11280

Tibetan	ལུས་ལ་བརྟག་པར་བྱ་བ་བཞི་བཅུ་རྩ་བཞི།
Tibetan Alternate
Tibetan Definition	དེ་ཡང་། དཀོན་བརྩེགས་འཕགས་པ་ཁྱིམ་བདག་དཔལ་བྱིན་གྱིས་ཞུས་པའི་མདོ་ལས་བྱུང་བ་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་འདོད་པས་ཏེ། 1.འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོས་ལུས་ཡིད་དུ་མི་འོང་བ་དང་། རང་བཞིན་གྱིས་མི་མཐུན་པ་སྟེ། སྨད་པར་བརྟག་པར་བྱ། 2.བྱང་ཆུབ་སེམས་དཔས་ལུས་རྣག་གཟིག་པ་སྟེ། དྲི་མི་ཞིམ་པར་བརྟག་པར་བྱ། 3.བྱང་ཆུབ་སེམས་དཔས་ལུས་ཐ་མར་འཇིག་པ་སྟེ། སྙིང་པོ་མེད་པར་བརྟག་པར་བྱ། 4.བྱང་ཆུབ་སེམས་དཔས་ལུས་རྒྱུས་པའི་བོག་སྦྲེལ་བ་སྟེ། ཉམ་ཆུང་བར་བརྟག་པར་བྱ། 5.བྱང་ཆུབ་སེམས་དཔས་ལུས་མི་གཙང་བ་ཟག་པ་སྟེ། མི་གཙང་བར་བརྟག་པར་བྱ། 6.བྱང་ཆུབ་སེམས་དཔས་ལུས་ཡང་དག་པ་མ་ཡིན་པ་སྟེ། སྒྱུ་མ་ལྟ་བུར་བརྟག་པར་བྱ། 7.བྱང་ཆུབ་སེམས་དཔས་ལུས་སྐྱེ་བོ་མི་མཁས་པ་སོ་སོའི་སྐྱེ་བོ་རྣམས་འཁྲུག་པར་བྱེད་པར་བརྟག་པར་བྱ། 8.བྱང་ཆུབ་སེམས་དཔས་ལུས་འཇིག་པ་དང་། བུ་ག་དགུའི་སྒོ་ནས་འཛག་པར་བརྟག་པར་བྱ། 9.བྱང་ཆུབ་སེམས་དཔས་ལུས་འདོད་ཆགས་ཀྱི་མེ་ཀུན་ཏུ་འབར་བར་བརྟག་པར་བྱ། 10.བྱང་ཆུབ་སེམས་དཔས་ལུས་ཞེ་སྡང་གི་མེས་འཚིག་པར་བརྟག་པར་བྱ། 11.བྱང་ཆུབ་སེམས་དཔས་ལུས་གཏི་མུག་གི་མེས་མེ་ལྕེ་གཅིག་ཏུ་གྱུར་པར་བརྟག་པར་བྱ། 12.བྱང་ཆུབ་སེམས་དཔས་ལུས་འདོད་ཆགས་དང་། ཞེ་སྡང་དང་། གཏི་མུག་རྣམས་ཀྱིས་ལྗོངས་པར་བརྟག་པར་བྱ། 13.བྱང་ཆུབ་སེམས་དཔས་ལུས་འདོད་ཆགས་ཀྱི་དྲ་བས་ཁེབས་ཤིང་སྲིད་པའི་དྲ་བར་ཆུད་པར་བརྟག་པར་བྱ། 14.བྱང་ཆུབ་སེམས་དཔས་ལུས་ཀུན་ནས་བུ་གས་ཡོངས་སུ་གང་བས་བུ་གའི་གནས་སུ་བརྟག་པར་བྱ། 15.བྱང་ཆུབ་སེམས་དཔས་ལུས་ནད་བཞི་བརྒྱ་རྩ་བཞིས་གཙེས་པར་བརྟག་པར་བྱ། 16.བྱང་ཆུབ་སེམས་དཔས་ལུས་སྲིན་བུའི་རིགས་བརྒྱད་ཁྲི་བཞི་སྟོང་གི་གནས་སུ་བརྟག་པར་བྱ། 17.བྱང་ཆུབ་སེམས་དཔས་ལུས་འཆི་བའི་ཆོས་ཉིད་ཡིན་པས་མི་རྟག་པར་བརྟག་པར་བྱ། 18.བྱང་ཆུབ་སེམས་དཔས་ལུས་ཆོས་ལ་རྨོངས་པས་བེམས་པོ་ཡིན་པར་བརྟག་པར་བྱ། 19.བྱང་ཆུབ་སེམས་དཔས་ལུས་མཐར་གྱིས་གྲུབ་ཅིང་མཐའ་མར་འཇིག་པས་བུམ་པ་ལྟ་བུར་བརྟག་པར་བྱ། 20.བྱང་ཆུབ་སེམས་དཔས་ལུས་མྱ་ངན་གྱིས་གནོན་པ་མང་པོས་གུང་བས་ཉམ་ཐག་པར་བརྟག་པར་བྱ། 21.བྱང་ཆུབ་སེམས་དཔས་ལུས་ཐ་མར་རྒ་ཞིང་འགྱུར་བས་བརྟན་པ་མེད་པར་བརྟག་པར་བྱ། 22.བྱང་ཆུབ་སེམས་དཔས་ལུས་གཡོ་དང་སྒྱུའི་ཉེ་བར་སྤྱོད་པ་དག་གིས་བརླག་པར་བརྟག་པར་བྱ། 23.བྱང་ཆུབ་སེམས་དཔས་ལུས་དགང་དཀའ་བས་སའི་གཏིང་ལྟ་བུར་བརྟག་པར་བྱ། 24.བྱང་ཆུབ་སེམས་དཔས་ལུས་དགའ་བའི་གཟུགས་དང་། བདེ་བའི་གཟུགས་ལ་ཞེན་པས་མེ་ལོང་ལྟ་བུར་བརྟག་པར་བྱ། 25.བྱང་ཆུབ་སེམས་དཔས་ལུས་འདོད་པའི་ཡོན་ཏན་ལྔ་པོ་དག་གིས་ཆོག་མི་ཤེས་པར་བརྟག་པར་བྱ། 26.བྱང་ཆུབ་སེམས་དཔས་ལུས་རྗེས་སུ་ཆགས་པ་དང་། ཁོང་ཁྲོ་བ་དག་གིས་འཇོམས་པར་བརྟག་པར་བྱ། 27.བྱང་ཆུབ་སེམས་དཔས་ལུས་བསྟི་སྟང་དང་། གནོད་པ་མྱོང་བས་མི་བརྟན་པར་བརྟག་པར་བྱ། 28.བྱང་ཆུབ་སེམས་དཔས་ལུས་ཆུ་ཀླུང་གི་རྒྱུན་བཞིན་དུ་གཞན་འབྱུང་བས་རྐྱེན་གཞན་དང་གཞན་དུ་བརྟག་པར་བྱ། 29.བྱང་ཆུབ་སེམས་དཔས་ལུས་ཚུལ་བཞིན་མ་ཡིན་པ་སྣ་ཚོགས་ཡིད་ལ་བྱེད་པའི་རྣམ་པར་རྟོག་པ་དག་གིས་ཡིད་ཀྱི་སེམས་པ་ཡིན་པར་བརྟག་པར་བྱ། 30.བྱང་ཆུབ་སེམས་དཔས་ལུས་ཐ་མར་དུར་ཁྲོད་ལ་ཐུག་པས་བྱས་པ་མི་གཟོ་བར་བརྟག་པར་བྱ། 31.བྱང་ཆུབ་སེམས་དཔས་ལུས་སྤྱང་ཀི་དང་། ལྕེ་སྤྱང་དང་། ཁྱི་ཆེན་ཤ་ཟ་བ་དག་གི་ཟས་སུ་བརྟག་པར་བྱ། 32.བྱང་ཆུབ་སེམས་དཔས་ལུས་རུས་པ་དང་། རྒྱུས་པའི་བོག་རེས་སྦྲེལ་བས་འཁྲུལ་འཁོར་ལྟ་བུར་བརྟག་པར་བྱ། 33.བྱང་ཆུབ་སེམས་དཔས་ལུས་བཤང་བ་དང་། གཅི་བ་དང་། མཆིལ་མ་དང་། སྣབས་དང་། རྣག་དང་། ཁྲག་གིས་ཡོངས་སུ་གང་བ་སྟེ། བལྟ་བའི་འོས་མ་ཡིན་པར་བརྟག་པར་བྱ། 34.བྱང་ཆུབ་སེམས་དཔས་ལུས་ཟས་དང་སྐོམ་ལས་བྱུང་བ་སྟེ། རང་གི་ཁ་ན་ལས་པ་མ་ཡིན་པར་བརྟག་པར་བྱ། 35.བྱང་ཆུབ་སེམས་དཔས་ལུས་མི་རྟག་པ་སྟེ། ཤིན་ཏུ་ཟད་པའི་ཆོས་ཉིད་ཡིན་པས་དོན་མེད་པའི་གླགས་པས་གླགས་པར་བརྟག་པར་བྱ། 36.བྱང་ཆུབ་སེམས་དཔས་ལུས་ཕྱིར་རྒོལ་བ་མང་པོ་འབྱུང་བས་དགྲ་ལྟ་བུར་བརྟག་པར་བྱ། 37.བྱང་ཆུབ་སེམས་དཔས་ལུས་ཡང་དང་ཡང་དུ་སྡུག་བསྔལ་མྱོང་བས་གསོད་པ་ལྟ་བུར་བརྟག་པར་བྱ། 38.བྱང་ཆུབ་སེམས་དཔས་ལུས་སྡུག་བསྔལ་གསུམ་གྱིས་གཙེས་ཏེ། གསུམ་གང་ཞེ་ན། འདུ་བྱེད་ཀྱི་སྡུག་བསྔལ་ཉིད་དང་། འགྱུར་བའི་སྡུག་བསྔལ་ཉིད་དང་། སྡུག་བསྔལ་གྱི་སྡུག་བསྔལ་ཉིད་ཀྱིས་ཏེ། སྡུག་བསྔལ་གྱི་སྣོད་ཡིན་པར་བརྟག་པར་བྱ། 39.བྱང་ཆུབ་སེམས་དཔས་ལུས་ཕུང་པོ་ལྔ་གྲུབ་པས་སྡུག་བསྔལ་གྱི་གོང་བུ་ཡིན་པར་བརྟག་པར་བྱ། 40.བྱང་ཆུབ་སེམས་དཔས་ལུས་རྐྱེན་ཐ་དད་པ་ལས་བྱུང་བས་བདག་མེད་པ་དང་། བདག་པོ་མེད་པར་བརྟག་པར་བྱ། 41.བྱང་ཆུབ་སེམས་དཔས་ལུས་སྐྱེས་པ་དང་། བུད་མེད་དང་བྲལ་བས་སྲོག་མེད་པར་བརྟག་པར་བྱ། 42.བྱང་ཆུབ་སེམས་དཔས་ལུས་ཕུང་པོ་དང་ཁམས་དང་སྐྱེ་མཆེད་རྣམས་ཀྱིས་སྟོང་པར་བརྟག་པར་བྱ། 43.བྱང་ཆུབ་སེམས་དཔས་ལུས་རྨི་ལམ་ལྟ་བུ་སྟེ། གསོག་ཏུ་བརྟག་པར་བྱ། 44.བྱང་ཆུབ་སེམས་དཔས་ལུས་སྒྱུ་མ་ལྟ་བུ་སྟེ། ཡང་དག་པ་མ་ཡིན་པར་བརྟག་པར་བྱ། 45.བྱང་ཆུབ་སེམས་དཔས་ལུས་རྨིག་རྒྱུ་ལྟ་བུ་སྟེ། འཁྲུལ་པ་བྱེད་པར་བརྟག་པར་བྱ། 46.བྱང་ཆུབ་སེམས་དཔས་ལུས་བྲག་ཆ་ལྟ་བུ་སྟེ། སྤུ་བར་བརྟག་པར་བྱ། 47.བྱང་ཆུབ་སེམས་དཔས་ལུས་མིག་ཡོར་ལྟ་བུ་སྟེ། སྤུ་བའི་བདག་ཉིད་དུ་བརྟག་པར་བྱ་བ་བཅས་སོ། ། (སྐབས་འདིར་བརྟག་པར་བྱ་བ་ཞེ་བདུན་ཡོང་འདུག་པ་གཞུང་གི་འགྲོས་ལྟར་བཀོད་པ་ལགས།)
Tibetan Source	《དཀོན་བརྩེགས་ཅ་པ་》ཤ་346ན་5ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number