9983

གཟུགས་སུ་ཉེར་འགྲོའི་གོང་འཕོ་ (1)

Part of speech	མིང་ཚིག
Definition	གཟུགས་སུ་ཉེར་འགྲོའི་གོང་འཕོའི་མཚན་ཉིད། གཟུགས་ཀྱི་ལན་གྲངས་གཞན་ལ་མྱོང་འགྱུར་གྱི་ལས་ཅན་གྱི་གཟུགས་སུ་ཉེར་འགྲོའི་ཕྱིར་མི་འོང་གང་ཞིག གཟུགས་སུ་སྐྱེ་བ་བརྒྱུད་མར་བླངས་ནས་ཁམས་གོང་གི་རྟེན་ལ་མྱང་འདས་མངོན་དུ་བྱེད་པའོ། །སྒྲ་དོན་ནི། ཅིའི་ཕྱིར་གོང་འཕོ་ཞེས་བྱ་ཞེ་ན། ད་ལྟ་འདོད་པའི་རྟེན་ཅན་གྱི་ཕྱིར་མི་འོང་ཡིན་པ་ལས་ཕྱི་མ་གང་དུ་སྐྱེས་པའི་སྐྱེ་ས་དེ་ཉིད་དུ་མྱ་ངན་ལས་མི་འདའ་བར་དེའི་གོང་དུ་འགྲོ་བས་ན་གོང་འཕོ་ཞེས་བྱའོ། །དབྱེ་ན། འོག་མིན་མཐར་ཐུག་འགྲོ་དང། སྲིད་རྩེའི་མཐར་ཐུག་འགྲོའི་གོང་འཕོ་གཉིས་སོ། །ཅིའི་ཕྱིར་གཟུགས་སུ་ཉེར་འགྲོའི་གོང་འཕོ་ལ། འོག་མིན་མཐར་ཐུག་འགྲོ་དང་། སྲིད་རྩེ་མཐར་ཐུག་འགྲོ་གཉིས་སུ་ངེས་ཤེ་ན། རྒྱུའི་དུས་སུ་བསམ་གཏན་སྤེལ་སྒོམ་བྱས་པ་དང་མ་བྱས་པ་གཉིས་སུ་ངེས་པས་བསམ་གཏན་སྤེལ་སྒོམ་བྱས་པ་ནི་བསམ་གཏན་དང་པོའི་རོ་མྱངས་ནས་བསམ་གཏན་གོང་མ་གསུམ་ལས་ཉམས་ན་ཕྱི་མ་ཚངས་རིས་སུ་སྐྱེས་ནས་སླར་ཡང་དེ་ཉིད་ཀྱི་རྟེན་ལ་བསམ་གཏན་སྤེལ་སྒོམ་བྱས་པས་ཉོན་མོངས་པ་ཆུང་བ་དང་། དབང་པོ་རྣོ་བ་ཡིན་ན། འཕར་ཐེབས་གཅིག་གིས་འོག་མིན་དུ་འགྲོ། ཉོན་མོངས་པ་དང་དབང་པོ་འབྲིང་ཡིན་ན། འཕར་ཐེབས་གཉིས་ཀྱིས་འོག་མིན་དུ་འགྲོ། ཉོན་མོངས་པ་ཆེ་ཞིང་དབང་པོ་རྟུལ་བ་ཡིན་ན། གནས་ཐམས་ཅད་དུ་འཆི་འཕོས་ནས་འོག་མིན་དུ་འགྲོ། བསམ་གཏན་སྤེལ་སྒོམ་མ་བྱས་པ་ནི་བསམ་གཏན་དང་པོའི་རོ་མྱངས་པས་གོང་མ་གསུམ་ལས་ཉམས་ན་ཕྱི་མ་ཚངས་རིས་སུ་སྐྱེས་ནས་སླར་ཡང་བསམ་གཏན་གོང་མ་རྣམས་བསྒོམས་པའི་སྟོབས་ཀྱིས་འབྲས་བུ་ཆེ་བའི་བར་དུ་རིམ་པ་བཞིན་སྐྱེས་ནས་གནས་གཙང་མར་འགྲོ་མི་ནུས་པས་གཟུགས་མེད་དུ་སྐྱེ་བ་བླངས་ཏེ་སྲིད་རྩེའི་བར་དུ་འགྲོ་བ་གཉིས་ཡོད་པའི་ཕྱིར་རོ། །འོ་ན་བསམ་གཏན་སྤེལ་སྒོམ་བྱས་པ་ལས་མ་ཉམས་ན་གང་དུ་སྐྱེ་བ་ཡིན་སྙམ་ན་བསམ་གཏན་སྤེལ་སྒོམ་ལྔའི་རིམ་གྱིས་ཚངས་རིས་སུ་མི་སྐྱེ་བ་དང་པོ་ཉིད་ནས་གནས་གཙང་མ་ལྔ་གང་རུང་དུ་སྐྱེ་བ་ཡིན་པས་བར་འདའ་བ་དང། སྐྱེས་འདའ་བར་འཇོག་གོ །འདི་ནི་ཁོ་བོའི་ལུགས་ཀྱི་འདའ་བ་དང་པོ་གཉིས་ལ་གང་དུ་མྱང་འདས་མངོན་དུ་བྱེད་པའི་གནས་ཀྱི་སྒོ་ནས་བཅུ་བདུན་དུ་དབྱེ་བ་འདི་ལ་འཐད་དོ་ཞེས་ཀུན་མཁྱེན་གོ་རམས་པའི་སྐྱེས་བུ་མཆོག་གི་གསལ་བྱེད་ལས་སོ། །
Domain	ཆོས་ལུགས།