10395

Tibetan	རྩ་བའི་ལྟུང་བ་བཅུ་བཞི།
Tibetan Alternate
Tibetan Definition	དེ་ཡང་། སྡོམ་པ་གསུམ་རྣམ་པར་ངེས་པའི་འགྲེལ་པ་ལེགས་བཤད་ངོ་མཚར་དཔག་བསམ་གྱི་སྙེ་མ་ལས་བྱུང་བ་སྟེ། 1.རྡོ་རྗེ་སློབ་དཔོན་ལ་སྨོད་པའི་རྩ་ལྟུང་ནི། སློབ་དཔོན་རྣམ་གསུམ་སྙིང་ནས་སྨོད་པ་དང་། །བརྙས་དང་ཐུགས་དཀྲུགས་ལྟུང་བའི་སྒོ་ཀུན་ལས། ། ཤིན་ཏུ་ལྕི་ཕྱིར་འདི་ཉིད་དང་པོར་བཤད། ། ཅེས་པ་སྟེ་སྤྱིར་སློབ་དཔོན་དྲུག་བཤད་པ་སོགས་ཡོད་པས་ལྟུང་བ་བྱེད་པ་པོ་རང་ཉིད་སྔགས་སྡོམ་དང་ལྡན་པ་དགོས་ཀྱི། ཡུལ་བླ་མའི་ངོས་ནས་སྔགས་ཆོས་ཁོ་ནས་སྦྲེལ་བ་ཞིག་མི་དགོས་ཀྱང་། འདིར་ཁྱད་པར་གྱི་སློབ་དཔོན་ནི་རྣམ་པ་གསུམ་སྟེ། བདེ་འདུས་ཞི་བ་འདུས་པ་རྩ་བའི་རྒྱུད་ལས། རྒྱུད་དགྲོལ་དབང་བསྐུར་དེ་ཉིད་བསྟན། ། ཞེས་པས་དབང་བསྐུར། རྒྱུད་བཤད། མན་ངག་བྱིན་པའི་བཀའ་དྲིན་གསུམ་ལྡན་ནམ། གཉིས་ལྡན་ནམ་གཅིག་ལྡན་གང་རུང་ལ། ཞེ་སྡང་ངམ་ཕྲག་དོག་གི་དབང་གིས་སྙིང་ཐག་པ་ནས་སྨ་འབེབས་པར་འདོད་པས་ངག་གིས་འཁུ་ཞིང་འཕྱ་བའི་སྒོ་ནས་སྨོད་པ་དང་། བཀུར་སྟི་མི་བྱེད་པར་བརྙས་པ་སོགས་ཀྱིས་ཐུགས་འཁྲུགས་ཏེ་མི་མཉེས་པར་བྱས་པ་དེ་ནི་རྩ་ལྟུང་དང་པོ་སྟེ། རྡོ་རྗེ་སློབ་དཔོན་ནི་སངས་རྒྱས་ཐམས་ཅད་ཀྱི་ངོ་བོ་ཡིན་པས་ཡུལ་གཉན་པར་མ་ཟད། རང་ཉིད་ཀྱི་ལམ་དང་འབྲས་བུའི་ཡོན་ཏན་ཐམས་ཅད་དེ་ཉིད་མཉེས་པས་རྗེས་སུ་བཟུང་བ་ལ་རག་ལས་པའི་ཕྱིར། རྩ་ལྟུང་བཅུ་བཞིའི་ནང་ནས་ཉེས་པ་ཤིན་ཏུ་ལྕི་བས་དང་པོར་བཞག་སྟེ། གང་ཕྱིར་རྡོ་རྗེ་འཛིན་པ་ཡི། ། དངོས་གྲུབ་སློབ་དཔོན་རྗེས་འབྲང་གསུངས། ། དེ་བས་དེ་ལ་བརྙས་པ་ནི། ། རྩ་བའི་ལྟུང་བ་ དང་པོར་བཤད། ། ཅེས་སོ། ། དེས་ན་ཅི་མཛད་ཡོན་ཏན་དུ་བལྟ་བ་དང་ཅི་མཉེས་སྒྲུབ་པའི་སྤྱོད་པ་ལ་བསླབ་པར་བྱའོ། ། 2.བདེ་གཤེགས་ཀྱི་བཀའ་ལས་འདས་པའི་རྩ་ལྟུང་ནི། བླང་དོར་གནས་སྟོན་བདེ་བར་གཤེགས་པའི་བཀའ། ། བླ་མས་གསུངས་ཤིང་རང་གིས་གོ་བཞིན་དུ། ། ཁྱད་གསོད་མི་མཐུན་སྤྱོད་འབྲེལ་བཀའ་འདས་གཉིས། ། ཞེས་པ་སྟེ། གདུལ་བྱ་ལ་བླང་དོར་གྱི་གནས་སྟོན་པ་སྡེ་སྣོད་གསུམ་དང་རྒྱུད་སྡེ་བཞིའམ་དྲུག་གི་བསྡུས་པའི་བདེ་བར་གཤེགས་པའི་བཀའ་ཐམས་ཅད་དང་། དེ་དང་རྗེས་སུ་མཐུན་པའི་འཇུག་ལྡོག་གི་བསླབ་བྱ་བླ་མ་དམ་པས་རང་ལ་འདོམས་པར་མཛད་པ་གང་ཡིན་ཀྱང་རུང་སྟེ། དེ་དང་དེས་གསུངས་པའི་དོན་གོ་བཞིན་དུ་ཁྱད་གསོད་ཀྱི་བློས་བཀའ་ལས་འདས་ཏེ་མི་མཐུན་པར་སྤྱོད་པའམ། དེ་དང་འབྲེལ་བ་གཞན་ལ་བཤད་ཀྱང་རུང་སྟེ། དངོས་གྲུབ་ཐམས་ཅད་སངས་རྒྱས་དང་བླ་མའི་བཀའི་རྗེས་སུ་འགྲོ་ཞིང་། དེ་ལས་འདས་པ་ནི་བླ་མ་ལ་བརྙས་པའི་འོག་ནས་ཉེས་པ་ཆེ་བས་རྩ་ལྟུང་གཉིས་པར་བཞག་གོ ། 3.རྡོ་རྗེའི་སྤུན་ལ་སྐྱོན་བརྗོད་པའི་རྩ་ལྟུང་ནི། སྤྱི་རིང་ཉེ་དང་ནང་འདྲེས་སྤུན་ལ་ཁྲོས། འཁོན་འཛིན་ཕྲག་དོག་བརྙས་སོགས་གསུམ་པའོ། ། ཞེས་པ་སྟེ། ཡུལ་ནི་སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་སངས་རྒྱས་ཀྱི་བསྟན་པ་ཞུགས་སོ་ཅོག །ཉེ་བའི་མཆེད་སྔགས་ཀྱི་ཐེག་པར་ཞུགས་པ། དེ་ལས་ཀྱང་ཁྱད་པར་ནང་འདྲེས་པའི་མཆེད་བླ་མ་གཅིག་གིས་བསྡུས་པ་ཕ་གཅིག་པའི་སྤུན་དང་། དེའི་ཤུགས་ཀྱིས་དཀྱིལ་འཁོར་གཅིག་གིས་བསྡུས་པ་མ་གཅིག་པའི་སྤུན་ཏེ། དེ་བཞི་སྔ་མ་སྔ་མ་ལས་ཕྱི་མ་ཕྱི་མ་ཉེ་ཞིང་། ཁྱད་པར་ནང་འདྲེས་ལའང་མ་གཅིག་པ་ལས་ཕ་ གཅིག་པ་དང་། དེ་གཉིས་ཀ་གཅིག་པ་ལའང་དབང་ཐོབ་པའི་སྔ་ཕྱི་ཡོད་ན་སྤུན་རྒན་གཞོན་དང་། དུས་གཅིག་པ་མཚེ་མ་ལྟ་བུ་རྣམས་ཕྱི་རིམ་གྱིས་ཉེ་ལ། དེ་ཡང་དབང་བཞི་ཀ་རྫོགས་པར་ཐོབ་པའི་སྤུན་རྣམས་ཤིན་ཏུ་ཉེ་བ་ཡིན་ནོ། ། 4.སེམས་ཅན་ལ་བྱམས་པ་སྤོང་བའི་རྩ་ལྟུང་ནི། སེམས་ཅན་བདེ་བ་ཀུན་དང་བྲལ་ན་བསམ། ། སྙིང་ནས་བྱམས་པ་བཏང་བ་བཞི་པའོ། ། ཞེས་པ་སྟེ། ཡུལ་སེམས་ཅན་གང་ཡང་རུང་བ་བདེ་བ་དང་བྲལ་ཞིང་སྡུག་བསྔལ་དང་འཕྲད་ན་ཅི་མ་རུང་སྙམ་དུ་ཁྲོ་བའི་བསམ་པས་སྙིང་ཐག་པ་ནས་བྱམས་པ་བཏང་བ་རྩ་ལྟུང་བཞི་པའོ། ། 5.བྱང་ཆུབ་ཀྱི་སེམས་འདོར་བའི་རྩ་ལྟུང་ནི། འདོད་ཆགས་སེམས་ཀྱིས་གནས་སྐབས་མ་ཡིན་པར། ། བསམ་ཞིང་ཁུ་བ་འབྱིན་དང་སེམས་ཅན་ལ། ། བྱང་ཆུབ་སེམས་བསྐྱེད་བཏང་བ་ལྔ་པ་ཡིན། ། ཞེས་པ་སྟེ། བསྐྱེད་རིམ་པས་སེམས་ཅན་ཐམས་ཅད་ཀྱི་དོན་དུ་རྫོགས་པའི་བྱང་ཆུབ་དོན་གཉེར་གྱི་སྨོན་སེམས་བཏང་བ་དང་། དེ་མ་བཏང་ནའང་འཇུག་པའི་རྩ་ལྟུང་ཐུན་མོང་བ་སྤྱད་པས་འཇུག་སེམས་བཏང་བ་སྤྱི་དང་། ཁྱད་པར་གསང་དབང་གི་ལམ་པས་སྐྱུག་བྲོའི་དབང་གིས་ཐབས་ཤེས་ཀྱི་ཁུ་ཁྲག་སྤངས་པ་དང་། ཤེས་རབ་ཡེ་ཤེས་ཀྱི་ལམ་པས་གསང་དབང་བསྐུར་བའི་རྫས་དང་བདུད་རྩི་རིལ་བུ་སྒྲུབ་པའི་ཆེད་སོགས་གནང་བའི་གནས་སྐབས་བདུན་མ་ཡིན་པར་མི་འགྱུར་བའི་བདེ་བ་ལ་མ་དད་ཅིང་ཞུ་བདེ་འགྱུར་མེད་ལ་དགོས་མེད་དུ་བསམས་ནས་འདོད་ཆགས་སམ་བསླབ་པ་ཁྱད་གསོད་ཀྱིས་བསམ་བཞིན་དུ་ཁུ་བ་འབྱིན་པས་ནོར་བུའི་ཕྱིར་ལྷུངས་ན་རྩ་ལྟུང་ལྔ་པའོ། ། དེ་ལ་གནང་བའི་གནས་སྐབས་བདུན་ ནི། གསང་བའི་དབང་དང་གསུམ་པ་དང་། ། རོ་མཉམ་པ་དང་ལྷ་མཆོད་དང་། ། རིགས་བརྒྱུད་སྤེལ་དང་རིལ་བུ་དང་། ། འཆི་ལྟས་བརྟག་པའི་དུས་ཡིན་ཏེ། ། ཞེས་པ་ལྟར་རོ། ། 6.ཐེག་པ་གཉིས་ཀྱི་ཆོས་ལ་སྨོད་པའི་རྩ་ལྟུང་ནི། ལམ་འཚོལ་མུ་སྟེགས་ལམ་ཞུགས་ཉན་རང་དང་། ། ལམ་ཆེན་ཐེག་ཆེན་གྲུབ་མཐར་སྨོད་ན་དྲུག །ཅེས་པ་སྟེ། མུ་སྟེགས་ཀྱི་གྲུབ་མཐར་བཤད་པའི་དཀར་ཆོས་རྣམས་ཀྱང་ལམ་གྱི་རྟེན་མཐོ་རིས་སྒྲུབ་པས་ངན་འགྲོ་ལས་ངེས་འབྱུང་གི་ལམ་འཚོལ་བའི་ཕྱིར་དང་ནང་པ་སངས་རྒྱས་པ་ལས་ཉན་རང་ནི་འཁོར་བ་ལས་ངེས་པར་འབྱུང་བའི་ལམ་ལ་ཞུགས་པ་དང་། མཐའ་གཉིས་ལས་ངེས་པར་འབྱུང་བའི་ལམ་ཆེན་པོ་ལ་ཞུགས་པ་ཐེག་ཆེན་ཕ་རོལ་ཏུ་ཕྱིན་པ་སྟེ། དེ་ཐམས་ཅད་ཀྱང་གསང་སྙིང་ལས། ཐེག་པ་བཞི་ཡི་ངེས་འབྱུང་ལ། ། ཐེག་པ་གཅིག་གི་འབྲས་བུར་གནས། ། ཞེས་སྔགས་ཀྱི་ཐེག་པའི་ལམ་སྟེགས་སུ་འགྱུར་བས་མཐར་ཐུག་ཐེག་པ་གཅིག་ཏུ་ གྲུབ་པའི་ཕྱིར། ཐེག་པ་གོང་མ་ལ་དྲང་བའི་ཆེད་སོགས་མ་ཡིན་པར་མཆོག་དམན་དུ་བཟུང་ནས་སྡང་སེམས་ཀྱིས་སྨད་ ན་རྩ་ལྟུང་དྲུག་པའོ། ། 7.སྣོད་མིན་ལ་གསང་བ་སྒྲོགས་པའི་རྩ་ལྟུང་ནི། སྣོད་དང་ཆོ་ག་མ་བྱས་མ་རྫོགས་དང་། །ཉམས་དང་ཟབ་མོས་འཇིགས་ལྔར་གསང་སྒྲོགས་བདུན། ། ཞེས་པ་སྟེ། སྣོད་ཀྱིས་མ་སྨིན་པ་ལོག་སྲེད་ཅནདང་། ཆོ་ག་མ་བྱས་པས་མ་སྨིན་པ་བུམ་དབང་མ་ཐོབ་པ་དང་། ཆོ་ག་མ་རྫོགས་པས་མ་སྨིན་པ་སྨིན་པ་མཆོག་དབང་གསུམ་མ་ཐོབ་པ་དང་། ཉམས་པས་མ་སྨིན་པ་རྩ་ལྟུང་བྱུང་ནས་འགྱོད་པས་ཕྱིར་མི་འཆོས་པ་དང་། ཟབ་མོས་འཇིགས་པ་ཉན་རང་སོགས་དབང་པོ་མ་སྨིན་པས་ཟབ་དོན་ལ་སྐྲག་པ་སྟེ། དེ་ལྟར་ཡུལ་རྣམ་པ་ལྔ་ལ་འདུལ་བའི་དུས་དང་བསྟན་བྱ་དེ་ལ་ལྟོས་པའི་སྣོད་ཀྱི་སྐབས་མ་ཡིན་པར་གསང་སྔགས་ཀྱི་ཐུན་མོང་མ་ཡིན་པའི་རྫས་དང་སྤྱོད་པ་དང་ ཆོས་ཟབ་དོན་གྱི་གསང་བ་བསྒྲགས་པ། དེས་ཀྱང་གོ་བཞིན་མ་དད་པ་སྐྱེས་ན་རྩ་ལྟུང་བདུན་པའོ། ། 8.ཕུང་པོ་ལྷར་སྒོམ་པ་སྨོད་པའི་རྩ་ལྟུང་ནི། ཕུང་ལྔ་སངས་རྒྱས་ལྔ་ལ་བརྙས་པ་ཡིས། ། སྨོད་དང་གདུང་བ་བསྐྱེད་ན་བརྒྱད་པ་ཡིན། ། ཞེས་པ་སྟེ། རྡོ་རྗེ་ཕུང་པོ་ཡན་ལག་ནི། ། རྫོགས་པའི་སངས་རྒྱས་ལྔ་རུ་གྲགས། ། ཞེས་པ་ལྟར་ཕུང་པོ་ལྔའི་རང་བཞིན་རིགས་ལྔའི་སངས་རྒྱས་ཡིན་པ་ལྟར་དབང་ དུས་སུ་ངོ་སྤྲད་ནས། དེ་འདོད་ཡོན་གྱིས་མཉེས་པར་མཆོད་པས་རྟེན་བདེ་བ་འཕེལ། དེས་བརྟེན་པ་ཡེ་ཤེས་མངོན་དུ་འགྱུར་བ་ཡིན་པ་ལས། ཕུང་པོ་ཀུན་འབྱུང་གི་གཙོ་བོར་བཟུང་སྟེ། ལྷའི་ཁྱད་པར་སྒྲུབ་པ་སོགས་ཀྱི་དགོས་པ་མེད་པར་རང་ལུས་མི་གཙང་ངོ་ཞེས་ངག་གིས་སྨད་ཅིང་སེམས་ཀྱིས་དེ་ལྟར་བཟུང་ནས་བརྙས་པའམ་ཡན་ལག་གཅོད་པ་སོགས་ཀྱི་དཀའ་སྤྱད་དང་སྨྱུང་གནས་སོགས་དཀའ་ཐུབ་ཀྱིས་ལུས་ལ་གདུང་བ་བསྐྱེད་པར་བྱེད་ན་རྩ་ལྟུང་བརྒྱད་པའོ། ། 9.ཟབ་མོའི་ལྟ་བ་སྤངས་པའི་རྩ་ལྟུང་ནི། གཞི་ལམ་འབྲས་བུའི་རང་བཞིན་དག་པ་ལ། དཀྲི་བར་ཐེ་ཚོམ་ཟ་བ་དགུ་པར་བཤད། ། ཅེས་པ་སྟེ། གཞི་ལམ་འབྲས་བུ་ཆོས་ཐམས་ཅད་རང་བཞིན་གྱིས་རྣམ་པར་དག་པས་དབྱེར་མི་ཕྱེད་པའི་ཟུང་འཇུག་འོད་གསལ་བྱང་ཆུབ་ཀྱི་སེམས་བདེ་བར་གཤེགས་པའི་སྙིང་པོ་གདོད་མའི་གནས་ལུགས་སུ་བཞུགས་པར་བཤད་པ་ནི་ལམ་ལ་དཀྲི་བའི་ཆེད་དུ་སྤྲོ་བ་བསྐྱེད་པ་ཙམ་ལས་དོན་ལ་དེ་ལྟར་མ་ཡིན་སྙམ་དུ་ཐེ་ཚོམ་ཟ་བས་ཡིད་མ་ཆེས་ཏེ་མ་དད་ན་རྩ་ལྟུང་དགུ་པའོ། ། 10.བསྒྲལ་བའི་ཡུལ་ལ་བྱམས་པའི་རྩ་ལྟུང་ནི། བསྒྲལ་བའི་ཞིང་བཅུ་ཚང་བ་ནུས་བཞིན་དུ། ། མི་སྒྲོལ་བ་དང་བྱམས་པར་བྱེད་ན་བཅུ། ། ཞེས་པ་སྟེ། དེ་ལ་ཡུལ་ནི་གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། ། དམ་ཉམས་ལོག་དང་འཁུ་བ་དང་། །འདུ་བར་འོངས་དང་ཡོངས་ལ་གནོད། ། དམ་དགྲ་ངན་པའི་ངང་ཚུལ་ཅན། ། ངན་སོང་གསུམ་དང་བཅུ་པོ་ནི། ། རྣལ་འབྱོར་ཀུན་གྱིས་དང་དུ་བླང་། ། ཞེས་པས་སྤྱིར། (1)བསྟན་པ་ལ་གནོད་པ་བྱེད་པའི་དཀོན་མཆོག་གྱི་སྐུ་དགྲ། (2)ཁྱད་པར་བླ་མའི་སྐུ་དགྲ། (3)སྔགས་ཀྱི་དམ་ཚིག་ཉམས་ནས་གསོ་བར་མི་བྱེད་པ། (4)སྔགས་ཀྱི་ཐེག་པར་ཞུགས་པ་ལས་ཕྱིར་ལོག་སྟེ་སྤོང་བ། (5)བླ་མ་དང་མཆེད་ལ་ཞེ་སྡང་བས་འཁུ་བ། (6)སྔགས་སྤྱོད་ལ་འདུ་བར་མི་དབང་བཞིན་དུ་སྐུ་ཐབས་ཀྱིས་འདུས་པའི་ནང་དུ་འོངས་པ། (7)སེམས་ཅན་ཡོངས་ལ་གནོད་པའི་ལས་བྱེད་པ། (8)དམ་ཚིག་དང་ལྡན་པའི་དགྲ་གྱུར་པ། (9)མི་དགེ་བའི་ལས་འབའ་ཞིག་ལ་འཇུག་པའི་སྤྱོད་པ་ངན་པའི་ངང་ཚུལ་ཅན་ཏེ་སྡུག་བསྔལ་གྱི་རྒྱུ་ལ་སྤྱོད་པ། ། (10)སྡུག་བསྔལ་དངོས་ལ་སྤྱོད་པ་ངན་སོང་གསུམ་པོ་གཅིག་ཏུ་བསྡོམས་པས་བཅུ་སྟེ། དེ་ལྟར་བསྒྲལ་བའི་ཞིང་དུ་གྱུར་པ་དེ་རྣམས་མངོན་སྤྱོད་ཀྱི་ལས་ཀྱིས་སྒྲོལ་བར་ནུས་བཞིན་དུ་ཡལ་བར་དོརནས་མི་སྒྲོལ་བ་དང་། དེ་ལས་ཀྱང་ཁྱད་པར་བླ་མ་དང་བསྟན་འགྲོར་འཚེ་བའི་གདུག་པ་ཅན་དེ་དགུ་ལོག་པའི་སྲེད་པས་རང་གི་མཛའ་བོར་བྱས་ནས་ཐ་མལ་པའི་བྱམས་པ་བྱེད་ན་རྩ་ལྟུང་སྟེ། དེས་ན་ལུས་ངག་གི་བྱམས་པ་མི་བྱེད་པར་མ་ཟད་འཕྲལ་དུ་བཟོད་པ་བསྒོམ་པའང་མི་བྱ་སྟེ། གདོང་དྲུག་གི་རྒྱུད་ལས། གདུག་པ་རྣམས་ལ་བཟློག་སྟེ་བྱ། ། དངོས་སམ་ཡང་ན་སྔགས་དང་ གཞན། ། འཁྲུལ་འཁོར་དང་ནི་ཏིང་ངེ་འཛིན། ། སྨན་གྱིས་ཀྱང་ནི་བྱ་བ་སྟེ། ། ཞེས་གསུངས་པའི་ཕྱིར་རོ། ། དེར་མ་ཟད་གཡོ་སྒྱུས་བྱམས་པ་ལྟར་སྟོན་པ་ཁ་འཇམ་ལ་ཞེ་གདུག་པར་བྱེད་ནའང་རྩ་ལྟུང་དུ་འགྱུར་བར་དུས་འཁོར་ལས་བཤད་དོ། ། 11.ཟབ་མོའི་ལྟ་བ་རྙེད་ནས་མ་བསྐྱངས་པའི་རྩ་ལྟུང་ནི། མིང་སོགས་བྲལ་ལ་དངོས་དང་དངོས་མེད་རྟོག ། རྟོག་གེས་འཇལ་བར་བྱེད་ན་བཅུ་གཅིག་པའོ། ། ཞེས་པ་སྟེ། མིང་སོགས་མཚན་མ་ཐམས་ཅད་དང་བྲལ་བའི་དོན་དམ་བདེན་པ་དང་། དེ་རྟོགས་པའི་ཐབས་རྣམ་པར་མི་རྟོག་པའི་ལམ་ལ་ཐེ་ཚོམ་ཟ་བས་སོ་སོ་རང་རིག་ལས་གཞན་དུ་རྟོག་གེའི་རིགས་པས་དངོས་པོའམ་དངོས་མེད་གང་རུང་དུ་སྒྲོ་འདོགས་པས་རྟོག་ཅིང་ཞེན་པར་བྱེད་ན་རྩ་ལྟུང་བཅུ་གཅིག་པའོ། ། 12.སྔགས་ལ་འཇུག་འདོད་པའི་སྣོད་ལྡན་སུན་འབྱིན་པའི་རྩ་ལྟུང་ནི། དད་གསུམ་ལྡན་པའི་སེམས་ཅན་དོན་མི་བྱེད། ། སེམས་མི་བསྲུང་དང་བསླུ་བ་བཅུ་གཉིས་པ། །ཞེས་པ་སྟེ། བླ་མ་དང་དཀོན་མཆོག་གི་ཡོན་ཏན་ལ་དང་བ་འདོད་པ་དང་ཡིད་ཆེས་ཀྱི་དད་པ་གསུམ་དང་ལྡན་པའི་སེམས་ཅན་ཆོས་འདོད་ཅིང་སྦྱིན་དུ་རུང་བ་ལ་མི་སྟེར་བ་ལྟ་བུ་དེའི་དོན་བྱེད་ནུས་ཀྱང་མི་བྱེད་པས་སོམ། དེའི་སེམས་དང་འགལ་བ་མི་བསྲུང་བར་མི་དད་པར་རིགས་པའི་སྤྱོད་པ་བསྟན་པ་དང་ཆགས་སྡང་གིས་སྐྱོན་བརྗོད་པའམ་གཡོ་སྒྱུས་བསླུས་ཀྱང་རུང་སྟེ། དེ་ཉིད་ཀྱི་སེམས་སུན་ཕྱུངས་ནས་དད་འདུན་ལོག་ན་རྩ་ལྟུང་བཅུ་གཉིས་པའོ། ། 13.དམ་རྫས་ལ་སྨོད་པའི་རྩ་ལྟུང་ནི། སྐབས་བབས་ཡོ་བྱེད་ལོངས་སྤྱོད་དམ་ཚིག་རྫས། ། དུས་ཚོད་འབྲེལ་ཀྱང་མི་སྟེན་བཅུ་གསུམ་པ། ། ཞེས་པ་སྟེ། སྔགས་ཀྱི་སྤྱོད་པའི་དུས་སུ་ཚོགས་འཁོར་རམ་དཔའ་བོ་དང་དཔའ་མོའི་སྟོན་མོ་གང་ཡིན་ཀྱང་རུང་སྟེ། དེ་དང་དེའི་ཚེ་བརྟེན་པ་སྐབས་སུ་བབས་པའི་དམ་ཚིག་གི་རྫས་རྡོར་དྲིལ་གོས་རྒྱན་སོགས་བཅང་བའི་ཡོ་བྱད་དང་། ཕྱི་ནང་གི་ཤ་ལྔ་བདུད་རྩི་ལྔ་ཆང་སོགས་བཟའ་བཏུང་གི་ལོངས་སྤྱོད་དང་། བྲོ་གར་གླུ་ཚིག་རིག་མ་སོགས་སྤྱོད་པ་དུས་ཚོད་དང་འབྲེལ་ཀྱང་། ཉན་ཐོས་ཀྱི་བརྟུལ་ཞུགས་ལ་འཆེལ་བ་ལ་སོགས་པས་ཐེ་ཚོམ་ཟ་བའམ། མི་གཙང་བ་དང་ཉེས་དམིགས་ཀྱི་བསམ་པས་མི་བརྟེན་ཞིང་སྤངས་ན་རྩ་ལྟུང་བཅུ་གསུམ་པའོ། ། 14.བུད་མེད་ལ་སྨོད་པའི་རྩ་ལྟུང་ནི། སྤྱི་དང་བྱེ་བྲག་ལ་ལྟོས་ཤེས་རབ་མ། ། ངོས་ལྐོག་སྙིང་ཚིམ་སྨད་གོ་བཅུ་བཞི་པ། ། ཞེས་པ་སྟེ། ཡུལ་བུད་མེད་གཅིག་གམ་དུ་མའང་རུང་སྟེ་རིགས་འདེད་པའི་སྒོ་ནས་སྤྱི་དང་། བྱེ་བྲག་སྤྱོད་པའི་དུས་ཡིན་ན་རང་གི་བརྟེན་བྱར་འགྱུར་ངེས་ལ་ལྟོས་པའི་བུད་མེད་ཤེས་རབ་ཆོས་འབྱུང་གི་རང་བཞིན་ཅན་དེ་དག་ལ་ངོས་སམ་ལྐོག་ཏུ་ཞེ་ཐག་པ་ནས་སྙིང་ཚིམ་པས་བརྙས་ཐབས་དང་སྨོད་ཚིག་བརྗོད་པ་གཞན་གྱིས་གོ་ན་རྩ་ལྟུང་བཅུ་བཞི་པའོ། ། དེ་ཡང་འདིར་ཡུལ་གྱི་བུད་མེད་བླ་མེད་ཀྱི་སྡོམ་ལྡན་མ་ཡིན་པ་ཞིག་དགོས་ཏེ། སྔགས་སྡོམ་དང་ལྡན་པའི་བུད་མེད་ནི་རང་གི་བླ་མའམ་སྤུན་ལས་མི་འདའ་བས་རྩ་ལྟུང་དང་པོ་དང་གསུམ་པར་འགྱུར་པའི་ཕྱིར་རོ།(སྐབས་འདིར་ནང་དོན་བདེ་བླག་ཏུ་རྟོགས་པའི་ཆེད་རྩ་ལྟུང་གི་གྲངས་འདྲེན་རྣམས་གཞུང་འདིར་མི་གསལ་བ་ཁ་སྐོང་ཞུས་པ་ཡིན།)
Tibetan Source	《སྔ་འགྱུར་བཀའ་མའི་གླེགས་བམ་ཇི་པ་》ཤ་257བ་2ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number