137

Tibetan	རྒྱ་གར་དང་བོད་ཀྱི་སྒྲ་རིག་པའི་བསྟན་བཅོས་ཀྱི་རྣམ་གྲངས་གཉིས།
Tibetan Alternate
Tibetan Definition	1.རྒྱ་གར་གྱི་སྒྲ་རིག་པའི་བསྟན་བཅོས་སྐོར། ཨིནྡྲ་བྷཱ་ར་ཎ་དང་། པི་ཤ་ལི་བྱཱ་ཀ་ར་ཎ། ཤ་ཀོཊ་ཡ་ན་བྱཱ་ཀ་ར་ཎ། པཱ་ཎི་ནི་བྱཱ་ཀ་ར་ཎ། སུ་མནྡྷ་བྷ་དྲ་བྱཱ་ཀ་ར་ཎ། པ་ཏཎྜ་ལི་བྱཱ་ཀ་ར་ཎ། མ་ནུ་ཛནྡ་བྱཱ་ཀ་ར་ཎ། ཙནྡྲ་པ་བྱ་ཀ་ར་ཎ་བཅས་བརྒྱད་དང་། ཀ་ལཱ་པ་བྱཱ་ཀ་ར་ཎ། དབྱངས་ཅན་བྱཱ་ཀ་ར་ཎ། གཉིས་བསྣན་པའི་བཅུ་ཡོད་པའི་ནང་ནས་ཀ་ལཱ་པ་དང་ཙནྡྲ་པ། པཱ་ཎི་པ། དབྱངས་ཅན་མ་བཅས་ཆ་ཚང་བ་བོད་སྐད་དུ་འགྱུར་ཡོད་པ་དེ་དག་གང་ཞེ་ན། ། (1)《སྒྲ་མདོ་ཀ་ལཱ་པ་》ནི་སློབ་དཔོན་ཀླུ་སྒྲུབ་ཀྱི་སྦྱིན་བདག་རྒྱལ་པོ་བདེ་སྤྱོད་བཟང་པོས་གཞོན་ནུ་གདོང་དྲུག་བསྒྲུབས་ཏེ་སྒྲ་བསླབས་ཤིང་། མཚམས་སྦྱོར་རྐང་པ་ལྔ་དང་། མིང་ལེ་དྲུག་ཀུན་བཤད་རྐང་པ་བཞི་སྟེ་ལེའུ་བཅོ་ལྔ་བཤད་ཟིན་པ་ན། རྒྱལ་པོས་དེ་ཙམ གྱིས་ཆོག་པར་འདོད་ཅེས་སྨྲས་པས་གཞོན་ནུ་གདོང་དྲུག་ལོག་པར་བརྩམས་པ་དང་། རྒྱལ་པོས་བསྟན་བཅོས་འདིའི་མིང་བྲིས་པས་བཞོན་པ་ཁ་ཕྱིར་ལོག་ནས་རྨ་བྱའི་མཇུག་མ་བསྟན་སྟེ། ཀ་ལཱ་པ་སུ་ཏྲ་ཞེས་སྨྲས་པ་དེ་ཆ་བསགས་ཞེས་པའི་དོན་དུ་བསྒྱུར། ལེའུ་བཅོ་ལྔའི་ལྷག་མ་ཀུན་བཤད་ལ་བཞི་དང་། ཀྲིར་ལ་དྲུག་ཡོད་པ་རྣམས་བྲམ་ཟེ་ཤར་ཝརྨ་དང་། མཆོག་སྲེད་གཉིས་ཀྱིས་ཁ་བསྐངས་ནས་བློ་ཀ་བཞི་བརྒྱ་དང་། ལེའུ་ཉི་ཤུ་རྩ་ལྔ་ཚང་བ་འདི་བྱུང་། འདིའི་འགྲེལ་པ་ཕྱི་རོལ་པའི་པཎྜི་ཏ་ཨུ་ག་བྱ་ལི་སྟེ་གྲགས་འབྱོར་གྱིས་བརྩམས་པ་ལ་ལེའུ་ཉི་ཤུ་རྩ་བདུན་ཡོད་ཅིང་། འདི་ལས་བཏུས་པའི་འགྲེལ་པ་ཉུང་ངུ་ཞིག་པཎྜི་ཏ་སྒྲོལ་བའི་དབང་ཕྱུག་གིས་མཛད་པ་མངའ་རིས་ཀྱི་རྒྱལ་པོ་ལྷ་བླ་མ་ཞི་བ་འོད་ཀྱིས་མཐོ་ལྡི་ཞེས་པས་བརྩམས་པ《འགྲེལ་པ་དུར་སིང་》ཞེས་པ་ཞིག་དང་། ཁ་ཆེའི་པཎྜི་ཏ་ར་ཏྲ་སྟེ་རིན་ཆེན་གདུགས་ཞེས་པས་བརྩམས་པའི་འགྲེལ་པ་དང་། སློབ་དཔོན་སྤྱན་གསུམ་འབངས་ཀྱིས་མཛད་པའི་དུར་སེང་གི་འགྲེལ་པ་སོགས་ཡོད་ཅིང་། ཐར་ལོ་ཉི་མ་རྒྱལ་མཚན་གྱི་འགྲེལ་པ་འདི་བསྒྱུར་ཡང་ཆ་ཚང་བར་མ་བསྒྱུར་བ་ལ། འགྲོ་མགོན་ཆོས་རྒྱལ་འཕགས་པ་དང་དཔོན་ཆེན་ཤཱཀྱ་བཟང་པོས་བསྐུལ་མ་གནང་བ་ལྟར་ཤོང་ལོ་ཙཱ་བ་རྡོ་རྗེ་རྒྱལ་མཚན་གྱིས་ཀ་ལཱ་པའི་གཞུང་ཆ་ཚང་བ་བོད་སྐད་དུ་བསྒྱུར་ནས་འཆད་ཉན་བསྐྱངས་སློབ་མ་མཁས་པ་མང་དུ་ཐོབ་ཅིང་ལྷག་པར་དུ་དཔང་ལོ་ཙཱ་བ་བློ་གྲོས་བརྟན་པ་《འགྲེལ་པ་དུར་སིང་》གི་ལེའུ་བཅུ་གཉིས་ཙམ་དང་《སི་སོགས་ཀྱི་མཐའ་དཔྱད་པ་》འཇམ་དཔལ་གྲགས་པས་མཛད་པ་བསྒྱུར་ཅིང་། བུ་སྟོན་རིན་པོ་ཆེས《ཀ་ལཱ་པའི་འགྲེལ་པ་དུར་སིང་》ཡོངས་སུ་རྫོགས་པ་བོད་སྐད་དུ་བསྒྱུར་བར་མཛད། དཔང་ལོའི་སློབ་མ་མ་ཏི་རྣམ་གཉིས་དང་། ལོ་ཆེན་བྱང་ཆུབ་རྩེ་མོས་《ཀ་ལཱ་པའི་འགྲེལ་པ་སློབ་མ་ཕན་པ་》བསྒྱུར། དེའི་སློབ་མ་ནམ་མཁའ་བཟང་པོས་དེ་ལ་འགྱུར་བཅོས་མཛད། ལོ་ཙཱ་བ་དེ་དང་དེའི་སློབ་མ་ཤེས་རབ་དཔལ་གཉིས་ཀྱི་དྲུང་ནས་ལོ་ཙཱ་བ་ཐུགས་རྗེ་དཔལ་གྱིས་སློབ་ཁྲིད་གསན་ཏེ《ཀ་ལཱ་པའི་འགྲེལ་ཊིཀྐ་ཆེན་མོ་》བརྩམས་པར་མཛད། གཞན་ཡང《ཀ་ལཱ་པའི་》གཞུང་འདི་ལ་བོད་ཀྱི་མཁས་པས་མཛད་པའི་འགྲེལ་པ་མང་དུ་ཡོད་པ་གཤམ་གསལ། ལོ་ཙཱ་བ་ནམ་མཁའ་བཟང་པོས་མཛད་པའི《ཀ་ལཱ་པའི་ཊིཀྐ་ལེགས་སྦྱར་འབྱུང་གནས་》དང་། སྙེ་ཐང་བློ་བརྟན་བཞི་པས་མཛད་པའི《ཀ་ལཱ་པའི་འགྲེལ་ཊིཀྐ་ཆེན་མོ་》ཞ་ལུ་ལོ་ཆེན་ཆོས་སྐྱོང་བཟང་པོས་མཛད་པའི་《ཀ་ལཱ་པའི་བཤད་སྦྱར་གཞུང་དོན་གསལ་བ་》དང་།《སྐད་དོད་ཉེར་མཁོ་》ཞ་ལུ་ལོ་ཙཱ་བ་དཔལ་ལྡན་དབང་པོའི་སྡེས་མཛད་པའི་《ཀ་ལཱ་པའི་མཚམས་སྦྱོར་གྱི་ཊཱིཀྐ་འཆད་ཉན་རྣམ་གསལ་》བྱང་བདག་རྣམ་རྒྱལ་གྲགས་བཟང་གིས་མཛད་པའི་《ཀ་ལཱ་པའི་མདོ་རྒྱན་》ཆུ་མིག་ལོ་ཙཱ་བས་མཛད་པའི་《ཀ་ལཱ་པའི་ཊིཀྐ་》 དབུས་པ་བློ་གསལ་བྱང་ཆུབ་ཡེ་ཤེས་ཀྱིས་མཛད་པའི་《ཀ་ལཱ་པའི་སྤྱི་དོན་》སྟག་ཚང་ལོ་ཙཱ་བ་ཤེས་རབ་རིན་ཆེན་གྱིས་མཛད་པའི་《ཀ་ལཱ་པའི་སྤྱི་དོན་》བོ་དོང་ཕྱོགས་ལས་རྣམ་རྒྱལ་གྱིས་མཛད་པའི་《ཀ་ལཱ་པའི་ཊིཀྐ་》ཀརྨ་མི་བསྐྱོད་རྡོ་རྗེས་མཛད་པའི་《ཀ་ལཱ་པའི་ཊིཀ་》སོགས་མང་དུ་ཡོད། (2)《ཙནྡྲ་པ་》ནི་རྒྱ་གར་གྱི་སློབ་དཔོན་ཙནྡྲ་གོ་མིས་མཛད་པའི་སྒྲ་མདོ་ཞིག་སྟེ། འདི་ཡང་ཐོག་མར་འགྲོ་མགོན་འཕགས་པའི་དུས་ཤོང་ལོ་རྡོ་རྗེ་རྒྱལ་མཚན་གྱིས་བོད་སྐད་དུ་བསྒྱུར།《ཙནྡྲ་པའི་མདོའི་འགྲེལ་པ་》ལ་སློབ་དཔོན་ཙནྡྲ་གོ་མིའི་ཡབ་བམ་ཞང་པོ་ཆོས་འབངས་ཞེས་པས་མཛད་པ་ཤོ་ཀ་སྟོང་ཕྲག་དྲུག་ཡོད་པ་ཞིག་དང་། པཎྜི་ཏ་རཏྣ་མ་ཏི་རིན་ཆེན་བློ་གྲོས་ཀྱིས་མཛད་པ་ཤླཽ་ཀ་སྟོང་ཕྲག་བཅུ་གཉིས་ཡོད་པ་ཞིག དེའི་ཡང་འགྲེལ་པཎྜི་ཏ་པུན་བཛྲ་སྟེ་གང་བའི་ཟླ་བ་ཞེས་པས་མཛད་པ་ཤོ་ཀ་སྟོང་ཕྲག་སུམ་ཅུ་སོ་དྲུག་ཡོད་པ་ཞིག་དང་།《བྱིངས་མདོའི་འགྲེལ་པ་བྱིངས་ཀྱི་དཔུང་གཉེན་》ཞེས་པ་ཞིག《ཡི་གེའི་མདོའི་འགྲེལ་པ་》སློབ་དཔོན་ཆོས་སྐྱོང་གིས་མཛད་པ། པཎྜི་ཏ་བརྡ་སྤྲོད་པའི་དབང་ཕྱུག་གིས་མཛད་པའི་《སློབ་དཔོན་ཙནྡྲ་གོ་མིའི་གསུང་ལ་གཅེས་སྤྲས་སུ་བྱས་པ་》བྲམ་ཟེ་སྨྲ་བའི་སེང་གེའམ་པཎྜི་ཏ་ཨ་པ་ར་རྫི་ཏ་ཞེས་པས་མཛད་པ་《གནས་བརྒྱད་ཆེན་མོ་》དང་། དེའི་འགྲེལ་པ་ཁ་ཆེ་ལེགས་སྦྱར་གསུམ་ལྡན་ཞེས་པས་མཛད་པ། པཎྜི་ཏ་ནོར་བཟང་གྲགས་པས་མཛད་པ་《ཙནྡ་བྱཱ་ཀ་ར་ཎའི་ཡན་ལག་རབ་ཏུ་བྱེད་པ་སྨྲ་བའི་སྒོ་》དང་། དེའི་སློབ་མ་པཎྜི་ཏ་སྨྲི་ཏི་ཛྙཱ་ན་ཀིརྟིས་མཛད་པ་《སྨྲ་སྒོ་མཚོན་ཆ་》སོགས་ཡོད་ལ། གཞན་ཡང་《ཙནྡྲ་པའི་གཞུང་》འདིའི་འགྲེལ་པ་བོད་ཀྱི་མཁས་པས་མཛད་པ་ལ། ཞ་ལུ་ལོ་ཆེན་ཆོས་སྐྱོང་བཟང་པོས་མཛད་པའི་《ཙནྡྲ་པའི་འགྲེལ་པ་བརྡ་སྤྲོད་རྒྱ་མཚོའི་གྲུ་གཟིངས་》ལོ་ཆེན་ཐུགས་རྗེ་དཔལ་གྱིས་མཛད་པའི་《ཙནྡ་པའི་འགྲེལ་པ་མཚན་ཉིད་གསལ་བར་བྱེད་པ་ཡིད་བཞིན་ནོར་བུ་》སོགས་འགའ་ཞིག་ཡོད། ། (3)《པཱ་ཎི་པ་》སངས་རྒྱས་ཤཱཀྱ་མུ་ནི་སྐུ་མྱ་ངན་ལས་འདས་ནས་རིང་པོར་མ་ལོན་པ་ནས་བྲམ་ཟེའི་ཁྱེའུ་པཱ་ཎི་ཞེས་ལོ་ན་ཆུང་དུས་ནས་སྒྲ་རིག་པ་ལ་ཤིན་ཏུ་མཁས་པ་ཞིག་བྱུང་བ་དེས་《པཱ་ཎི་བྱཱ་ཀ་ར་ཎ་》ཞེས་པ་ཤླཽ་ཀ་ཉིས་སྟོང་ཡོད་པ་ཞིག་བརྩམས། དེ་ལ་ཀླུའི་རྒྱལ་པོ་ནོར་རྒྱས་ཀྱི་བུས་《མཧཱ་བྷ་ཥ་》ཞེས་པའི་འགྲེལ་པ་ཞིག་བརྩམས་པ། རྩ་འགྲེལ་གཉིས་ཀར་འཆད་ཉན་ཐེངས་རེ་ཚར་བ་ལ་ལོ་བཅུ་གཉིས་ཙམ་འགོར་བར་བཤད། སློབ་དཔོན་ར་མ་ཙནྡྲས་རྩ་འགྲེལ་གཉིས་ཀ་བསྡུས་པའི་སྙིང་པོའི་རྩ་བ་དང་།《འགྲེལ་པ་རབ་ཏུ་བྱ་བ་》ཞེས་པ་ཞིག་བརྩམས་པ་དེར་མིང་དང་། དབྱངས་གསལ་བྱེད་རྣམ་བཅད་བཅས་མཚམས་སྦྱོར་ལ་ལེའུ་ལྔ། ཕོ་མོ་མ་ནིང་གི་དབྱངས་གསུམ་དང་། ཕོ་མོ་མ་ནིང་གི་གསལ་བྱེད་གསུམ། མི་ཟད་པ། བུད་མེད་དུ་བརྗོད་པ། བྱེད་ཅན། ཚིག་སྡུད། བུ་བརྒྱུད། དེ་ཕན་བཅས་མིང་ལེའུ་བཅུ་གཉིས། རྣམ་དབྱེའི་འཇུག་པ་བྷུ་ཨད་ཧུ་སོགས་ཀུན་བཤད་ཀྱི་ལེའུ་བཅུ་བདུན། བྱེད་ཅན་གྱི་ལེའུ་བཞི་བཅས་ལེའུ་ཉེར་བརྒྱད་ཡོད་པ་བརྩམས། འོན་ཀྱང་ཏཱ་ལའི་བླ་མ་སྐུ་ཕྲེང་ལྔ་པ་ཡན་ལ་མིང་ཙམ་ལས་བོད་སྐད་དུ་མ་འགྱུར་ཞིང་། སྐབས་དེར་རྒྱ་གར་ནུབ་ཕྱོགས་ཀྱི་པཎྜི་ཏ་ཆེན་པོ་པཱ་ལ་བྷ་དྲ་དང་། དེའི་གཅུང་པཎྜི་ཏ་གོ་ཀུ་ལ་ན་ཐཱ་མི་ཤ་སྐུ་མཆེད་གཉིས་བོད་དུ་ཕེབས་སྐབས་ཁོང་རྣམ་གཉིས་ལ་གསེར་ཞོ་བརྒྱ་ཕྲག་མང་པོའི་སློབ་ཡོན་གནང་སྟེ། འདར་པ་ལོ་ཙཱ་བ་ངག་དབང་ཕུན་ཚོགས་ལྷུན་གྲུབ་ལ་《སྒྲ་མདོ་པཱ་ཎི་པ་》ཆ་ཚང་བར་སློབ་དགོས་པའི་བཀའ་སློབ་གནང་བ་ལྟར། ཁོང་གིས་པཎྜི་ཏ་རྣམ་གཉིས་ཀྱི་དྲུང་ནས་སྒྲ་གཞུང་འདི་ཆ་ཚང་བ་སློབ་སྦྱོང་མཛད་པ་དང་ཆབས་ཅིག་རྒྱ་གར་སྐད་ནས་བོད་སྐད་དུ་བསྒྱུར། ལོ་ཙཱ་བ་དེ་ཉིད་དགུང་ལོ་ཉེར་ལྔར་ཕེབས་པ་རབ་བྱུང་བཅུ་གཅིག་པའི་ས་ཁྱི(1658) ལོར་《སྒྲ་མདོ་པཱ་ཎི་པའི་འགྲེལ་པ་ནོར་གྱི་ཤིང་རྟ་》ཞེས་པ་འདི་བརྩམས་པར་མཛད་པ་ནས་སྒྲ་གཞུང་འདི་དར་འཕེལ་བྱུང་བ་ཡིན། (4)《དབྱངས་ཅན་མ་》རྒྱ་གར་ལྷོ་ཕྱོགས་ཀྱི་བྲམ་ཟེའི་རིགས་ཀྱི་དགེ་བསྙེན་ཨ་ནུ་ཤུ་ཏི་ཞེས་བྱ་བ་སྒྲ་རིག་པ་ལ་ཤིན་ཏུ་མཁས་པ་ཞིག་བྱུང་བ་དེས་ནམ་ཞིག་པཎྜི་ཏ་གཞན་དག་དང་རྩོད་གླེང་གནང་སྐབས་སྐྱེས་བུ་རྣམས་ཞེས་པའི་སྐད་དོད་ལ་སུམ་སུ་ཞེས་པ་ཞལ་ནོར་ནས་སུམ་ཀྟུཞེས་གསུངས་པ་དེ་ལ་ཁུངས་ལུང་བསྟན་པའི་ཆེད་དུ། ཁོང་གི་ཡི་དམ་ལྷ་མོ་དབྱངས་ཅན་མས་ཞལ་བསྟན་ནས་སྒྲ་མདོ་འདི་གསུངས་པས་གཞུང་འདིའི་མིང་ལ་《དབྱངས་ཅན་སྒྲ་མདོ་》ཞེས་བཏགས་པ་ཡིན་ཟེར་སྲོལ་ཡོད། གཞུང་འདི་ལ་རྒྱ་གར་དུ་འགྲེལ་པ་གྲགས་ཆེ་བ་དྲུག་ཡོད།《འགྲེལ་པ་བི་མ་ལ་དཱ་ས་》ཞེས་པ་རྩོམ་པ་པོའི་སློབ་དཔོན་ལ་བརྟེན་ནས་མིང་དུ་བཏགས་པ་ཞིག་དང་། 《ཀ་མ་རྟེན་ནུ་》ཞེས་པ་དེང་སང་བར་སྦེད་པ་གཅིག སློབ་དཔོན་གོང་གསལ་གྱིས་མཛད་པའི《གསལ་ལྡན་ཆུ་རྒྱུན་》གཞན་ཡང་ཕྱི་རོལ་པའི་པཎྜི་ཏས་བརྩམས་པའི་འགྲེལ་པ་《པ་རི་དི་པེ་ཀ་སྟེ་》ཡོངས་སུ་སྣང་བྱེད་ཅེས་པ་དང《མཎྜ་ནི་》ཞེས་རྒྱན་དུ་གྱུར་པ་སོགས་རྒྱ་གར་ཡུལ་དབུས་ཀྱི་ཕྱི་ནང་གི་པཎྜི་ཏ་མང་པོས་བརྩམས་པའི་འགྲེལ་པ་ཧ་ཅང་མང་པོ་ཡོད། 《དབྱངས་ཅན་སྒྲ་མདོ་》འདི་བོད་ཀྱི་ལྷ་མཐོང་ལོ་ཙཱ་བ་བཤེས་གཉེན་རྣམ་རྒྱལ་གྱིས་གཞུང་ཕྱེད་ཙམ་བོད་སྐད་དུ་བསྒྱུར་ཞིང་། ཇོ་ནང་ཏཱ་ར་ན་ཐས་གཞུང་འདི་ཉིད་ཀྱི་རྩ་བ་བསྒྱུར་ཞིང་།《མཆོག་ཏུ་གསལ་བ་》ཞེས་པའི་འགྲེལ་པ་ཞིག་ཀྱང་མཛད། རྗེས་སུ་ཏཱ་ལའི་བླ་མ་སྐུ་ཕྲེང་ལྔ་པས་བསྐུལ་མ་གནང་བ་ལྟར་རབ་བྱུང་བཅུ་གཅིག་པའི་ཤིང་སྦྲུལ(1665)ལོར་འདར་པ་ལོ་ཙཱ་བ་ངག་དབང་ཕུན་ཚོགས་ལྷུན་གྲུབ་ཀྱིས་《དབྱངས་ཅན་སྒྲ་མདོའི་འགྲེལ་པ་རབ་ཏུ་བྱ་བ་གསལ་ལྡན་》སློབ་དཔོན་ཨ་ནུ་ཤུ་ཏིས་མཛད་པ་འདི་ཉིད་བོད་སྐད་དུ་བསྒྱུར། གཞན་ཡང་བྱ་བྲལ་བློ་བཟང་རིན་ཆེན་གྱིས་མཛད་པའི་《དབྱངས་ཅན་སྒྲ་ཊཱིཀྐ་མཚན་》ངམ་རིང་མཁན་པོ་ཚགས་སྦུར་བ་སྐལ་བཟང་འཕྲིན་ལས་ཀྱིས་བརྩམས་པའི་《དབྱངས་ཅན་སྒྲ་ཊིཀྐ་མཆན་》སོགས་མང་པོ་ཡོད། 2.བོད་སྐད་ཀྱི་དབང་དུ་བྱས་པའི་སྒྲ་རིག་པའི་བསྟན་བཅོས་སྐོར། རྒྱལ་པོ་སྲོང་བཙན་སྒམ་པོའི་དུས་སུ་སློབ་དཔོན་སམ་བྷོ་ཊས་མཛད་པའི་《སུམ་ཅུ་པ་》དང་།《རྟགས་ཀྱི་འཇུག་པ་》སོགས་སྒྲའི་བསྟན་ཆོས་བརྒྱད་དང་《ཐོན་མིའི་མདོ་རྫིའི་སྒྲ་མདོ།》དཔང་ལོ་ཙཱ་བ་བློ་གྲོས་བརྟན་པས་མཛད་པའི་《ཚོགས་གསུམ་གསལ་བ།》ཞ་ལུ་ལོ་ཆེན་ཆོས་སྐྱོང་བཟང་པོས་མཛད་པའི་《སུམ་རྟགས་ཀྱི་འགྲེལ་པ་》སོགས་སུམ་རྟགས་ཀྱི་འགྲེལ་པ་ཧ་ཅང་མང་པོ་བཞུགས་ཡོད་པ་འདིར་མ་བྲིས། སྒྲ་རིག་པའི་ནང་དོན་གྱི་གཙོ་བོ་ནི། རྒྱ་གར་སྐད་ཀྱི་དབང་དུ་བྱས་ན། རང་བཞིན་དང་། རྐྱེན་དང་། རྣམ་འགྱུར་གསུམ་གྱི་སྒོ་ནས་བཤད་དགོས་པས། དང་པོ་རང་བཞིན་ལ་བྱིངས་དང་མིང་གཉིས་ཡོད། བྱིངས་ལ་ཡང་ནང་གསེས་གསུམ་སྟེ། མདོའི་བྱིངས་དང་། རྐྱེན་གྱི་བཅོས་པའི་བྱིངས། གླེགས་བམ་ལས་བྱུང་བའི་བྱིངས་བཅས་ཡིན། རང་བཞིན་གྱི་ནང་གསེས་མིང་དང་རྟགས་ཞེས་པ་གཉིས་དོན་གཅིག་མིང་གི་རྣམ་གྲངས་སྟེ་བྱིངས་ལ་ཀྲད་ཅན་མ་བྱིན་པས་བྱིངས་ཀྱི་མིང་བོར། སི་སོགས་ཀྱི་རྣམ་དབྱེ་མ་བྱིན་པས་ཚིག་ཏུ་མ་གྲུབ་པ་དེ་ལ་མིང་དང་རྟགས་ཞེས་ཟེར་ཞིང་། དེ་ལ་ཕོ་མོ་མ་ནིང་གི་རྟགས་གསུམ་ཡོད་ཅིང་དེ་རེ་རེ་ལ་ནང་གསེས་ཀྱི་དབྱེ་བ་མང་པོ་ཡོད། གཉིས་པ་རྐྱེན་ནི་སྒྲའི་རང་བཞིན་དེ་གཉིས་མིང་ཚིག་བྱིངས་གང་རུང་དུ་བསྒྲུབ་པར་བྱེད་པའི་རྐྱེན་ཞིག་ལ་ཟེར་ཞིང་། དེ་ལ་ཡང་། བྱིངས་རྟགས་སུ་སྒྲུབ་པར་བྱེད་པའི་རྐྱེན། བྱིངས་ཚིག་ཏུ་སྒྲུབ་པ། བྱིངས་བྱིངས་སུ་སྒྲུབ་པ། རྟགས་རྟགས་སུ་སྒྲུབ་པ། མིང་མིང་དུ་སྒྲུབ་པ། རྟགས་བྱིངས་སུ་སྒྲུབ་པ། རྟགས་ཚིག་ཏུ་སྒྲུབ་པ་བཅས་རྐྱེན་བདུན་ཡོད། གསུམ་པ་རྣམ་འགྱུར་ལ་མིང་ལེ་ཀུན་བཤད་ཀྲེར་དུང་བཅས་པ་རྣམས་ཀྱི་བསྒྱུར་བ་དང་དབྱེ་བ་ནི། རང་བཞིན་དང་རྐྱེན་གཉིས་འབྲེལ་བ་ལ་བརྟེན་ནས་བྱུང་བའི་རྣམ་འགྱུར་ཡིན་ཞིང་། མཚམས་སྦྱོར་ལེའུ་ལྔའི་བསྒྱུར་བ་དང་། དབྱེ་བ་ནི་ཡི་གེ་ཙམ་དང་འབྲེལ་བའི་རྣམ་འགྱུར་ཡིན། ཞིབ་པར་སྒྲ་རིག་པའི་གཞུང་རྣམས་སུ་གསལ། བོད་སྐད་ཀྱི་དབང་དུ་བྱས་པའི་སྒྲ་རིག་པའི་གཞུང་གི་བརྗོད་བྱ་གཙོ་བོ་ནི་ཚོགས་གསུམ་སྟེ། མིང་གི་ཚོགས། ཚིག་གི་ཚོགས། དེ་གཉིས་འགྲུབ་བྱེད་ཀྱི་ཡི་གེའི་ཚོགས་བཅས་ཡིན་ཞིང་། སུམ་རྟགས་གཉིས་དང་དག་ཡིག་བཅས་ཀྱིས་ཚོགས་གསུམ་པོ་དེ་རྒྱས་པར་བཤད་པ་ཡིན་པས་བོད་སྐད་ལ་སྒྲ་རིག་པའི་གཞུང་མེད་ཟེར་བ་ནི་སྒྲ་རིག་པ་ཟེར་བ་གང་ལ་གོ་དགོས་པ་མི་ཤེས་པའི་རྟགས་ཡིན་ནོ། །
Tibetan Source	《དུང་དཀར་ཚིག་མཛོད་ཆེན་མོ་》ཤ་730. 22ལས་བཏུས།
Wylie
Wylie Definition
Wylie Synonym
Sanskrit
English
English Definition
English Synonyms
Chinese
Chinese (Simplified)
Chinese (Traditional)
Chinese Definition
Page Number