11149

Tibetan	མཚན་བཟང་པོ་སུམ་ཅུ་རྩ་གཉིས་གྲུབ་པའི་རྒྱུ་སོ་གཉིས།
Tibetan Alternate
Tibetan Definition	དེ་ཡང་། ཐབས་མཁས་པ་ཆེན་པོ་སངས་རྒྱས་དྲིན་ལན་བསབ་པའི་མདོ་ལས་བྱུང་བ་སྟེ། 1.དེ་བཞིན་གཤེགས་པ་ནི་སྔོན་ཡུན་རིང་པོ་བསྐལ་པ་གྲངས་མེད། ཚད་མེད་པའི་བར་དུ། ཚུལ་ཁྲིམས་ཡོངས་སུ་དག་པར་བསྲུངས་པས། ཞབས་ཀྱི་མཐིལ་མཉམ་པར་གང་བའི་མཚན་དང་ལྡན་པར་གྱུར་པ་ཡིན་ནོ། ། 2.ཕ་མ་དང་། སློབ་དཔོན་དང་། བླ་མ་དང་། གང་ཟག་ཡོན་ཏན་དང་ལྡན་པ་ལ་མཆོད་པ་དང་། བཀུར་སྟིར་བྱས་པའི་རྐྱེན་གྱིས་ཞབས་ཀྱི་མཐིལ་འཁོར་ལོའི་མཚན་དང་ལྡན་པར་གྱུར་པ་ཡིན་ནོ། ། 3.སེམས་ཅན་རྣམས་ལ་མི་འཚེ་ཞིང་འཕྲོག་པ་དང་། རྐུ་བའི་སེམས་མེད་ལ། ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་ལ་རྒྱང་མ་ནས་བསུ་བསྐྱེལ་བྱས་ཤིང་། ཁྲི་སྟན་བཏིང་ལ་ང་རྒྱལ་སྤངས་ཏེ་རིམ་གྲོ་དང་། བཀུར་སྟི་དང་། ཕྱག་བྱས་པས། དེའི་རྒྱུ་དེའི་རྐྱེན་གྱིས་སོར་མོ་ཕྲ་ཞིང་རིང་བར་གྱུར་བའི་མཚན་དང་ལྡན་པར་གྱུར་པ་ཡིན་ནོ། ། 4.གོང་དུ་སྨོས་པའི་བྱ་བ་གསུམ་དང་ལྡན་པས། རྟིང་པ་ཟླུམ་ལ་གང་བའི་མཚན་དང་ལྡན་པར་གྱུར་པ་ཡིན་ནོ། ། 5.བསྡུ་བའི་ཆོས་རྣམ་པ་བཞིས་འགྲོ་བ་མང་པོ་ཡོངས་སུ་བསྡུས་པས། དེའི་རྒྱུ་དེའི་རྐྱེན་གྱིས་སོར་མོའི་བར་དྲ་བས་འབྲེལ་བའི་མཚན་དང་ལྡན་པར་གྱུར་བ་ཡིན་ནོ། ། 6.མར་དང་། འབྲུ་མར་གྱིས་ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པའི་གང་ཟག་གི་ལུས་ལ་བསྐུས་ཤིང་མཉེས་པས། དེའི་རྒྱུ་དེའི་རྐྱེན་གྱིས་རྐང་ལག་མཉན་ཞིང་རིང་ལ་འཇམ་པ་ཡིན་ནོ། ། 7.དགེ་བའི་ཆོས་བསྒོམ་པ་ལ་མི་སྐྱོ་བས། དེའི་རྒྱུ་དེའི་རྐྱེན་གྱིས་ཐལ་གོང་མཉམ་པ་ལག་ངར་ཟླུམ་ཞིང་ཤུགས་ཀྱིས་གཞོལ་བ་ཡིན་ནོ། ། 8.ཆོས་ཐོས་པར་དགའ་ཞིང་གཞན་ལ་ཆོས་སྟོན་པར་ཡང་མོས་ཏེ། ཆོས་ཀྱི་ཕྱིར་མངག་གཞུག་གི་ལས་བྱས་པས། དེའི་རྒྱུ་དེའི་རྐྱེན་གྱིས་ལོང་བུའི་རུས་པ་མི་སྣང་བའི་མཚན་དང་ལྡན་པ་ཡིན་ནོ། ། 9.སྒོ་གསུམ་ཡོངས་སུ་དག་ཅིང་ནད་གཡོག་དང་། སྨན་གྱི་སྦྱིན་པ་བྱིན་ཏེ། ང་རྒྱལ་མེད་ལ་བཟའ་བ་དང་། བཏུང་བ་ལ་ཆོག་ཤེས་པའི་རྒྱུ་དང་། རྐྱེན་གྱིས་ལུས་དྲང་པོར་འགྲེང་ན་ལག་པས་པུས་མོར་སླེབས་པ་ཡིན་ནོ། ། 10.འཁོན་གཅུགས་སུ་གྱུར་པ་ལ་ཚིག་འཇམ་པོས་བསྡུམས་ཏེ། བདག་ཀྱང་ངོ་ཚ་བ་དང་ལྡན་པའི་ཆོས་སྤྱད་དེ། གཞན་ཡང་སྤྱོད་དུ་བཅུག་ན། དེའི་རྒྱུ་དེའི་རྐྱེན་གྱིས་རྟའི་རྒྱལ་པོ་ལྟར་མཚན་སྦུབས་ཀྱི་ནང་དུ་ནུབ་པ་ཡིན་ནོ། ། 11.བདག་གི་སྒོ་གསུམ་ཡོངས་སུ་དག་ལ། གཞན་ཡང་ཡོངས་སུ་དག་པར་བྱེད་ཅིང་སེམས་ཅན་དག་འབྱུང་བ་ཆེན་པོ་བཞི་འཁྲུགས་ཏེ་ནད་དུ་གྱུར་པའི་སྨན་དཔྱད་ཀྱིས་གསོས་པས་ན། དེའི་རྒྱུ་དེའི་རྐྱེན་གྱིས་ལུས་ཀྱི་མཚན་ཡོངས་སུ་རྫོགས་པ་ཡིན་ནོ། ། 12.ཆོས་ཐོས་པར་དགའ་ཞིང་གཞན་ལ་ཆོས་སྟོན་པར་མོས་པས་ན། ལུས་ཀྱི་བ་སྤུ་གྱེན་དུ་ཉལ་བའི་མཚན་དང་ལྡན་པ་ཡིན། ། 13.ཆོས་ཀྱི་དོན་ཟབ་མོ་ཡིད་ལ་བགྱིད་ཅིང་དགེ་བའི་ཆོས་སྒོམ་པར་མོས་ལ། ཕ་མ་དང་། སློབ་དཔོན་དང་། བླ་མ་དང་། ཡོན་ཏན་དང་ལྡན་པས་གང་ཟག་ལ་མཆོད་པ་བྱས་པ་དང་། སངས་རྒྱས་ཀྱི་མཆོད་རྟེན་དང་། དགེ་འདུན་གྱི་གནས་ཁང་དང་། ལམ་སྲང་ན་འདུག་པའི་བོང་བའམ། རྡོ་བའམ། ཚེར་མའམ། མི་གཙང་བ་མེད་པར་བྱས་ན། དེའི་རྒྱུ་དེའི་རྐྱེན་གྱིས་སྤུ་རེ་རེ་ནས་གཡས་ཕྱོགས་སུ་འཁྱིལ་བའི་མཚན་དང་ལྡན་བར་གྱུར་བ་ཡིན་ནོ། ། 14.ཕ་རོལ་པོ་གཞན་དག་ལ་ཟས་དང་། སྐོམ་དང་། རྒྱུན་དང་། དེ་ལ་སོགས་པ་བྱིན་ཞིང་ཞེ་སྡང་གི་སེམས་མེད་པས་ན། དེའི་རྒྱུ་དེའི་རྐྱེན་གྱིས་གསེར་བཙོ་མའི་མདོག་དང་ལྡན་པ་དང་། འོད་རྟག་པའི་མཚན་ཉིད་དང་ལྡན་པ་ཡིན་ནོ། ། 15.ཅིའི་ལས་ཀྱིས་བ་སྤུའི་ཁུང་བུ་རེ་རེ་ནས་སྤུ་རེ་རེ་སྐྱེས་པའི་མཚན་དང་ལྡན་ཞེ་ན། ལས་དེ་ཉིད་ཀྱི་རྒྱུ་ལས་གྱུར་ཏེ། ལས་ཀྱི་རྒྱུ་དེ་ཉིད་ཀྱིས་ལུས་མཉེན་ཞིང་འཇམ་ལ། རྡུལ་དང་། དྲི་མས་མི་གོས་བའི་མཚན་དང་ལྡན་པ་ཡིན་ནོ། ། 16.སེམས་ཅན་དག་ལ་དགོས་བའི་ཟང་ཟིང་རྒྱུན་དུ་གཏོང་བས་ན། དེའི་རྒྱུ་དེའི་རྐྱེན་གྱིས་གནས་བདུན་མཉམ་པར་གང་བའི་མཚན་དང་ལྡན་པ་ཡིན་ནོ། ། 17.-20.བདག་གི་ང་རྒྱལ་དང་། དྲེགས་པ་བཅོམ་ནས། རང་བཞིན་གྱིས་མཉེན་ཞིང་དེས་པའི་སེམས་ཀྱིས་སེམས་ཅན་གྱི་ཡིད་དང་སྦྱོར་ཏེ་ཆོས་བཞིན་དུ་སྤྱོད་ལ། མི་དགེ་བའི་ཆོས་སྤངས་པའི་ཕྱིར། དགེ་བའི་ཆོས་སྟོན་ན། དེའི་རྒྱུ་དེའི་རྐྱེན་གྱིས་རོ་སྟོད་རི་དྭགས་ཀྱི་རྒྱལ་པོ་སེང་གེ་ལྟ་བུའི་མཚན་དང་། སྨིན་མཚམས་དང་། སྒྲོག་རུས་མཉམ་པར་གང་བའི་མཚན་དང་སོར་མོ་རིང་བའི་མཚན་དང་། ལུས་ཀྱི་མཐའ་ཡང་ཞིང་འཇམ་པའི་མཚན་དང་ལྡན་པ་ཡིན་ནོ། ། 21.-24.ཕྲ་མ་ཡོངས་སུ་སྤངས་ཏེ་རྩོད་ཅིང་འཁོན་པའི་བསྡུམས་བྱས་པས། དེའི་རྒྱུ་དེའི་རྐྱེན་གྱིས་སོ་བཞི་བཅུ་དང་ལྡན་པའི་མཚན་དང་། སོའི་ཐགས་བཟང་བའི་མཚན་དང་། སོ་མཉམ་པའི་མཚན་དང་ལྡན་པ་ཡིན་ནོ། ། 25.འདོད་པའི་ཁམས་ཀྱི་བྱམས་པ་བསྒོམས་པས། དེའི་རྒྱུ་དེའི་རྐྱེན་གྱིས་སོ་དཀར་བའི་མཚན་དང་ལྡན་པ་ཡིན་ནོ། ། 26.སློང་བ་མཐོང་ན་དགའ་བའི་སེམས་ཀྱིས་བསུ་བསྐྱེལ་བྱས་པས། དེའི་རྒྱུ་དེའི་རྐྱེན་གྱིས་སེང་གེའི་འགྲམ་པ་ལྟ་བུའི་མཚན་དང་ལྡན་པར་གྱུར་བ་ཡིན་ནོ། ། 27.སེམས་ཅན་ཐམས་ཅད་ལ་བུ་གཅིག་པ་བཞིན་དུ་འདྲ་བར་ལྟ་བས། དེའི་རྒྱུ་དེའི་རྐྱེན་གྱིས་རོ་བྲོ་བའི་མཆོག་གི་མཚན་དང་ལྡན་པ་ཡིན་ནོ། ། 28.-29.སེམས་ཅན་ལ་བླ་ན་མེད་པའི་ཆོས་ཀྱི་རོ་རྟག་ཏུ་གཏོང་ཞིང་བརྗིད་ཅིང་མི་དྲན་པ་ལ་ཡང་དྲན་པར་བྱས་ཏེ། བདག་ཀྱང་ཚུལ་ཁྲིམས་ལྔ་སྲུང་ལ། གཞན་ཡང་བསྲུང་བར་བསྐུལ་ཞིང་བྱམས་པའི་སེམས་ཀྱིས་ཆོས་ཀྱི་སྦྱིན་པ་ཆེན་པོ་བྱས་ན། དེའི་རྒྱུ་དེའི་རྐྱེན་གྱིས་ཤའི་གཙུག་ཏོར་གྱི་མཚན་དང་། ལྕེ་རིང་ཞིང་ཡངས་པའི་མཚན་དང་ལྡན་པ་ཡིན་ནོ། ། 30.བདེན་པའི་ཚིག་དང་། ཆོས་ཀྱི་དགའ་བའི་ཚིག་དང་། མཉེན་དེས་པའི་ཚིག་སྨྲ་ཡི་དུས་མ་ཡིན་པའི་ཚིག་མི་སྨྲ་བས། དེའི་རྒྱུ་དེའི་རྐྱེན་གྱིས་ཚངས་པའི་སྒྲ་དབྱངས་དང་ལྡན་པ་ཡིན་ནོ། ། 31.སྙིང་རྗེའི་སེམས་བསྒོམས་པས་སེམས་ཅན་རྣམས་ལ་ཕ་མ་ལྟ་བུར་ལྟ་བས་དེའི་རྒྱུ་དེའི་རྐྱེན་གྱིས་མིག་མཐོན་མཐིང་ལྟར་འདུག་པ་དང་། མིག་ཁྱུ་མཆོག་གི་རྒྱལ་པོ་ལྟ་བུའི་མཚན་དང་ལྡན་པ་ཡིན་ནོ། ། 32.ཡོན་ཏན་དང་ལྡན་པའི་ལེགས་པ་མ་བཅབས་ཤིང་བསྟོད་ཅིང་བསྔགས་པས། དེའི་རྒྱུ་དེའི་རྐྱེན་གྱིས་མཛོད་སྤུ་དཀར་པོའི་མཚན་དང་ལྡན་པ་ཡིན་ནོ། ། མཚན་སུམ་ཅུ་རྩ་གཉིས་འདི་དག་གི་རྒྱུ་དང་། རྐྱེན་སོ་སོར་བཤད་མོད་ཀྱི། དེའི་རྒྱུ་དེའི་རྐྱེན་ཡང་དག་པ་ནི་ཚུལ་ཁྲིམས་དང་། བརྩོན་འགྲུས་སོ། །
Tibetan Source	《མདོ་ཨ་པ་》ཤ་308ན་1ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number