པས་རིས་སུ་བཅད་པ་ཡིན་པའི་ཕྱིར་རོ། །ཟག་མེད་ལ་དམིགས་པ་མེད་དེ། དེས་གང་ལ་དམིགས་པའི་ཡུལ་དེ་ལ་འདོད་པའི་ཚུལ་གྱིས་དམིགས་དགོས་ཤིང་ཟག་མེད་ལ་འདོད་པའི་ཚུལ་གྱིས་དམིགས་པའི་བློ་ཡིན་ན་དགེ་བ་ཡིན་ནོ་ཞེས་གསུངས་པའི་ཕྱིར་རོ། །དེས་ན་རང་སའི་ཟག་བཅས་ཁོ་ན་ལ་དམིགས་པའི་དབང་དུ་བྱས་ནས་སྲེད་བཅས་རང་གི་སྲིད་ལ་དམིགས་ཞེས་གསུངས་སོ། །གཉིས་པ་ཀུན་བཏུས་ཀྱི་ལུགས་ནི། སྙོམས་འཇུག་ཉོན་མོངས་ཅན་གྱིས་གོང་ས་ལ་དམིགས་པ་ཡོད་དེ། ང་རྒྱལ་ཤས་ཆེ་བའི་སྙོམས་འཇུག་དེས་གོང་མའི་ཡོན་ཏན་མ་ཐོབ་པ་ལ་ཐོབ་བོ་སྙམ་དུ་རློམས་པའི་ཕྱིར་རོ། །འོག་ས་ལ་དམིགས་པ་ཡོད་དེ། ལྟ་བ་ཤས་ཆེ་བའི་སྙོམས་འཇུག་དེས་འོག་མའི་སེམས་ཅན་ལ་དམིགས་ནས་བདག་ཉིད་དེ་ལས་ཁྱད་པར་དུ་འཕགས་པར་འཛིན་པའི་ཕྱིར་རོ། །ཟག་མེད་ལ་དམིགས་པ་ཡོད་དེ། ཐེ་ཚོམ་ཤས་ཆེ་བའི་སྙོམས་འཇུག་དེས་ཐར་པ་ལ་དམིགས་ནས་ཡིད་གཉིས་ཟ་བའི་ཕྱིར་རོ། །སྲེད་པ་ཤས་ཆེ་བའི་སྙོམས་འཇུག་གིས་ནི། འདིའི་ལུགས་ལ་ཡང་རང་སའི་ཟག་བཅས་ཁོ་ན་ལ་དམིགས་སོ། །ཞེས་ཀུན་མཁྱེན་གོ་རམས་པའི་སྙོམས་འཇུག་རབ་གསལ་ལས་སོ། །
Domain	ཆོས་ལུགས།

{{#arraymap:གཟུགས་མེད་སྙོམས་འཇུག་ཉོན་མོངས་ཅན་གྱི་དམིགས་རྣམ་

|; |@@@ | | }}